U nga tshuki u yiva!

I KONA a nga tshuka a ku yivela nchumu? — U ti zwisile kuyini hi kota ya lezo? — Ni wihi a yivako i khamba, niku i hava a tsakelako khamba. U alakanya lezaku zi mahisa kuyini a kuza a munhu a maha khamba? Xana i no pswaliwa na a hi khamba? —

Hi sina hi gonzile lezaku a vanhu va pswaliwa na va hi ni xionho. Hikwalaho, hontlheni a hi mbhelelangi. Kanilezi i hava a pswaliwako na a hi khamba. Za tshuka zi humelela a ku a munhu a nga ka ngango wu nga ni mahanyela ma nene a maha khamba. Za koteka ku a vapswali ni vamakabye vakwe va hi vanhu vo tsumbeka. Kanilezi, loku a munhu a sangula ku navela zilo zo kota mali ni lezi zi xaviwako hi mali zi nga mu maha a yiva.

U alakanya lezaku himani a khamba go sangula? — A hi ehlekete hi zona. Mugonzisi wa Hombe i tivile a munhu loye a xikhati lexi a nga hi le tilweni. A khamba lego gi wa hi ngelosi. Kanilezi, kota lezi Nungungulu a nga maha tingelosi tontlhe na ti mbhelele, zi mahisile kuyini a kuza a ngelosi leyo yi maha khamba? — Kota lezi hi gonzileko ka Xipimo 8 xa bhuku legi, a ngelosi leyo yi lo navela nchumu wu nga kala wu nga hi wa yona. Wa wu alakanya a ku i nchumu muni walowo? —

Anzhako ka kuva Nungungulu a mahile a wanuna wo sangula ni wasati wo sangula, a ngelosi leyo yi lo lava lezaku va yi khozela. Yi wa nga hi na fanelo ya ku khozelwa. Va wa fanele ku khozela Nungungulu ntsena. Kanilezi yi lo yiva a fanelo leyo! Hi kuva yi mahile Adamu na Eva va khozela yona, a ngelosi leyo yi lo maha khamba. Yi lo maha Satani Diabolusi.

Xini xi mahako munhu a maha khamba? — Kunavela nchumu wu kalako wu nga hi wa yena. A kunavela loko ku nga kula laha ka kuza ni vanhu va va nene va maha zilo za kubiha. A zikhati zinwani, a vanhu lavo va mahako makhamba a va ha cici va maha za zi nene. A munwe wa vona ku vile mupostoli wa Jesu. A vito gakwe hi Judasi Iskarioti.

Judasi i wa zi tiva lezaku zi bihile a ku yiva hakuva i wa gonzisilwe nayo wa Nungungulu a xikhati lexi a nga hi mufanyana. I wa zi tiva lezaku Nungungulu i wa tshukile a wulawula na a hi le tilweni a byela vanhu vakwe aku: “U nga yivi.” (Eksodusi 20:15) A xikhati lexi Judasi a nga kula, i lo kumana na Mugonzisi wa Hombe, zonake a maha mupizani wakwe. Hi ku famba ka xikhati, Jesu i lo hlawula Judasi kota munwe wa vapostoli vakwe va 12.

Jesu ni vapostoli vakwe va wa enza zinwe. Va waga zinwe a zakuga zabye. Niku a mali yontlhe va nga hi nayo va wa chela lomu ka kaxa ginwe. Jesu i lo nyikela a kaxa lego ka Judasi lezaku ava muhlayisi wa gona. Hi lisine, a mali yi nga hi lomo yi wa nga hi ya Judasi. Hambulezo, wa zi tiva a ku zini lezi Judasi a nga maha hi ku famba ka xikhati? —

Judasi i lo sangula ku teka mali lomu ka kaxa na a nga vumelelwangi. I wa teka mali a xikhati lexi a vanwani va nga kala va nga mu woni, niku i lo tlhela a lava tindlela tinwani ta ku kuma mali yo tala. I lo sangula ku tshama hi ku alakanyela mali. A hi wone lezi a kunavela loko ka hava ku nga mu kuca ku maha laha ku nga kiyela masiku matsongwani kasi Mugonzisi wa Hombe a dawa.

Maria, a makabye wa Lazaru, loyi a nga hi munghana wa Jesu, i lo teka a mafura yo kari ya ma nene nguvu a ma chela mikonzweni ya Jesu. Lezo a zi mu tsakisangi Judasi. Wa zi tiva ku hikuyini? — I wulile lezaku a mafura lawo na ma xavisilwe zonake a mali ya kona yi nyikelwa ka zisiwana. Kanilezi, i wa lava lezaku ku nghena a mali yo tala lomu ka kaxa kasi a yiva. — Johani 12:1-6.

Jesu i lo byela Judasi lezaku i wa nga faneli ku sola Maria, hakuva i wa mahile zilo za zi nene nguvu. A xikhati lexi Judasi a nga byeliwa lezo hi Jesu a zi mu tsakisangi. Hikwalaho, i loya ka varangeli va vapristi lava va nga venga Jesu. Va wa lava ku khoma Jesu, kanilezi va wa lava ku mu khoma ni wusiku kasi va nga woniwi hi vanhu.

