Xipimo Xa Wuntlhanu Ni Xinwe
A Mhaka Leyi Hina Hontlhe Hi Ta Nga Yimisana Nayo
1, 2. (a) Hi yihi mhaka leyi Satani a yi vuxileko le Edeni? (b) Xana a mhaka leyo yi kombisiwa kuyini hi lezi yena a zi wulileko?
WENA wa patseka ka mhaka ya lisima nguvu ka tontlhe leti a vanhu va ta nga yimisana na tona. A tlhelo legi u ta nga yima ka gona gi ta komba lezaku xana wa fanela a ku kuma wumanziko ga pinzukelwa ke. A mhaka leyo yi vuxilwe a xikhati lexi ku nga humelela a wuhluwuki le Edeni. A xikhati lexi Satani a wutisileko Eva a ku ngalo: “Hakunene Nungungulu i wulile lezaku mu ngagi ni sinya yinwe ya simu ke?” Eva i lo hlamula lezaku xungetano hi sinya yinwe Nungungulu i te ngalo: “Mu nga ta yiga, . . . kasi mu ngafi.” Zonake Satani hi kukongoma i lo lumbeta Jehova hi ku mu hembela wunwa, a wula lezaku a wutomi ga Eva ge hambu ga Adamu gi wa nga khegeli ka kuingisa Nungungulu. Satani i lo wula lezaku Nungungulu i wa tsona a zivangwa zakwe a nchumu wo kari wa wunene — a wuzikoti ga ku ti yimisela a milayo yabye ya mahanyela. Satani i lo tiyisa: “Nungungulu wa zi tiva lezaku, a siku lego mu gako yona, a mahlo ya nwina ma ta vululeka, mu kota Nungungulu, mu tiva kusasa ni kubiha.” — Genesisi 3:1-5.
2 Hi lisine, Satani i wa wula lezaku a vanhu va wa ta tizwa khwatsi hi ku ti mahela a ziboho zabye wutshanwini ga ku ingisa milayo ya Nungungulu. Hizalezo, i lo phikiza a mafumela ya Nungungulu. Lezo zi vuxile a mhaka ya hombe nguvu ka tontlhe ku nga wuhosi ga Nungungulu wuakweni gontlhe, a fanelo yakwe ya ku fuma. A xiwutiso lexi xi vuxilweko hi lexi: Hi xihi xi nga xa chukwana, a mafumela ya Jehova kutani a mafumela lawa ma nga khegeliko ka yena? Makunu, Jehova i wa ta ngha a lovisile Adamu na Eva kwalaho, kanilezi lezo zi wa nga tava zi lulamisile khwatsi a mhaka ya wuhosi. Hi ku vumelela lezaku a vanhu va anza hi xikhati xo kari, Nungungulu i wa ta kombisa khwatsi lezi zi nga wa ta humelela hi kota ya ku nga khegeli ka yena ni milayo yakwe.
3. I mhaka muni ya wumbiri leyi Satani a yi vuxileko?
3 A kuvukelwa ka fanelo ya Jehova ya ku fuma hi Satani a ku gumesangi hi lezi zi nga maheka le Edeni. Yena i lo vuxa kukanakana xungetano hi kutsumbeka ka vanhu ka Jehova. Leyo yive mhaka ya wumbiri. A kuphikiza kakwe ku kalile ku patsa a pswalo wa Adamu na Eva ni vontlhe a vana va Nungungulu va moya, ku ya chikela ni ka N’wana wa matewula a ranzekako nguvu wa Jehova. Hi xikombiso, le masikwini ya Joba, Satani i lo phikiza lezaku lava va tirelako Jehova a va mu tireli hi ku ranza Nungungulu ni mafumela yakwe, kanilezi va maha lezo hi lezi va vunekako. Yena i lo phikiza lezaku loku va xaniseka, va ta ti mahela kuranza kabye. — Joba 2:1-6; Kuvululelwa 12:10.
Lezi A Matimu Ma Zi Kombako
4, 5. Zini lezi a matimu ma zi kombako xungetano hi kuva vanhu va rangela a mazambo ya vona venyi?
