Hikuyini a vanhu va babyako?

WA TIVA a munhu wo kari a babyako? — Kuzilava wenawu wa tshuka u babya. U nga hazwa mukhuhlwani, kutani kuzwa lomu nzeni. A vanwani va babya nguvu. Niku va tsanzeka ni ku suka va yima ha voce. Lezo zi tolovela ku humelela loku a munhu a khosahele nguvu.

A vanhu vontlhe va tshuka va babya. Wa zi tiva a ku hikuyini a vanhu va babyako, va khosahala, va tlhela vafa? — Ka siku go kari ku lo tisiwa a wanuna ka Jesu loyi a nga kala a nga fambi, zonake Jesu i lo komba lezaku hikuyini a vanhu va babyako va tlhela vafa. Nyima nzi ku hlawutela lezi zi nga humelela.

Jesu i wa hi ka muti wo kari ka xidoropana xi nga hi kusuhani ni Bimbi ga Galilea. Zonake ku lota xidlemo xa vanhu kasi xi ta mu wona. Makunu, a vanhu vo tala va lo wona lezaku ku wa nga hi na wutshamu gaku a vanwani va nghena lomu ndlwini. A ku na munhu a nga kari a zi kota ku tshinela laha nyangweni. Hambulezo, a vanhu va wa ha simama kuta! A ntlawa wa vanhu vo kari wu lota ni wanuna a nga file reve ga miri, loyi a nga kala a nga fambi. Zi lavile ku a tlakuliwa hi mune wa vavanuna laha ka xibhedana kutani lihlaka.

Wa zi tiva a ku hikuyini va nga lava ku tisa a wanuna loye ka Jesu? —

Va wa kholwa lezaku Jesu a nga mu vuna, a mu hanyisa ka mababyi lawo. Wa zi tiva ku va zi kotisile kuyini a ku nghena ni wanuna loye na ku hi ni vanhu lavo vo tala nguvu lomu ndlwini? —

Hi zona, a mufota lowu u wu wonako laha, wu komba lezi va nga mahisa zona. A kuranga va lo teka a wanuna loye va noma naye le hehla ka yindlu. Zonake va bhoxa yindlu leyo hi le hehla. Hi kugumesa, va lo relelisa a wanuna loye laha saleni hi laha ka bhoxo legi va nga gi vululile. Va wa hi ni kukholwa ka hombe!

A xikhati lexi va nga wona lezi zi nga kari zi maheka, a vanhu vontlhe va nga hi lomu ndlwini, va lo hlamala nguvu. A wanuna loye a nga hi laha ka xibhedana i lo relela laha xikari ka vanhu lavo. Xana Jesu i kwatile a xikhati lexi a nga wona lezi a vavanuna lavo va nga zi mahile? — Ahihi! I lo tsaka hi ku wona a kukholwa kabye. I lo byela a wanuna loyi a nga file tlhelo ga miri aku: “A zionho za wena zi tsetselelwe.”

A vanhu vo kari va zi wonile na zi bihile a kuva Jesu a wulile lezo. Va wa alakanya lezaku i wa nga hi na ntamu wa ku tsetselela zionho. Makunu kasi ku komba lezaku a nga tsetselela, Jesu i te ngalo ka wanuna loye: ‘Vuka, u teka sango ga wena u famba kaya.’

A xikhati lexi Jesu a nga wula lezo, a wanuna loye i lo tekela ku hanya! I wa nga ha fangi tlhelo ga miri. Makunu i wa zi kota ku yima a tlhela a famba ha yece. Lava va nga wona xihlamaliso lexo va lo hlamala nguvu. Wutomini gabye va wa nga se tshuka va wona nchumu wo kota lowo! Va lo dumisa Jehova hi kota ya lezi a nga va nyika Mugonzisi wa Hombe, loyi a nga zi kota a ku va hanyisa mababyi. — Marku 2:1-12.

Hi gonza yini ka xihlamaliso lexi? — Hi gonza lezaku Jesu i na ni ntamu wa ku tsetselela zionho ni wa ku hanyisa vanhu va babyako. Kanilezi, hi gonza nchumu wunwani kambe wa lisima nguvu. Hi gonza lezaku a vanhu va babya hi kota ya xionho.

