Vanana va tsakisileko Nungungulu

U ALAKANYA lezaku himani a nwanana laha misaveni, loyi a mu tsakisileko nguvu Jehova? — Hi zona, i N’wana wakwe, Jesu. A hi wulawule hi zilo zo kari lezi Jesu a zi mahileko kasi ku tsakisa Papai wakwe wa le tilweni.

Jesu ni maxaka yakwe va wa hanya ka pfhuka wo ringana masiku manharu kusukela Jerusalema. Le Jerusalema hi lomu ku nga hi ni tempeli yo saseka ya Jehova. Jesu i lo wula lezaku a tempeli i ‘yindlu ya Papai wa mina.’ Lembe ni lembe yena ni va ngango wabye va waya seyo kasi ku yaga Pasika.

A hi wone lezi zi humeleleko ka lembe go kari laha Jesu a nga hi ni 12 wa malembe. Zalezo ku nga mbhela a Pasika, a ngango wabye wu lo sangula ku teka lipfhumba lo tlhela kaya. Kanilezi, a xikhati va nga nyima ka wutshamu go kari kasi ku etlela, va lo pola lezaku Jesu i wa nga hi kona xikari ka maxaka ni ka vanghana vabye. Hikwalaho, Maria na Josefa va lo tekela ku tlhela le Jerusalema kasi ku ya lavetela Jesu. U alakanya lezaku i wa hi kwihi? —

Va lo kuma Jesu lomu tempeleni, na a ingisela vagonzisi a tlhela a va maha ziwutiso. Niku loku va mu wutisa zokari, Jesu i wo hlamula. Va lo hlamala nguvu hi mihlamulo ya yi nene leyi a nga kari a yi nyikela. Wa zi wona lezaku hikuyini Nungungulu a nga tsaka hi N’wana wakwe? —

Hi lisine, a xikhati lexi Maria na Josefa va nga kuma Jesu, a kukarateka kabye ku lo mbhela. Kanilezi, Jesu i wa nga karatekangi. I wa zi tiva lezaku a tempeli ku wa hi wutshamu ga gi nene a ku tshama ka gona. Hikwalaho i lo wutisa lezi: ‘Mu wa nga zi tivi lezaku nzi fanele ku tshama ndlwini ya Papai ke?’ I wa zi tiva lezaku a tempeli i yindlu ya Nungungulu, niku i wa zi tsakela nguvu a ku tshama lomo.

Anzhako ka lezo, Maria na Josefa va lo teka Jesu loyi a nga hi ni 12 wa malembe, lezaku va tlhela naye kaya Nazareta. U alakanya lezaku Jesu i tirisanisile kuyini ni vapswali vakwe? — A Biblia gi wula lezaku “i wa va ingisa.” Ina, i wa maha lezi a vapswali vakwe va nga mu byela, hambu loku ku wa hi ntiro wo fana ni kuya goveni a yakha mati. — Luka 2:41-52.

Makunu hi nga alakanyela lezi: Hambu lezi Jesu a nga hi munhu wo mbhelela, i wa ingisa a vapswali vakwe. Xana lezo zi mu tsakisile Nungungulu? — Hi zona futsi, zi mu tsakisile, hakuva a Mhaka ya Nungungulu yi byela vanana yiku: “Ingisani a vapswali va nwina.” (Va Le Efesusi 6:1) Wenawu u ta tsakisa Nungungulu loku u ingisa a vapswali va wena, a ku fana ni lezi Jesu a nga ingisa a vapswali vakwe.

A ndlela yinwani ya ku tsakisa Nungungulu ku wulawula ni vanwani xungetano hi yena. A vanhu vanwani va nga ha wula lezaku a hi zi nene a ku a vanana va wulawula ni vanwani xungetano hi Nungungulu. Kanilezi, a xikhati lexi a vanhu vo kari va nga zama ku beletela a zifanyana zo kari a ku maha lezo, Jesu i lo wula lezi: ‘A mu se tshuka mu gonza lomu ka Mitsalo lezaku, hi milomu ya zivanana Nungungulu i ta dzunziwa?’ (Mateu 21:16) Hikwalaho loku hi zi lava, hontlheni hi nga bhulela vanwani xungetano hi Jehova ni kuhlamalisa kakwe. Loku hi maha lezo, hi ta tsakisa Nungungulu.

