Ximaho xa ku alakanya Jehova ni N’wana wakwe

LOKU a wokari i wo ku nyika xinyikiwo xa xi nene, u wa ta ti zwisa kuyini? — U wa ta wula ku nzi bongile, u gumesa u rivakelwa a munhu loyi a ku nyikileko a xinyikiwo lexo? Kutani u wa ta alakanya a munhu loye ni zontlhe lezi a ku maheleko? —

Jehova Nungungulu i hi nyikile a xinyikiwo xa xi nene nguvu. I lo rumela N’wana wakwe laha misaveni kasi a ta hi fela. Wa zi tiva ku hikuyini Jesu a nga fanele ku hi fela? — Lezo zilo za lisima nguvu lezi hi faneleko ku zi zwisisa.

Kota lezi hi gonzileko ka Xipimo 23, Adamu i lo onha a xikhati lexi a nga tsika ku ingisa a nayo wa Nungungulu. Niku hina hi kumile xionho ka Adamu a papai wa hina hontlheni. Makunu u alakanya lezaku zini hi zi lavako? — Hi ndlela yo fananisa, hi lava a papai wa muswa, loyi a nga hanya laha misaveni kota munhu wo mbhelela. U alakanya lezaku ku ngava mani a papai loye? — Hi Jesu.

Jehova i lo rumela Jesu lezaku ata laha misaveni, kasi a tava papai wa hina wutshanwini ga Adamu. A Biblia gi ngalo: “A munhu wo sangula, Adamu, i lo maha muhefemulo wu hanyako. Na Adamu wo gumesa i lo maha a moya wu hanyisako.” Himani Adamu wo sangula? — Hi zona, hi loyi Nungungulu a nga mu vanga hi ntshuri wa misava. Makunu himani Adamu wa wumbiri? — Hi Jesu. A Biblia gi komba lezo laha gi wulako lezi: “A munhu wo sangula, [Adamu], i huma hi laha misaveni niku i mahilwe hi ntshuri; Adamu wa wumbiri [Jesu], i huma hi le tilweni.” — 1 Va Le Korinte 15:45, 47, NM; Genesisi 2:7.

Kota lezi Nungungulu a tekileko wutomi ga Jesu hi le tilweni a gi chela lomu nzeni ka Maria, Jesu a nga thapelwangi hi xionho xa Adamu. Hi lezo zi nga maha ku Jesu ava munhu wo mbhelela. (Luka 1:30-35) Hi zalezo kambe zi nga maha a ngelosi yi byela a varisi a xikhati lexi Jesu a nga pswaliwa yiku: “Hi lezaku nyamutlha mu belekelwe a muhanyisi.” (Luka 2:11) Kanilezi kasi ava Muhanyisi wa hina, zini lezi a nwanana loyi, Jesu, a nga fanele ku ranga a zi maha? — I wa fanele ku kula a maha munhu wa hombe, a ku fana na Adamu. Hi kona makunu Jesu a nga wa ta maha ‘Adamu wa wumbiri.’

Jesu, a Muhanyisi wa hina, i ta maha ‘Papai wa hina wa Pinzukelwa’ kambe. A Biblia gi mu vitanisa lezo. (Isaya 9:6, 7) Ina, Jesu a munhu wo mbhelela, a nga maha papai wa hina, a valeta Adamu, loyi a nga onha zonake ava munhu a nga mbhelelangiko. Hi ndlela leyo, hi nga hlawula ‘Adamu wa wumbiri’ kota papai wa hina. Kunene, a hi rivali lezaku Jesu wutsumbu i N’wana wa Jehova Nungungulu.

Loku hi lava lezaku Jesu ava Muhanyisi wa hina, ku laveka lezaku hi gonza zokari xungetano hi yena. Wa ha zi alakanya a ku hi lava ku tlhatlhiswa ka yini? — Ina, hi lava ku tlhatlhiswa ka xionho ni kufa, lezi hi zi kumileko ka Adamu. A wutomi go mbhelela legi Jesu a gi nyikeleko hi kota ya hina, gi vitaniwa a ku i nzhiho. Jehova i humesile a nzhiho kasi hi tsetselelwa a zionho za hina. — Mateu 20:28; Va Le Roma 5:8; 6:23.

Hi lisine, a hi lavi ku rivakelwa lezi Nungungulu ni N’wana wakwe va nga hi mahela, a hi zona? — Jesu i lo va nyika zileletelo a vapizani vakwe xungetano hi ximaho xo kari xi hi vunako ku alakanya lezi a zi mahileko. A hi wulawule hi ximaho lexo.

Ti alakanye na u hi lomu ka yindlu yo kari le Jerusalema. Gi wa hi wusiku. Jesu i wa tshamile ni vapostoli vakwe laha mezeni. Laha ka meza leyo, ku wa hi ni yivu yi wocilweko, tipawa to kari, ni vinya go pswhuka. Va wa hi laha kugeni ko hlawuleka. Wa zi tiva a ku hikuyini? —

Va waga zilo lezo kota ndlela ya ku alakanya lezi Jehova a nga zi mahile ka xikhati xa kale nguvu, a xikhati lexi a vanhu vakwe, a vaIsraeli, va nga hi tikhumbi le Gipite. Xikhatini lexo Jehova i wa byelile a vanhu vakwe aku: ‘A ngango ni ngango wu fanele ku daya a yivana, zonake va teka a nkhata wa kona va totela timhanze ta laha nyangweni ya tiyindlu tabye.’ A tlhela aku: ‘Nghenani lomu tindlwini ta nwina, zonake muga a yivana.’

