Lomu Ndlwini Ya Le Hehla

I SIKU ga Wumune ni wusiku makunu, anzhako ka masiku mambiri. Jesu ni vapostoli vakwe va 12 va tile ka yindlu leyi ya hombe ya le hehla a ku taga a Pasika. A wanuna gayani u mu wonako na a huma hi Judasi Iskarioti. Yena iya a ya byela vapristi lezi va to zi kota ku khomisa zona Jesu.

Hi tolo wa kona, Judasi i yile kabye a ya va wutisa ku ngalo: ‘Mu ta nzi nyika yini loku nzi mu vuna a ku khoma Jesu ke?’ Vona vaku: ‘Makume manharu ya zingerengere za siliva.’ Hizalezo Judasi iya a ya tlhangana ni vavanuna lavo makunu lezaku a va yisa ka Jesu. A zi bihangi lezo?

A kuga ka Pasika ku gumesile. Kanilezi Jesu i sangula a kunwani kuga ko hlawuleka makunu. Yena i nyika a xibaba ka vapostoli vakwe aku: ‘Ganani, hakuva lexi xi yimela a miri wa mina lowu wu ta nga nyikelwa nwina.’ Zonake a va nyika a gombe ga vinya aku: ‘Nwanani, hakuva gona gi yimela a nkhata wa mina, lowu wu ta nga halatelwa nwina.’ A Biblia gi vitana a kuga loko ku ngalo ‘xilalelo xa Hosi.’

A vaIsraeli va waga a Pasika lezaku va alakanya a xikhati lexi a ngelosi ya Nungungulu yi ‘hunzileko’ a tiyindlu tabye le Gipite, kanilezi yi daya a matewula lomu tindlwini ta vaGipite. Kanilezi Jesu i lava lezaku a valanzeli vakwe va alakanya yena makunu, ni lezi a nga nyikelisa zona a wutomi gakwe ha vona. Niku hi zalezo zi mahako lezaku yena a va laya akuva va alakanya a kuga loko ko hlawuleka lembe ni lembe.

Anzhako ka kuva va gile a Xilalelo xa Hosi, Jesu i byela vapostoli vakwe lezaku va tiya-hlana ni ku tiya kukholweni. Hi kugumesa, vona va yimbelela tisimu ka Nungungulu zonake va suka va famba. Wusiku nguvu makunu, kuzilava lomu ka phinzulani. A hi woneni lomu va yako kona.