Hi kwihi lomu hi nga gonzako zilo xungetano hi Nungungulu, lezi hi nga bhulelako vanwani? — Hi loku hi gonza a Biblia laha kaya. Kanilezi, hi gonza zilo zo tala ka wutshamu legi a vanhu va Nungungulu va tlhanganako kasi ku gonza. Kanilezi hi nga va tivisa kuyini a vanhu vakwe? —

Zini lezi a vanhu va mahako mitlhanganweni yabye? Xana va gonzisa lezi zi nga lomu ka Biblia hakunene? Va gi gonza va tlhela va bhulisana hi gona? Lezo, hi lezi hi gonzisako zona xungetano hi Nungungulu, a hi zona? — Ka mitlhangano ya wuKristu, hi rinzela kuzwa lezi Nungungulu a wulako, a hi zona? — Kanilezi, ahati loku a vokari vaku a wu faneli ku hanya hi lezi a Biblia gi zi wulako ke? U nga wula lezaku vanhu va Nungungulu valavo? —

Ku na ni nchumu wo kari hi faneleko ku wu alakanya. A Biblia gi wula lezaku a vanhu va Nungungulu va wa ‘ta vitaniwa hi vito gakwe.’ (Mitiro 15:14) Kota lezi a vito ga Nungungulu ku nga Jehova, hi nga wutisa vanhu lezaku xana a Nungungulu wabye hi Jehova ke. Loku va wula lezaku Jehova a hi yena a Nungungulu wabye, hi ta tekela ku zi tiva lezaku vona a hi vanhu vakwe. A vanhu va Nungungulu kambe va bhulela vanwani xungetano hi Mufumo wa Nungungulu. Niku va komba lezaku va mu ranza Nungungulu hi ku hlayisa milayo yakwe. — 1 Johani 5:3.

Loku u tiva a vanhu vo kari va mahako zontlhe lezo, u fanele ku tlhangana navo kasi ku khozela Nungungulu. U fanele ku ingisela khwatsi lezi zi wuliwako mitlhanganweni leyo, u tlhela u hlamula loku ku mahiwa ziwutiso. Hi zalezo Jesu a nga maha a xikhati lexi a nga hi lomu ndlwini ya Nungungulu. Niku loku u maha lezo, u ta tsakisa Nungungulu, a ku fana ni lezi Jesu a nga maha.

Ku na ni vanana vanwani va kumbukiwako lomu ka Biblia u va alakanyako lava va tsakisileko Nungungulu? — Timote, yenawu xikombiso xa hombe. A papai wakwe i wa nga kholwi ka Jehova. Kanilezi a mamani wakwe Eunike, ni kokwani wakwe Loisi, va wa kholwa. Timote i lo va ingisa a tlhela a gonza xungetano hi Jehova.

A xikhati lexi Timote a nga kula, mupostoli Paule i lo enzela a doropa legi va nga tshama ka gona. I lo wona lezi Timote a nga zi lavisa zona a ku tirela Jehova. Hikwalaho, Paule i lo ramba Timote lezaku a maha zilo zo tala ntirweni wa Nungungulu. Kontlhe lomu va nga famba kona, va wa bhulela vanhu xungetano hi Mufumo wa Nungungulu na Jesu. — Mitiro 16:1-5; 2 Timote 1:5; 3:14, 15.

Kanilezi, xana lomu ka Biblia kova ni zikombiso za vafana ntsena va nga tsakisa Nungungulu? — Ahihi. Alakanyela a xinhanyatana xa muIsraeli lexi xi nga tsakisa Nungungulu. Xikhatini xa xinhanyatana lexo, a tiko ga Siria ni tiko ga Israeli ma wa vengana. Ka siku go kari a vaSiria va lolwa ni vaIsraeli va tlhela va khoma xinhanyatana lexo va famba naxo. Xi lo yisiwa mutini wa nduna ya musochwa, a vito ga yona ku wa hi Namani. A xinhanyatana lexo xi lo ya maha xitiri xa sati wa Namani.

Makunu Namani i lova ni mababyi ma vitaniwako ku i hlokonho. A ku na dokodela a nga kari a zi kota ku mu vuna. Kanilezi, a xinhanyatana xa muIsraeli xi wa kholwa lezaku a nanza go kari ga Nungungulu legi gi nga hi muprofeti, gi wa ta zi kota a ku vuna Namani. Hi lisine, Namani ni sati wakwe va wa nga khozeli Jehova. A xinhanyatana lexo xi wa fanele ku va byela lezi xi nga kari xi zi tiva ke? Loku ku wa hi wena na u mahile yini? —

A xinhanyatana lexo xi lo wula lezi: ‘Loku Namani, a hosi ya mina aya ka muprofeti wa Jehova le Israeli, i wa ta hanyiswa a hlokonho yakwe.’ Namani i lo ingisa a xinhanyatana lexo, aya ka muprofeti wa Jehova. A xikhati lexi a nga maha lezi a muprofeti loye a nga mu byela, i lo hanyiswa. Lezo zi lo maha Namani ava mukhozeli wa Nungungulu wa lisine. — 2 Tihosi 5:1-15.

Wa zi lava ku fana ni xinhanyatana xa muIsraeli, u vuna munhu lezaku a gonza zokari xungetano hi Jehova ni lezi a nga ni ntamu wa ku zi maha? — Va kona u alakanyako ku u nga va vuna? — Lisine lezaku kusanguleni va nga zi wonisa ku khwatsi a va lavi ku vuniwa. Kanilezi, u nga bhula navo hi zilo zo saseka lezi Jehova a mahako. Niku kuzilava va nga tshama va ingisela. Handle ko kanakana lezo zi ta mu tsakisa Nungungulu.