Musochwa wa nhenha ni cinhanyetana

Le tikweni ga Siriya, ku wa hi ni cinhanyetana ca muIzrayeli ci nga hi kule nguvhu ni kaya. Ci wa tekilwe kaya ni le maxakeni ya cona hi masochwa ya vaSiriya ci ya maha citiri ca sati wa hosi ya masochwa, yi nga vitaniwa ku hi Namani. A cinhanyetana leco ci wa khozela Jehovha hambu lezvi ci nga hanya cikari ka vanhu va nga kala va nga mu khozeli.

Namani i wa hi ni wubabyi go tshisa nguvhu ga hlonge, niku contlhe cikhati a miri wakwe wu wa tshama hi ku bayisa. A cinhanyetana leco ci wa zvi lava nguvhu ku mu vhuna. Ci no byela sati wakwe, ciku: ‘Ku ni munhu ndzi mu tivako wa ku a nga hanyisa nuna wa wena. Hi Elixa, a muphrofeti wa Jehovha a nga le Izrayeli. A nga zvi kota ku hanyisa nuna wa wena’.

A sati wa Namani i no mu byela lezvi a nga byeliwa hi cinhanyetana leco. Namani i wa ti yimisele ku maha ni cihi ci nga laveka kasi a hanya, hikwalaho i noya kaya ka Elixa le Izrayeli. Namani i wa rindzela ku Elixa a mu amukelisa lezvi a vanhu va lisima nguvhu va nga amukeliswa zvona. Hambulezvo, Elixa a nga humangi a ya wulawula naye kanilezvi i no ruma nandza gakwe ka Namani gi ya mu byela lezvi: ‘Famba le Congweni wa Jordhani u ya hlamba 7 wa makhati. U ta hanya’.

Namani i no swireka nguvhu. Aku: ‘Ndzi wa alakanya ku a muphrofeti loyi i ta khongela ka Nungungulu wakwe, a hundzisa woko gakwe giya seno ni seno, a ndzi hanyisa. Kanilezvi, i ndzi byela ku a ndzi fambe ndzi ya hlamba lomu congweni lowu lomu Izrayeli. Phela le Siriya hi na ni micongo ya yinene nguvhu yo hundza lowu. Hikuyini a nga ndzi rumiko ku ya hlamba kona’? Namani i no zangara nguvhu, a suka laha kaya ka Elixa a famba.

A vatiri va Namani va no mu vhuna ku ava ni mawonela ma nene hi mhaka leyi. Va no mu wutisa, vaku: ‘Kasi wena a wu ti yimiselangi ku maha ni cihi ci lavekako kasi u hanya? Phela lezvi a ku byelako a muphrofeti loyi, a zvi karati. A hi chukwana u vhumela ke’? Namani i no va ingisa. I noya congweni wa Jordhani a ya bhun’wala 7 wa makhati lomu matini. Ka khati ga wu 7, Namani i no huma na a hanyile. I no tsaka nguvhu, a tlhela ka Elixa kasi ku ya mu bonga. Namani i no gumesa a wula lezvi: ‘Makunu ndza zvi tiva lezvaku Jehovha hi yena a nga Nungungulu wa lisine’. U alakanya ku a cinhanyetana ca muIzrayeli ci ti zwisisile kuyini a cikhati leci ci nga wona Namani a wuya na a hanyile wubabyi gakwe?