Judasi i lo byela vapristi aku: ‘Nzi ta mu byela lezi mu nga mu khomisako zona Jesu loku mu nzi nyika mali. Mu ta nzi nyika mali muni?’

A vapristi va lo hlamula vaku: ‘Hi ta ku nyika 30 wa zingerengere za siliva.’ — Mateu 26:14-16.

Judasi i lo teka mali leyo. Zi wa fana ni ku xavisa Mugonzisi wa Hombe ka vavanuna lavo! Wa zi wona a ku lezo a zi ringani ku mahiwa hi munhu? — Hi zalezo zi mahekako loku a munhu a maha khamba a tlhela a yiva mali. I ranza nguvu mali ku hunza vanhu hambu na Nungungulu.

Kuzilava u nga wula ku, ‘a nzi nge tshuki nzi ranza nchumu ku hunza Jehova Nungungulu.’ Zi nene a ku ti zwisa lezo. Kuzilava a xikhati lexi Jesu a nga mu hlawula lezaku a maha mupostoli wakwe yenawu Judasi i wa ti zwisa zalezo. A vokari lava va nga maha makhamba, kuzilava vonawu va wa ti zwisa lezo. A hi wulawule hi vokari.

A munwe wa vona i wa hi nanza ga Nungungulu, a vito gakwe hi Akana, loyi a nga hanya ka xikhati xa kale nguvu Mugonzisi wa Hombe na a nga se pswaliwa. Akana i lo wona nguwo, ni muhono wa nzalama, ni mali yo kari ya nzalama. Zi wa nga hi za yena. A Biblia gi wula lezaku zi wa lumba Jehova hakuva zi wa tekilwe ka valala va vanhu va Nungungulu. Kanilezi, Akana i wa zi lava nguvu laha ka kuza a zi yiva. — Joxua 6:19; 7:11, 20-22.

A xikombiso xinwani hi lexi. Xikhatini xa kale nguvu, Jehova i lo hlawula Davida lezaku a maha hosi ya vaIsraeli. Ka siku go kari, Davida i lo wona Batexeba a nga hi wasati wo saseka. I lo simama ku cuwukisela Batexeba a tlhela a alakanyela ku mu teka a maha sati wakwe. Hambulezo, i wa hi sati wa Uria. Zini lezi Davida a nga fanele ku maha? —

Davida i wa fanele ku tsika ku alakanyela ku teka Batexeba. Kanilezi a nga mahangi lezo. Hikwalaho, Davida i lo mu teka ata laha kaya kakwe. Anzhako ka lezo, i lo maha malulamiselo ya lezaku Uria a dawa. Hikuyini Davida a nga maha zilo lezo za kubiha? — I mahile lezo hi lezi a nga tshama a alakanyela ku teka sati wa vambe. — 2 Samueli 11:2-27.

Kota lezi Davida a nga ti sola Jehova i lo mu tsika a hanya. Kanilezi, kusukela kwalaho Davida i lova ni zikarato zo tala. A n’wana wakwe Absalome i lo lava ku mu tekela wuhosi. Hikwalaho, a xikhati lexi a vanhu va nga kari vata kasi va ta wonana na Davida, Absalome i wo va angarela a va pswopswa. A Biblia gi ngalo: ‘Absalome i lo yiva timbilu ta vanhu va ka Israeli.’ I lo maha vanhu va lava yena kota hosi wutshanwini ga Davida. — 2 Samueli 15:1-12.

Wa tshuka u lava nguvu a nchumu wo kari, a ku fana na Akana, na Davida, na Absalome ke? — Loku a nchumu lowo wu lumba munhu munwani, loku u teka na u nga nyikiwangi wo yiva. Wa zi alakanya lezi Satani, a khamba go sangula, a nga zi lava? — I wa lava lezaku a vanhu va khozela yena va tsika ku khozela Nungungulu. Hikwalaho, Satani i wo yiva a xikhati lexi a nga maha Adamu na Eva lezaku va ingisa yena.

Loku a nchumu wu lumba munhu wo kari, a nwinyi wa kona hi yena a faneleko ku wula lezaku himani a faneleko ku wu tirisa. Hi xikombiso, kuzilava u nga tshuka u ya hlakana laha kaya ka vanana vo kari. Xana zi wa tava zi nene a kuva u teka a zilo zo kari u tlhela nazo kaya? — Zi wa nga tava zi nene loku u nga nyikiwangi hi papai kutani mamani wabye. Loku u teka nchumu wo kari na u nga kombelangi u famba nawo kaya, lezo kuyiva.

Xini xi nga mahako lezaku u ringiwa ku yiva? — Lezo zi nga maheka loku u lava nchumu wo kala wu nga hi wa wena. Hambu loku a vanhu vanwani va nga ku woni a xikhati lexi u tekako, himani a ku wonako? — Ina, hi Jehova Nungungulu. Niku hi fanele ku alakanya lezaku Nungungulu wa ku venga a kuyiva. Hikwalaho, loku hi ranza Nungungulu ni vaakelani va hina hi nga ta tshuka hi yiva.