Wa tolovela ku bonga?

U GILE zakuga nyamutlha? — Himani a nga bhika? — Kuzilava hi mamani wa wena kutani munhu munwani. Makunu, hikuyini u faneleko ku bonga Nungungulu hi zakuga lezo? — Hakuva Nungungulu hi yena a kulisako tisinya leti ti humesako zakuga. Hambulezo, hi fanele ku bonga ni loyi a nga bhika kutani loyi a nga hi phamela.

Ka zikhati zinwani ha rivakelwa ku wula ku nzi bongile loku a vanwani va hi mahela zilo za zi nene, a hi zona? A xikhati lexi Mugonzisi wa Hombe a nga hi laha misaveni, kuve ni vanhu vo kari va nga babya hi hlokonho lava va nga rivakelwa ku bonga.

Wa xi tiva ku xini a hlokonho? — A hlokonho mababyi ma mahako miri wa munhu wu khemekela. A xikhati lexi Jesu a nga hi laha misaveni, a vanhu va hlokonho va wa fanele ku hanya kule ni vanwani. Loku a munhu loyi a nga babya hi hlokonho a wona wokari na ata, i wa fanele ku banguleka a tlharihisa a munhu loye lezaku a nga tshineli laha kusuhani kakwe. Lezo zi wa mahelwa ku a vanhu vanwani va nga tshineli kusuhani, kasi va nga thapelwi hi mababyi ya hlokonho.

Jesu i wa va kombisa wunene ga hombe a vanhu va hlokonho. Ka siku go kari na aya Jerusalema, Jesu i lo hunza hi ka xidoropana xo kari. A xikhati lexi a nga hi kusuhani ni ku chikela, i lo khingiwa hi khume ga vanhu va hlokonho. Va wa zwile lezaku Jesu i wa nyikilwe ntamu hi Nungungulu wa ku hanyisa a mababyi wontlhe.

A vanhu lavo va hlokonho a va tshinelangi ka Jesu. Va lo yima hi le kule. Kanilezi, va wa kholwa lezaku Jesu a nga va hanyisa a mababyi yabye. Hikwalaho, a xikhati lexi a vanhu lavo va hlokonho va nga wona Mugonzisi wa Hombe, va lo mu vitana hi gezu go tlakuka vaku: ‘Jesu, Mugonzisi, hi vune!’

Wa va zwela wusiwana a vanhu va babyako? — Jesu i wa va zwela. I wa ku tiva a kukarateka loku ku nga vangiwa hi wubabyi ga hlokonho. Hikwalaho, i lo va hlamula aku: “Fambani mu ya ti kombisa ka vapristi.” — Luka 17:11-14.

Hikuyini Jesu a nga va byela ku maha lezo? I wulile lezo hi kota ya nayo lowu Jehova a nga nyikile vanhu Vakwe xungetano hi lava va nga babya hi hlokonho. A nayo lowo wu wa wula lezaku a mupristi wa Nungungulu i wa fanele ku hlola a miri wa munhu loye a nga hi ni hlokonho. A mupristi i wa ta byela munhu loyi a nga hi ni hlokonho a ku xana i hanyile a mababyi yakwe ke. Loku a hanyile, i wa ta tlhela a tshama ni vanhu va nga hanya khwatsi. — Levi 13:16, 17.

Kanilezi, a vanhu lavo va hlokonho va wa ha babya. Xana va yile va ya wonana ni mupristi kota lezi Jesu a nga va byelile? — Ina, va lo tekela ku famba. A vavanuna lavo va wa kholwa lezaku Jesu i ta va hanyisa mababyi yabye. Zini zi nga humelela?

Na va ha famba ku ya wonana ni mupristi, va lo hanya mababyi yabye. A nyama yabye yi wa hanyile. Va wa hanyile! A kukholwa kabye ka ntamu wa Jesu ku lo chachazelwa. Va wa tsakile nguvu! Kanilezi, zini va nga fanele ku maha kasi ku kombisa kubonga kabye? Loku ku wa hi wena na u mahile yini? —

A munwe wa vavanuna lava va nga hanyisilwe i lo tlhela ka Jesu. I lo sangula ku dumisa Jehova, a wulawula zilo za zi nene hi Nungungulu. Lezo zi wa hi zi nene hakuva a ntamu lowu a nga hanyisilwe hi wona wu wata hi ka Nungungulu. A wanuna loye i lo khizama mikonzweni ya Mugonzisi wa Hombe a mu bonga. I lo bonga nguvu hi lezi Jesu a nga mu mahele.