A vaIsraeli va lo maha lezo. Niku ka wusiku galego, a ngelosi ya Nungungulu yi lo hunza hi lomu tikweni ga Gipite. Ka tiyindlu to tala, a ngelosi yi lo daya a n’wana wa matewula. Kanilezi, ka yindlu leyi a ngelosi leyo yi nga kari yi wona a nkhata wa yivana laha nyangweni, yi wo hunza. Ka tiyindlu leto, a ku na nwanana a nga dawa. Faro, a hosi ya Gipite, i lo chava nguvu hi kota ya lezi a ngelosi ya Jehova yi nga mahile. Hikwalaho, Faro i lo byela a vaIsraeli aku: ‘Mu tlhatlhekile ku famba. Humani lomu tikweni ga Gipite!’ Zonake va lo pakela zilo zabye lomu ka makameli ni lomu ka timbongola tabye va famba.

Jehova i wa nga lavi lezaku a vanhu vakwe va rivakelwa lezi a nga va tlhatlhisisa zona. Hikwalaho, i lo wula lezi: ‘Lembe ni lembe, mu fanele kuga zilo zo khwatsi hi lezi mu gileko wusiku legi.’ Va lo vitana a kuga loko ko hlawuleka lezaku i Pasika; hakuva ka wusiku lego, a ngelosi ya Nungungulu a yi nghenangi lomu ka tiyindlu leti ti nga totelwe nkhata. — Eksodusi 12:1-13, 24-27, 31.

Jesu ni vapostoli vakwe va wa alakanya lezo a xikhati lexi va nga maha Pasika. Anzhako ka lezo, Jesu i lo maha zilo za lisima nguvu. Kanilezi na a nga se maha lezo, Jesu i lo ranga hi ku hlongola Judasi loyi a nga hi mupostoli wakwe wo kala kutsumbeka. Jesu i lo teka a pawa yi nga sele a yi khongelela, a gumesa a yi khema a nyika vapizani vakwe, aku: “Tekani, muga.” A gumesa a va byela lezi: ‘A pawa leyi yi wula a miri wa mina lowu nzi to wu nyikela a xikhati lexi nzi tofa hi kota ya nwina.’

Hi kulanzela, Jesu i lo teka a gombe ga vinya yo pswhuka. Anzhako ka kuva a mahile mukhongelo wunwani wa kubonga, i lo va nyika gombe lego aku: “Nwanani nwentlhe ha gona.” A tlhela aku: ‘A vinya legi gi yimela a nkhata wa mina. Lowu nzi to wu halata zalezi kasi mu tsetselelwa zionho za nwina. Mahani lezo kasi ku nzi alakanya.’ — Mateu 26:26-28; 1 Va Le Korinte 11:23-26.

U zi wonile lezaku Jesu i byelile a vapizani vakwe lezaku va fanele ku simama va maha lezo kasi va mu alakanya? — Va wa nga ta ha maha Pasika. Wutshanwini ga lezo, lembe ni lembe va wa tava ni kuga loko ko hlawuleka kasi ku alakanya Jesu ni kufa kakwe. A kuga loko ku vitaniwa a ku Xilalelo xa Hosi. Inyamutlha, hi tolovela ku xi vitana ku Xialakanyiso xa Kufa ka Jesu. Hikuyini? — Hakuva zi hi alakanyisa lezi Jesu ni Papai wakwe, Jehova Nungungulu, va hi maheleko.

A xibaba kutani pawa, xi hi alakanyisa a miri wa Jesu. I lo nyikela a miri wakwe hi kuziranza kasi zi koteka a ku hi kuma wutomi ga pinzukelwa. Ahati a vinya go pswhuka ke, gi hi alakanyisa yini? — Gi fanele ku hi alakanyisa a lisima la nkhata wa Jesu. A nkhata wakwe, wu na ni lisima ku hunza a nkhata wa tiyivu ta Pasika legi gi mahilweko le Gipite. Wa zi tiva a ku hikuyini? — A Biblia gi wula lezaku a nkhata wa Jesu wu nga maha lezaku hi tsetselelwa zionho za hina. Niku a xikhati lexi a zionho za hina zi to susiwa, hi nga ta ha babya, hi nga ta ha khosahala niku hi nga ta hafa. Hi fanele ku alakanya lezo a xikhati lexi hi nga Xialakanyisweni xa Kufa ka Jesu.

Xana a vanhu vontlhe va fanele kuga xibaba ni kunwa vinya a xikhati va nga Xialakanyisweni xa Kufa ka Jesu ke? — Jesu i byelile lava va nga kari vaga ni kunwa aku: ‘Mu tava ziro za mufumo wa mina; mu ta tshama zitshanwini za wuhosi le tilweni na mu hi zinwe na mina.’ (Luka 22:19, 20, 30) Lezo zi wula ku va wa taya le tilweni va ya maha tihosi zinwe na Jesu. Hikwalaho, ntsena lava va rinzelako a ku ya fuma zinwe na Jesu le tilweni hi vona va faneleko kuga xibaba ni kunwa vinya.

Kanilezi, hambu lava va kalako kuga a xibaba kutani kunwa vinya, va fanele kuva kona Xialakanyisweni xa Kufa ka Jesu. Wa zi tiva a ku hikuyini? — Hakuva Jesu i nyikele wutomi gakwe hi kota ya hinawu. A xikhati lexi hi yako Xialakanyisweni xa kufa ka Jesu, hi komba lezaku a hi zi rivakelwangi lezi a hi maheleko. Ha xi alakanya a xinyikiwo xa xi nene nguvu lexi Nungungulu a hi nyikileko.