Kota lezi hontlheni hi tshukako hi babya, xana lezo a zi kombi lezaku hontlheni hi vaonhi? —Hi zona, a Biblia gi hi byela lezaku hontlheni hi pswaliwa na hi hi ni xionho. Wa zi tiva ku zi wula kuyini a ku pswaliwa ni xionho? — Lezo zi wula ku hi pswaliwa na hi nga mbhelelangi. A zikhati zinwani ha maha zilo za kubiha, hambu loku hi nga zi lavi. Wa zi tiva ku zi mahisile kuyini a kuza hontlheni hiva ni xionho? —

Hi pswalilwe na hi hi ni xionho hi kota ya lezi a munhu wo sangula, Adamu, a nga kala ku ingisa Nungungulu. I lo onha a xikhati lexi a nga tsika ku ingisa a nayo wa Nungungulu. Niku Adamu i hi thapelisile xionho hontlheni. Wa zi tiva ku zi mahisile kuyini? Nyima nzi ku tlhamusela hi ndlela ya kuva u zi kota a ku zi zwisisa.

Kuzilava wa tshuka u wona munhu na a woca tipawa lomu ka pani. Zini zi to humelela a pawa yinwe ni yinwani loku a pani gi phatekile? Wa zi tiva ke? — A kuphateka loko ku ta woneka ka tipawa tontlhe ti wocilweko lomu ka pani lego, a hi zona? —

Adamu i wa fana ni pani lego, niku hina hi fana ni tipawa. I lo maha munhu a nga mbhelelangiko a xikhati lexi a nga kala ku ingisa Nungungulu. Zi wa fana ni loku a tekele kuphateka, kutani kungambheleli. Makunu a xikhati lexi a nga wa tava ni vana, va wa ta tshamisa kuyini? — A vana vakwe vontlhe va wa tava ni kuphateka loko kutani kungambheleli.

A vanana vo tala a va pswaliwi ni kungambheleli ka hombe ka kuza u ku wona. A va kiyelelwi hi woko kutani nenge. Kanilezi, a kungambheleli loku va nga nako ka hombe nguvu laha ka kuza va gumesa va babya, va tlhela vafa hi kufamba ka xikhati.

Kota lezi hi zi tivako a vanhu vo kari va tshama hi ku babya a ku hunza vanwani. Hikuyini zi tshamisileko lezo? Ku ngava lezaku va no pswaliwa na va hi ni zionho zo tala? — Ahihi. Hontlheni hi pswaliwa na hi hi ni xionho xo fana. Hontlheni hi pswaliwa na hi nga mbhelelangi. Hikwalaho, hi kugumesa a vanhu vontlhe va kuma a mababyi yo kari. Hambu lava va ingisako a milayo yontlhe ya Nungungulu va tlhela va nga mahi zilo za kubiha nguvu va nga tshuka va babya.

Makunu, hikuyini a vanhu vo kari va tshamako hi ku babya a ku hunza vanwani? — Ku na ni zigelo zo tala. Kuzilava a va na zakuga zo enela. Kutani kuva va ngagi zakuga za zi nene. Kuzilava vaga nguvu a tikofeti ni mabholo. A xigelo xinwani ku ngava lezaku vo hlwela nguvu ku etlela ni wusiku zonake va nga etleli zi enela. Kutani ku va tolovela a ku va nga bohi tinguwo to kufumela loku ku titimela. A miri wa vanhu vanwani a wu tiyangi, a wu zi koti ku hlula mababyi, hambu loku va zama ku ti hlayisa khwatsi.

Xana ku tava ni xikhati lexi hontlheni hi to kala hi nga babyi? Hi ta tshuka hi tlhatlhiswa ka xionho? — Zini lezi Jesu a nga mahela wanuna gayani a nga file reve ga miri? — Jesu i lo mu tsetselela zionho zakwe a tlhela a mu hanyisa. Hi ku maha lezo, Jesu i lo komba lezi a to mahela vanhu vontlhe va ti karatelako ku maha za zi nene.

Loku hi komba lezaku a hi zi lavi a ku onha, hi tlhela hi venga za kubiha, Jesu i ta hi hanyisa xikhatini xi tako a tlhela a hi susela a kungambheleli loku hi nga nako. I ta maha lezo kota Hosi ya Mufumo wa Nungungulu. A nga ta susa xionho xontlhe hi khati ginwe. Zi ta teka xikhati xo kari. Zonake loku a xionho xa hina xi mbhelile, hi nga ta ha babya kambe. Hontlheni hi tava ni wutomi go mbhelela. Hi nga alakanyela lezi zi to tsakisisa zona a ku hanya ka xikhati lexo!