A Kuxaniseka Kontlhe Ku Laha Kusuhani Ni Ku Mbhela!

Ka xikhati xo kari wutomini ga wena, za koteka ku ngha u ti wutisile ku ngalo, ‘Hikuyini ku nga kona a kuxaniseka kunyingi?’ Hi makume ya mazana ya malembe, a vanhu va xaniseka nguvu hi tiyimpi, wusiwana, timhango, wugevenga, wubihi, mababyi, ni kufa. A zana ga malembe legi ga ha hi ku hunzako give ni kuxaniseka ka hombe a ku hunza wontlhe lawa ma hunzileko. Xana a kuxaniseka kontlhe loko ku ta tshuka ku mbhela?

Za tangalisa a ku tiva lezaku a hlamulo wa kona i ina, niku zi ta maheka lokuloku! A Mhaka ya Nungungulu, a Biblia, yi ngalo: “A wakubiha a nga ta kuva kona . . . Kanilezi lava va rulako va taga tshomba ya tiko, va ta xalaliswa hi kurula ka hombe.” Xana a va kurula va taga tshomba ya tiko kala rini? “A valulamileko va taga tshomba ya tiko, va aka ka gona kala kupinzuka.” — Tisimu 37:10, 11, 29.

Anzhako ka kuva Nungungulu a fuvisile wubihi ni kuxaniseka, a misava yi ta hunzulwa yiva paradise. A xikhati lexo a vanhu va ta zi kota ku hanya kala kupinzuka na va hi ni wutomi go mbhelela ni kutsaka. A Mhaka ya Nungungulu ya wula na ka ha hi mahlweni lezaku: “[Nungungulu] i ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa.” — Kuvululelwa 21:4.

A misaveni leyo ya yiswa, hambu ni lava va fileko va ta wuyisiwa wutomini lezaku va ta buza makatekwa lawo: “Ku tava kona a kuvuka ka valulamileko ni va nga lulamangiko.” (Mitiro 24:​15) Hizalezo zi nga maha Jesu Kristu a byela a wakubiha wo kari loyi a nga ti sola a tlhela a kholwa ka yena lezaku: “U tava na mina Paradiseni.” — Luka 23:43.

Hikuyini Ku Sangulileko Kuva Kona A Kuxaniseka?

Kota lezi Nungungulu a nga lavile lezaku a vanhu vava ni wumanziko lego go tsakisa, hikuyini a vumeleleko lezaku a kuxaniseka kuva kona? Hikuyini yena a vumelelako lezaku ku simama hi xikhati xo leha?

A xikhati lexi Nungungulu a nga vanga Adamu na Eva, i va vangile na va mbhelele mirini ni maalakanyweni. Yena i lo va veka lomu sinwini gi nga hi paradise a tlhela a va nyika ntiro wo tsakisa lezaku va wu maha. A Biblia gi ngalo: “Nungungulu i lo wona zontlhe a nga maha; languta, zi wa sasekile nguvu.” (Genesisi 1:​31) Loku ku wo khwatsi vona va wa ingisile Nungungulu, va wa ta ngha va pswalile vana vo mbhelela, niku a misava yontlhe yi wa tava yi mahile paradise, lomu a vanhu va nga wa ta hanya kona hi kurula ni kutsaka.

Nungungulu i nyikile Adamu na Eva a xinyikiwo xo tsakisa xa kutihlawulela kota tshamela ga vanhu. Vona va wa nga ta fana ni michini yi nga zi kotiko ku ti mahela ziboho. Hambulezo, a kusimama ka litsako labye ku wa khegela kutiriseni ka kutihlawulela kabye hi ndlela yi faneleko — hi ku ingisa a milayo ya Nungungulu. Kota lezi Nungungulu a wulako: “Hi mina Jehova, Nungungulu wa wena, loyi a ku gonzisako lezi zi ku vunako, loyi a ku rangelako ndleleni leyi u faneleko ku famba ha yona.” (Isaya 48:17) A ku nga tirisi khwatsi a kutihlawulela ku wa ta gumesa hi mhango, kota lezi a vanhu va kalako va nga vangelwangi ku hanya khwatsi ha voce na va nga rangelwi hi Nungungulu. A Biblia gi ngalo: “A ndlela ya munhu a yi le ntanwini wakwe, kambe a munhu a nga zi koti ku lulamisa a mazambo yakwe.” — Jeremia 10:23.

Mbuyangwana, a vapswali va hina vo sangula va alakanyile lezaku va wa ta zi kota ku hanya khwatsi na va nga rangelwi hi Nungungulu. Kanilezi a xikhati lexi va nga ala a kufuma ka Nungungulu, yena a nga ha va seketelangi niku hizalezo va lo luza a kumbhelela kabye. Hikwalaho va lo sangula ku mbhela ntamu zonake hi magumo va khosahala va tlhela vafa. Hi kota ya lezi hi nga vana vabye, hi thapelwe hi kungambheleli loko ni kufa. — Va Le Roma 5:⁠12.

A Mhaka Ya Lisima — Himani A Nga Ni Fanelo Ya Ku Fuma?

