Jesu na a hi kusuhani ni kuga Phasika go gumesa

Jesu i no mbheta ku gondzisa vapizani vakwe va 4 laha Citsungeni ca maOlivha, laha a nga hlamula ciwutiso cabye ci nga yelana ni kuva kona kakwe ni kugumesa ka tiko legi go biha.

Hakunene, ka siku lego ga 11 ka Nisani, Jesu i tirile yi nga chayi! Makunu laha va nga kari va tlhela Bhetaniya ni wusiku, zvi wonekisa ku Jesu i byelile vapostoli vakwe aku: “Ma zvi tiva lezvaku loku ku hundzile masiku mambiri, a Phasika yi tava kona, zvonake a N’wana wa munhu i ta nyikelwa a kuva a belelwa.” — Matewu 26:2.

Ka siku lego ga Wazibili, 11 ka Nisani, Jesu i wa kawukile varangeli va wukhongeli a tlhela a paluxa wufarisi gabye laha ko tala vanhu. Makunu va wa hi lomu ko mu hlota kasi va mu daya. Hikwalaho, zvi wonekisa ku i tshamile siku gontlhe ga Wazithathu, 12 ka Nisani, na a hi ni vapostoli vakwe basi. A nga humangi laha kubaseni hakuva i wa nga lavi ku tsandzeka kuga Phasika ni vapostoli vakwe na go phum hi 14 ka Nisani.

Kanilezvi, na ku nga se giwa Phasika, a vapristi va hombe ni madhota va wa ngagi gi relela. Va no ya tlhangana le kaya ka mupristi wa hombe wa ku hi Kayafasi. Va maha yini? Va luka mano ya lezvi va nga wa ta mu phasisa zvona Jesu kasi va mu khoma va mu daya, hakuva va wa zangarile va pswhuka ni matihlo hi lezvi a nga kari a paluxa wubihi gabye. Va no boha siku ni lezvi va nga wa ta mu khomisa zvona, vaku: “Zvi nga mahiwi laha mubuzweni, ku nga vhuka vhilinganya cikari ka vanhu.” (Matewu 26:4, 5) Va wa chava ku khoma Jesu laha ko tala vanhu hakuva a votala va wa mu tsakela.

Na va ha xuxa cikungo cabye, ku no chikela mupfhumba. Laha va nga ku mu cu, ne a va kholwangi lezvi va nga zvi wona! Ku wa hi Judhasi Iskariyoti, a mun’we wa vapostoli va Jesu! Sathani i wa mu kucetele ku a tokometa Hosi yakwe. Judhasi i no va wutisa aku: “Mu ta ndzi nyika yini loku ndzi mu nyikela ka n’wina ke?” (Matewu 26:15) Va no tsaka nguvhu, va se mu byela ku va ta “mu nyika mali”, a vhumela. (Luka 22:5) I mali muni? Va no mu byela na va tsakile vaku va ta mu nyika 30 wa zvingerengere zva silivha. Kuzvilava a 30 wa zvingerengere lezvo zvi wa hi maxekeli. Leyo yi wa hi mali yo xava cibochwa! (Eksodhusi 21:32) Lezvo zvi kombile lezvi a varangeli va wukhongeli va nga kari va mu chepetisa zvona Jesu — a ka vona, i wa nga vhuni nchumu. Makunu, Judhasi i no sangula ku “lava cikhati co mu nyikela ha cona kabye, na ci nga hi kona cidlemo.” — Luka 22:6.

A 13 ka Nisani i wa sangula hi Wazithathu loku a gambo gi pswitela. Lego give wusiku go gumesa legi Jesu a ngava le Bhetaniya. Ka siku lego ga 13 ka Nisani, va wa fanele ku mbhetisela ku longisela Phasika na gi nga se pswitela. Makunu, va wa ta ya gela kwihi a Phasika? Kona hi vamani va nga wa ta ya longisela va tlhela va lava ciyivhana kasi va daya va woca contlhe na va nga tsemelelangi na ku nga se sangula 14 ka Nisani? Jesu i wa nga se va byela a vapostoli vakwe, hikwalaho Judhasi i wa nga hi na ndlela ya ku byela vapristi va hombe.

Jesu i no ruma Pedro na Johani vaya Jerusalema hi Wazina. Kuzvilava i va rumile zvalezvi ku nga sangula muphindelo. I te: “Fambani, mu ya hi longiselela a Phasika kasi higa.” Vaku: “U lava ku hi ya longisela kwihi?” Jesu a va byela lezvi: “A cikhati mu to nghena lomu dhoropeni, mu ta tlhangana ni wanuna a rweleko cifukwana ca mati. Mu landzeni kala ka muti lowu a to nghena. Byelani a n’winyi wa muti lowo muku: ‘Mugondzisi i te: “Yi kwihi a yindlu ya vapfhumba lomu ndzi to gela kona Phasika ni vapizani va mina?”’ A wanuna loye i ta mu komba a sala ya hombe ya le hehla yi longileko ku tirisiwa. Longiselani lomo.” — Luka 22:8-12, NM.

Zva dlunyateka ku a n’winyi wa muti lowo i wa hi mupizani wa Jesu. Makunu, kuzvilava i wa zvi rindzele ku Jesu a mu kombela ku tirisa yindlu yakwe ka cimaho leco. Laha a vapostoli lavo va nga chikela Jerusalema, zvontlhe zvi mahekisile zvalezvi Jesu a nga va byelisile zvona. Va no ya longisela ciyivhana va tlhela va mbhetisela ku longisela le’zvin’wani zvi nga laveka kasi vontlhe va 13 vaga Phasika — Jesu ni vapostoli vakwe va 12.