4 A xa lisima mhakeni ya wuhosi hi lexi: Nungungulu a nga vangangi vanhu lezaku va zi kota ku hanya khwatsi na va nga fumelwi hi yena. Kasi kuva va vuneka, yena i va mahile na va khegela ka milayo yakwe yo lulama. Muprofeti Jeremia i kombile lezaku i wa yi tiva mhaka leyo a xikhati a ngaku: “O Jehova, nza zi tiva lezaku a ndlela ya munhu a yi le ntanwini wakwe, kambe a munhu a nga zi koti ku lulamisa a mazambo yakwe. O Jehova, nzi tsayise.” (Jeremia 10:23, 24) Hikwalaho a Mhaka ya Nungungulu ya khongotela: “Tsumba Jehova hi mbilu ya wena yontlhe, u nga tsumbi kupimisisa ka wena wutsumbu.” (Mavingu 3:5) Kota lezi Nungungulu a mahileko vanhu lezaku va fumelwa hi milayo yakwe ya ntumbuluko kasi va zi kota ku hanya, yena kambe i yimisile milayo ya mahanyela, leyi yaku loku yi lanzelwa yi vanga kuzwanana xikari ka vanhu.
5 Zi te dlunya lezaku Nungungulu i wa zi tiva ku ngalo a vanhu cima va wa nga ta zi kota ku ti fumela ahandle ka ku fumelwa hi yena. Hi mizamo yi nga nyawuliko ya ku lava ku ti tlhatlha kufumeni ka Nungungulu, a vanhu va lo ti yimisela mafambisela yo hambanahambana ya wupolitika, ya mabhinzu, ni ya wukhongeli. A mafambisela lawo yo hambanahambana ma lo vanga kulwisana ku nga mbheliko xikari ka vanhu, loku ku gumesako hi timholova, yimpi, ni kufa. Ku woneka lezaku “munwe a fumela munwani a mu yisa khombyeni.” (Mutshawuteli 8:9) Lezo hi zona hakunene zi humelelako matinwini wontlhe ya vanhu. Kota lezi zi wulilweko na ka ha hi mahlweni hi mhaka ya Nungungulu, a vanhu vo biha ni vakanganyisi va simama “vaya mahlweni kubiheni.” (2 Timote 3:13) Niku a nzeni ka zana ga malembe ga wu 20, lomu a vanhu va zi kotileko ku maha zimaho za hombe nguvu hi tlhelo ga siensia ni ga mitiro yo khanda zilo, ku wonekile timhango to tshisa nguvu a ku hunza ta tinwani tinguva. A magezu ya Jeremia 10:23 ma tatiseka nguvu — a vanhu a va vangelwangi ku rangela a mazambo ya vona venyi.
6. Xana Nungungulu i ta lulamisisa kuyini a mhaka ya kuva vanhu va ala a wufumeli gakwe?
6 A mihanzu yo biha ya kuva a vanhu va nga khegeli ka Nungungulu ya komba khwatsi lezaku a kufuma ka vanhu cima ku nga ta humelela. A wufumeli ga Nungungulu hi gona goce gi nehako kutsaka, kuzwanana, kuhanya ka ku nene, ni wutomi. Niku a Mhaka ya Nungungulu yi komba lezaku a kuvumelela ka Jehova a ku ti fumela ka vanhu ku laha kusuhani ni ku mbhela. (Mateu 24:3-14; 2 Timote 3:1-5) Lokuloku, yena i ta nghenelela timhakeni ta vanhu kasi ku tiyisa a wufumeli gakwe misaveni. A xiprofeto xa Biblia xi ngalo: “A masikwini ya tihosi leto [a mifumo ya vanhu leyi yi nga kona zalezi], Nungungulu wa le tilweni i ta vuxa a mufumo wu to kala wu nga lobyiswi, ni wuhosi ga wona cima gi nga ta nyikelwa ka ginwani tiko [a vanhu va nga ta ha tshuka va fumela misava kambe]. Wu ta panza wu lovisa yontlhe mifumo leyi [yi nga kona zalezi], wona wu ku tsonzoma kala kupinzuka.” — Danieli 2:44.
Lava Va To Pona Kasi Ku Nghena Misaveni Yiswa
7. A xikhati lexi a wufumeli ga Nungungulu gi to fuvisa a kufuma ka vanhu, himani a to pona?
7 A xikhati lexi a wufumeli ga Nungungulu gi to fuvisa a kufuma ka vanhu, himani a to pona? A Biblia ga hlamula: “A valulamileko [lava va seketelako a fanelo ya Nungungulu ya ku fuma] va ta aka tikweni, ni lava va mbheleleko va ta sala ka gona. Kanilezi a vakubiha va ta susiwa laha misaveni, ni vakanganyisi [lava va nga seketeliko a fanelo ya Nungungulu ya ku fuma] va ta tsuwulwa ka yona.” (Mavingu 2:21, 22) Hi kufanana, a muyimbeleli wa Tisimu i ngalo: “Ka ha hi xikhatanyana, zonake a wakubiha a nga ta kuva kona . . . A valulamileko va taga tshomba ya tiko, va aka ka gona kala kupinzuka.” — Tisimu 37:10, 29.
