Lezi Jesu a nga vikeliswa zona

KA ZIKHATI zinwani Jehova wa maha zilo hi ndlela yo hlamalisa kasi ku vikela a vanana ni lava va kalako va nga zi koti ku ti vikela ha voce. Loku u kari u famba lomu khwatini, u nga wona lezi Jehova a mahisako zona lezo. Kanilezi, kusanguleni kuzilava a wu nge zi zwisisi lezi zi mahekako.

U nga wona a xinyanyani xi nga laha kusuhani na wena. Xi wonekisako ku khwatsi xi no bayisiwa. Xi sangula ku koka lipapa la xona lahasi xi tlhela xi tsutsumanyana a xikhati lexi u xi tshinelelako. Laha u yako u xi tshinelela, xi famba a pfhuka waku u nga xi khomi. Zonake hi xitshuketi xi puruma. A tipapa ti wa nga bayisiwangi! Wa zi tiva a ku hikuyini a xinyanyani xi mahileko lezo? —

Laha kusuhani ni laha xi nga hi kona, xi wa fihlile a mavinyani ya xona lomu ka makhuhu. A mamani wa mavinyani lawo i wa chava lezaku u nga ma kuma zonake u ma bayisa. Hikwalaho, a xinyanyani lexo xi lo mahisa ku khwatsi xi no bayisiwa kasi xi ku yisa kule ni mavinyani. Wa zi tiva ku himani a nga hi vikelako a ku fana ni lezi a mamani wa mavinyani a ma vikelisako zona? — Lomu ka Biblia, Jehova i fananiswa ni xinyanyani xi vitaniwako ku i gama, lexi xi vunako a mavinyani ya xona. — Deuteronome 32:11, 12.

A N’wana wa Jehova loyi a mu ranzako nguvu, hi Jesu. A xikhati lexi Jesu a nga hi le tilweni, i wa hi munhu wa moya wa ntamu, a ku fana ni Papai wakwe. I wa zi kota ku ti khatalela ha yece. Kanilezi, a xikhati lexi Jesu a nga pswaliwa kota xinwanana laha misaveni, i wa nga zi koti ku ti vikela ha yece. I wa lava ku vikelwa.

Kasi a maha lezaku a kuranza ka Nungungulu ku maheka laha misaveni, ku wa laveka lezaku Jesu a maha wa hombe a tlhela ava wo mbhelela. Kanilezi, na zi nga se maheka lezo, Satani i lo zama a ku daya Jesu. Lezi a nga maha kasi ku daya Jesu a xikhati lexi a nga hi nwanana, ni tindlela leti Jehova a nga ti tirisa kasi ku vikela Jesu zi maha a matimu yo tsakisa nguvu. Wa zi lava ku tiva lezi a matimu lawo ma wulawulako hi zona? —

Xikhatanyana nzhako ka kuva Jesu a pswalilwe, Satani i lo maha lezaku ku woneka nchumu xo kari le tilweni xo khwatsi i nyeleti le Mutsuwuka-gambo. A vavanuna vo kari va nga vitaniwa ku titlhari, lava va nga gonza a tinyeleti, va lo lanzelela a nyeleti leyo hi pfhuka wo leha kala Jerusalema. A xikhati lexi va nga chikela leyo va lo wutisa a vavanuna vo kari va nga kari va gi tiva khwatsi a Biblia lezaku hi kwihi lomu a hosi ya vaJuda yi to pswaliwa kona. A vavanuna lavo va lo hlamula vaku: “Hi le Betlehema.” — Mateu 2:1-6.

Hi nzhako ka xikhati, Herodi a hosi yo biha ya le Jerusalema, i lo tiva lezaku ku pswalilwe a hosi ya yiswa le Betlehema gi nga hi doropa ga laha kusuhani, zonake a byela a titlhari leto aku: ‘Fambani mu ya mu lava khwatsi a nwanana loye; loku mu mu kumile, wuyani mu ta nzi byela.’ Wa zi tiva ku hikuyini Herodi a nga lava ku tiva lomu a nga hi kona Jesu? — Hi lezaku Herodi i wa chava ku tekelwa wuhosi, hikwalaho i wa lava ku daya Jesu!

Xana Nungungulu i mu vikelisile kuyini a N’wana wakwe? — A xikhati lexi a titlhari leto ti nga kuma Jesu, ti lo mu nyika zinyikiwo. Hi nzhako ka xikhati, Nungungulu i lo byela titlhari leto hi lomu ka noro lezaku ti nga ha tlheli ka Herodi. Hikwalaho, ti lo tlhela kaya hi ndlela yinwani, ti nga ha hunzi hi le Jerusalema. A xikhati lexi Herodi a nga tiva lezaku a titlhari leto ti tlhelile, i lo zangara nguvu. Na a zama ku daya Jesu, Herodi i lo laya lezaku ku dawa vanana vontlhe va vafana va le Betlehema lava va nga kala va nga se tlhanganisa malembe mambiri! Kanilezi ka xikhati lexo, Jesu i wa nga ha hi kona.