Kanilezi, ahati a vavanuna lava vanwani va ntlhanu ni mune? Jesu i lo wutisa aku: ‘Kasi a ku basiswangi khume ga vanhu va hlokonho? Makunu lava vanwani va ntlhanu ni mune va kwihi? Munwe ntsena a wuyileko ku ta dumisa Nungungulu?’

Hi zona futsi. Munwe ntsena wa lava va khume a nga dumisa Nungungulu, ni ku tlhela a ya bonga Jesu. Niku a munhu loye i wa hi muSamaria, i wa hi wanuna wa tiko ginwani. Lava vanwani va ntlhanu ni mune a va bongangi Nungungulu na Jesu. — Luka 17:15-19.

Hi wihi u tsakelako ku fana naye xikari ka vavanuna lavo? Hi lava ku fana ni muSamaria, a hi zona? — Makunu loku a munhu wo kari a hi mahela za zi nene, zini hi faneleko ku alakanya ku zi maha? — Hi fanele ku kombisa kubonga. A vanhu vo tala va tolovela ku rivakelwa ku wula ku nzi bongile. Kanilezi zi nene ku wula ku nzi bongile. Loku hi maha lezo, Jehova Nungungulu ni N’wana wakwe Jesu, va tsaka.

Loku u alakanyela khwatsi, u ta wona lezaku a vanhu va ku mahela zilo zo tala. Hi xikombiso, wa tshuka u babya? — Kuzilava a wu se tshuka u babya nguvu a ku fana ni vavanuna lava va khume va nga hi ni hlokonho, kanilezi, wa tshuka uva ni funzeketa kutani ku bayisa lomu nzeni. I kona a nga ku khatalela? — Kuzilava i ku nyikile muri wo kari a tlhela a ku mahela zilo zinwani. A wu tsakangi hi kuva a ku vunile lezaku u hanya mababyi lawo? —

A wanuna wa muSamaria i bongile Jesu hi lezi a nga mu hanyisa, niku lezo zi mahile Jesu a tsaka. U alakanya lezaku a mamani wa wena kutani papai wa wena va ta tsaka loku u va bonga hi zilo lezi va ku maheleko? — Ina, va ta tsaka.

A vanhu vo kari va ku mahela zilo siku ni siku kutani viki ni viki. Kuzilava lowo hi wona ntiro wabye. Niku a kutala kabye va tsaka hi ku maha mitiro leyo. Kanilezi, u nga ha tshuka u rivakelwa a ku wula ku nzi bongile. A mugonzisi wa wena kuzilava i ti karata nguvu kasi a ku vuna ku zwisisa lezi u gonzako. Lowo i ntiro wakwe. Kanilezi, i ta tsaka loku u mu bonga hi kota ya lezi a ku vunako ku zwisisa lezi u gonzako.

Ka zikhati zinwani a vanhu va ku mahela zilo za zi tsongwani ntsena. I kona a tshukileko a ku vuna ku tlakula zilo zo binza? Kutani a ku nyiketileko zakuga ka xikhati xa kuga? Zi nene a ku wula ku nzi bongile hambu ka zilo lezo za zi tsongwani.

Loku hi alakanya ku bonga a vanhu laha misaveni, zi ta hi olovela nguvu a ku alakanya ku bonga a Papai wa hina wa le tilweni. Ku na ni zilo zo tala nguvu lezi hi nga bongako Jehova! I hi nyikile wutomi ni zilo zontlhe za zi nene lezi zi mahako wutomi gi tsakisa. Hikwalaho, hi na ni zigelo zo tala nguvu za ku dumisa Nungungulu hi kuva hi wulawula zilo za zi nene hi yena siku ni siku.