8. Xana Nungungulu i ta tiyisisa kuyini a wuhosi gakwe hi kumbhelela?
8 Anzhako ka kuloviswa ka mafambisela ya Satani, Nungungulu i ta neha a misava yakwe ya yiswa, leyi yi to fuvisa hi kumbhelela a timholova to tshisa, tiyimpi, wusiwana, kuxaniseka, wubabyi, ni kufa lezi zi hlaselako vanhu ni ku va maha vava tikhumbi ta zona hi makume ya mazana ya malembe. A Biblia gi hlawutela khwatsi a zilo za zi nene lezi zi rinzelako vanhu va ingisako: “[Nungungulu] i ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa; hakuva a zilo zo sangula zi hunzile.” (Kuvululelwa 21:3, 4) Hi ku tirisa a Mufumo wakwe wa le tilweni wu fumiwako hi Jesu, Nungungulu i ta tiyisa hi kumbhelela a fanelo Yakwe ya kuva Hosi ya hina ya Hombe, ku nga, Mufumeli wa hina. — Va Le Roma 16:20; 2 Pedro 3:10-13; Kuvululelwa 20:1-6.
Lezi A Vanhu Vo Kari Va Kombisileko Zona A Tlhelo Gabye Mhakeni Ya Wuhosi
9. (a) Xana lava va hlayisako kutsumbeka mahlweni ka Jehova va yi wonisa kuyini a mhaka yakwe? (b) Xana Noa i kombisile kuyini a kutsumbeka kakwe, niku xana hi nga vunekisa kuyini hi xikombiso xakwe?
9 Ka tinguva tontlhe ti hunzileko, kuve kona vavanuna ni vavasati va kukholwa lava va kombileko a kutsumbeka kabye ka Jehova kota Hosi ya Hombe. Vona va wa zi tiva lezaku a wutomi gabye gi wa khegela ka kuva va mu ingisa. Noa ive munwe wa vanhu lavo. Hikwalaho Nungungulu i te ngalo ka Noa: “Nzi ta lovisa a nyama yontlhe . . . Ti akele taru.” Niku Noa i lo ingisa a xileletelo xa Jehova. Hambu lezi va nga tlharihisiwa, a vanhu vanwani va xikhati lexo va lo simama a ku ti hanyela a ku khwatsi ku wa nga ta maheka nchumu wu nga tolovelekangiko. Kanilezi i lo aka a taru ga hombe nguvu a tlhela a khomeka ntirweni wa ku xumayela vanwani xungetano hi tindlela ta Jehova to lulama. A tlhatlhambuto wuya mahlweni wuku: “I lo maha lezo Noa; kota lezi Nungungulu a nga mu layisile zona i lo zi maha.” — Genesisi 6:13-22; Maheberu 11:7; 2 Pedro 2:5.
10. (a) Xana Abrahama na Sara va yimelisile kuyini a wuhosi ga Jehova? (b) Hi nga vunekisa kuyini hi zikombiso za Abrahama na Sara?
10 Abrahama na Sara vave zikombiso za zi nene za ku yimela a wuhosi ga Jehova, hi ku maha ni xihi lexi yena a nga va layile. Vona va wa hanya le Ure ga maKaldea, a doropa gi nga anzile hi tlhelo ga titshomba. Kanilezi a xikhati lexi Jehova a nga byela Abrahama lezaku aya ka tiko ginwani, legi a nga kala a nga gi tivi, Abrahama “i lo suka kota lezi Jehova a wulileko ka yena.” Handle ko kanakana Sara i wa hi ni wutomi go tshamiseka — na a hi ni muti, vanghana, ni maxaka. Hambulezo, yena i lo ti koramisa ka Jehova ni ka nuna wakwe zonake aya tikweni ga Kanani, hambulezi a nga kala a nga ma tivi a matshamela lawa ma nga mu rinzele. — Genesisi 11:31–12:4; Mitiro 7:2-4.