Hikuyini Nungungulu a nga kala ku lovisa Adamu na Eva a tlhela a vanga wunwani patswa wa vanhu? Hi lezaku a wuhosi ga Nungungulu hehla ka wuako gontlhe, ku nga fanelo yakwe ya ku fuma, gi wa phikizilwe. A xiwutiso xi wa hi lexi: Himani a nga ni fanelo ya ku fuma, niku xana kufuma ka mani ku faneleko? Hi kota ya lezi zi mahekileko: Xana a vanhu va wa ta maha za chukwana hi ku nga fumelwi hi Nungungulu? Hi kota ya lezi Nungungulu a nga nyika vanhu a xikhati xo enela xa kuva va ti fumela na va nga rangelwi hi yena, Nungungulu i wa ta boha hi khati ginwe ka wontlhe lezaku hakunene a vanhu va wa ta hanya khwatsi kufumeni kakwe kutani zi wa tava chukwana loku va ti fumela ha voce. A xikhati lexi a xi vumeleleko xi wa tava xo enela kasi a vanhu va zama tontlhe tixaka ta mafambisela ya wupolitika, wuhlengeli, titshomba, ni wukhongeli leti ti hambanileko ni wukongomisi ga Nungungulu.

Hi wahi a magumo ya kona? Makume ya mazana ya malembe ya matimu ya vanhu ma komba lezaku vona va hanya kuxanisekeni ku yako ku anza. Nzeni ka zana ga malembe legi ga ha hi ku hunzako, a vanhu va hanyile kuxanisekeni ka hombe nguvu ka ku cima ku wa nga se humelela kunwani ko fana ni loko. A timiliyoni ta vona ti dawetelwe xikhatini xa Yimpi ya Wumbiri ya Misava Yontlhe. A ku hunza a 100 wa timiliyoni ta vanhu ti delwe tiyimpini tinwani. A wugevenga ni timholava zi tatile misava. A misaveni yontlhe ku delelwa nguvu a mimuri yo lahlisa mapimo. A mababyi ya ku thapelisana hi kutiriswa ka ziro za wubeleki ma simama ku khumba vanhu vo tala. Makume ya timiliyoni ta vanhu vafa hi ndlala ni mababyi lembe ni lembe. A wutomi ga ngango ni mahanyela ma nene zi onhekile matshanwini wontlhe. A ku na mufumo wa vanhu lowu wu zi kotako ku chukwatisa a zikarato lezo. A wu kona ni wunwe wa yona lowu wu fuvisileko a kukhosahala, a mababyi, ni kufa.

A matshamela ya vanhu ma tshamisile kota lezi a Biblia gi nga wula na ka ha hi mahlweni xungetano hi masiku ya hina. A Mhaka ya Nungungulu yi komba lezaku a nguva ya hina i nguva ya ‘masiku yo gumesa’ ya mafambisela lawa ya zilo laha ku ta nga “chikela a zikhati za zikarato.” Niku kota lezi a Biblia gi wulileko, ‘a vanhu vo biha ni vakanganyisi va nonohisa vaya mahlweni kubiheni.’ — 2 Timote 3:1-5, 13.

A Kuxaniseka Ku Laha Kusuhani Ni Ku Mbhela

A zikombiso zontlhe zi komba lezaku hi ya hi tshinela magumo ya kutlhatlheka loku a vanhu va nyikilweko lezaku va ti fumela na va nga rangelwi hi Nungungulu. Za ti komba zi ku dlunya lezaku a kufuma ka vanhu na va nga rangelwi hi Nungungulu cima ku nga ta famba khwatsi. A kufuma ka Nungungulu hi kona koce ku zi kotako ku neha kurula, a kutsaka, a kuhanya ko mbhelela, ni wutomi ga pinzukelwa. Hikwalaho a kuvumelela loku Jehova a nga nako xungetano hi wubihi ni kuxaniseka ku laha kusuhani ni ku mbhela. Lokuloku Nungungulu i ta nghenelela a timhaka ta vanhu hi ku lovisa a mafambisela wontlhe lawa ya zilo ma nga tsakisiko.

A xiprofeto xa Biblia xi ngalo: “A masikwini ya tihosi leto [a mifumo ya vanhu leyi yi nga kona zalezi], Nungungulu wa le tilweni i ta vuxa a mufumo wu to kala wu nga lobyiswi. . . . Wu ta panza wu lovisa yontlhe mifumo leyi [yi nga kona zalezi], wona wu ku tsonzoma kala kupinzuka.” (Danieli 2:​44) A kulonziwa ka wuhosi ga Jehova, a fanelo yakwe ya ku fuma, hi Mufumo wakwe wa le tilweni hi kona ku nga gonzo-tshinya ya Biblia. A xikhati lexi a nga wulawula na ka ha hi mahlweni hi xikombiso xa ‘masiku yo gumesa,’ Jesu i te ngalo: “A ivangeli leyi ya mufumo yi ta kanelwa misaveni yontlhe, kasi yiva wukustumunyu ka matiko wontlhe; hi kona ku ta nga chikela a kugumesa.” — Mateu 24:14.

A xikhati lexi a magumo ma to chikela, himani a to pona? A Biblia ga hlamula: “A valulamileko va ta aka tikweni, ni lava va mbheleleko va ta sala ka gona. Kanilezi a vakubiha va ta susiwa laha misaveni.” (Mavingu 2:21, 22) A valulamileko hi lava va gonzako xungetano hi kuranza ka Jehova va tlhela va ku maha. Jesu Kristu i te ngalo: “A wutomi ga pinzukelwa hi kuva va ku tiva, wena Nungungulu wece wa zinene, na Jesu Kristu loyi u mu rumileko.” (Johani 17:3) Ina, “a tiko ga hunza, . . . kanilezi loyi a mahako kuranza ka Nungungulu i ta tshama kala kupinzuka.” — 1 Johani 2:17.

Ahandle ka xinwani xikombiso, yontlhe Mitsalo yi susilwe ka A Biblia Go Basa.