Wa zi tiva ku Jesu i ponisile kuyini? — A xikhati lexi a titlhari leto ti nga tlhela kaya, Jehova i lo tlharihisa Josefa a nuna wa Maria, lezaku va tsutsuma vaya Gipite. Leyo, Jesu i wa nga ta mahiwa nchumu hi hosi yo biha Herodi. Loku ku hunzile malembe yo kari, a xikhati lexi Maria na Josefa va nga wuya na Jesu hi le Gipite, Nungungulu i lo mu nyika xitlharihiso xinwani Josefa. I lo mu byela lomu ka noro lezaku aya le Nazareta, hakuva leyo Jesu i wa nga ta mahiwa nchumu wo biha. — Mateu 2:7-23.

U zi wonile lezi Jehova a nga vikelisa zona a N’wana wakwe? — U alakanya ku himani a fanako ni mavinyani lawa ma nga fihlilwe hi mamani wa kona kutani a fanako na Jesu a xikhati lexi a nga hi nwanana? A hi wena ke? — Ku na ni vanhu va lavako ku ku maha za kubiha wenawu. Wa va tiva ku hi vamani? —

A Biblia gi wula lezaku Satani i fana ni nghala yi bhongako yi lavako ku higa. A ku fana ni lezi a tinghala ti tolovelako ku hlota zihari za zitsongwani, Satani ni madimoni yakwe vonawu va tolovela ku hlota vanana. (1 Pedro 5:8) Kanilezi, Jehova i na ni ntamu wa hombe ku hunza Satani. Jehova a nga vikela a vanana lava va mu tirelako a tlhela a va tlhatlhisa ni ka xihi xo biha lexi Satani a va mahelako.

Wa ha zi alakanya lezi hi nga gonza lomu ka Xipimo 10 xa bhuku legi, lezi Diabolusi ni madimoni yakwe va lavako ku hi kurumeta ku maha? — Ina, va zama ku hi maha hi hlengela masango lawa Nungungulu a wulako lezaku ma bihile. Kanilezi, hi vamani lava va faneleko ku hlengela masango? — Ina, vanhu vambiri va hombe, ku nga wanuna ni wasati va chadileko zinwe.

Hambulezo, a ya kubiha hi lezaku a vanhu vo kari va hombe va ranza ku hlengela masango ni vanana. Hi kota ya lezo a zifanyana ni zinhanyatana zo kari zi nga sangula ku maha zilo za kubiha hi kota ya lezi va zi gonzileko ka vanhu lavo va hombe. Va tlhela va sangula ku tirisa a ziro zabye za wubeleki hi ndlela ya hava. Hi zalezo zi humeleleko xikhatini xi hunzileko le doropeni ga Sodoma. A Biblia gi wula lezaku a vanhu va le doropeni lego, a “vatsongwani ni vahombe,” va lo zama ku hlengela masango ni vavanuna va nga enzele Loti. — Genesisi 19:4, 5.

Hikwalaho, a ku fana ni lezi Jesu a nga lava ku vikelwa, wenawu u fanele ku vikelwa ka vanhu va hombe — ni ka vanana vanwani — lava va zamako ku hlengela masango na wena. A vanhu lavo, va tolovela ku ti maha ku khwatsi vanghana va wena. Va nga ha ku nyika zilo loku u va tsumbisa lezaku u nga ta byela munhu lezi va lavako ku ku maha. Kanilezi a vanhu lavo, va tatisa kunavela kabye, a ku fana na Satani ni madimoni yakwe, va lava ku ti tsakisa ntsena. Niku va zama ku tatisa kunavela kabye hi ku hlengela masango ni vanana. Lezo zi bihile nguvu!

Wa zi tiva a ku zini va tshukako va maha kasi ku ti tsakisa? — Va nga zama ku khomakhoma ziro za wena za wubeleki. Kutani ku tshuka va tlhanganyisa a ziro zabye za wubeleki ni lezi za wena. Kanilezi, u nga tshuki u tsika munhu a hlakana hi ziro za wena za wubeleki. Kani makabye wa wena kutani mamani wa wena, hambu papai wa wena u nga va tsiki va hlakana hi zona. A ziro lezi za miri wa wena a hi zo hlakana hi zona.

U nga wu vikelisa kuyini a miri wa wena ka vanhu va mahako zilo zo biha zo fana ni lezo? — Xo sangula, u nga tsiki munhu a hlakana hi ziro za wena za wubeleki. Loku a wokari a zama ku hlakana hi zona, mu byele lezi hi kutiya hi gezu go tlakuka: “Nzi tsiki! Nzi lava ku ku wuleta!” Loku aku hi wena u nga ni nanzu wa lezi a ku mahileko, u nga vumeli. O hemba. Kani hi mani a ku mahileko lezo, famba u ya mu wuleta! U fanele ku byela wokari hambu loku a wula lezaku lezi mu zi mahako xihundla xa nwina va vambiri. Hambu loku a munhu loye a tsumbisa ku ku nyika zilo zo saseka kutani ku ku dzukisela, suka hi ku tsutsuma u ya mu wuleta.

U nga hanyi na u chava, kanilezi u fanele ku ti wonela. Loku a vapswali va wena va ku byela lezaku u ti wonela a vanhu vo kari kutani ka matshamu yo kari, u fanele ku ingisa. Loku u ingisa, u ta pona ku mahiwa za hava hi vanhu vo biha.