11. (a) Xana Mosi i yimele a wuhosi ga Jehova na a hi ka ziyimo muni? (b) Xana hi nga vunekisa kuyini hi xikombiso xa Mosi?
11 Mosi ive munwani wa lava va yimeleko a wuhosi ga Jehova. Niku i mahile lezo na a hi ziyinweni zo karata nguvu — kuwulawulisaneni ka nghohe ni nghohe na Faro wa le Gipite. A hi ku khwatsi Mosi i wa kari a tsumba a wuzikoti gakwe wutsumbu. A kuhambana ni lezo, yena i wa kanakanela a wuzikoti gakwe ga ku wulawula khwatsi. Kanilezi i lo ingisa Jehova. Na a vuniwa hi Jehova zinwe ni makabye wakwe, Aroni, Mosi i lo yisa a mhaka ya Jehova ka Faro hi kuphindaphinda. Faro i wa hi munhu wo nonoha. Hambu a vo kari va vana va Israeli va mu solile nguvu Mosi. Hambulezo, Mosi i lo maha zontlhe lezi Jehova a nga mu ruma hi kutsumbeka, niku yena i tirisilwe lezaku a tlhatlhisa va ka Israeli hi le Gipite. — Eksodusi 7:6; 12:50, 51; Maheberu 11:24-27.
12. (a) Zini zi kombako lezaku a kutsumbeka mahlweni ka Jehova zi hunza a ku maha lezi a zi tsalileko? (b) Xana a ku zwisisa a lixaka leli la kutsumbeka ku hi vunisa kuyini a ku tirisa a bhuku ga 1 Johani 2:15 wutomini ga hina?
12 Vontlhe lava va nga tsumbeka ka Jehova va wa nga ehleketi lezaku lezi zi nga laveka ntsena ku wa hi ku ingisa lezi Nungungulu a nga zi tsalile. A xikhati lexi a kata Potifare a nga zama ku kucetela Josefa lezaku a maha wubhayi naye, ku wa nga hi na nayo wu nga tsalilwe wa Nungungulu lowu wu nga beletela a wubhayi. Kanilezi Josefa i wa ma tiva a malulamiselo ya wukati lawa Jehova a ma yimisileko le Edeni. Yena i wa zi tiva lezaku a ku hlengela masango ni sati wa munwani munhu zi wa nga ta xalalisa Nungungulu. Josefa i wa nga lavi ku tiva lezaku Nungungulu i wa ta mu tsika a ti fananisa ni vaGipite kala kwihi. Yena i yimele a tindlela ta Jehova hi ku ehleketa kutirisaneni ka Nungungulu ni vanhu zonake a tirisa hi mbilu yontlhe lezi a nga zi alakanyela kuva kuranza ka Nungungulu. — Genesisi 39:7-12; Tisimu 77:11, 12.
13. Xana Diyabu i wonekile khwatsi lezaku muhembi hi ndlela muni mhakeni ya (a) Joba? (b) mhakeni ya maHeberu manharu?
13 Hambu loku va ringwa hi ndlela yo binza nguvu, lava hakunene va tivako Jehova a va mu tsiki. Satani i lo phikiza lezaku loku Joba a luza a titshomba takwe to tala kutani loku a babya, hambu yena — loyi Jehova a nga kombisa a ku i wa xalala hi yena — i wa ta tsika Nungungulu. Kanilezi Joba i lo komba lezaku Diyabu muhembi, hambu lezi Joba wutsumbu a nga kala ku zi tiva a ku hikuyini a nga kari a welwa hi timhango. (Joba 2:9, 10) Na ku hunzile a mazanazana ya malembe, Satani i wa ha zama ku tiyisa a wunwa gakwe. Hizalezo i lo maha lezaku a hosi yo kari yi nga zangarile ya le Babuloni yi dzukisa a majaha manharu ya maHeberu hi kufa lomu nzhimbyeni wa nzilo loku ma nga khizami ma khozela a xifananiso xi nga yimisilwe hi hosi. Lezi ma nga kari ma kurumetwa a ku hlawula xikari ka ku ingisa a xilayelo xa hosi kutani a ku ingisa a nayo wa Jehova lowu wu beletelako a wukhozeli ga zifananiso, ma lo komba hi kutiyileko lezaku wona ma wa tirela Jehova niku yena i wa hi Hosi ya wona ya Hombe yi Hunzeleleko Kutlakuka. A ka wona, a kutsumbeka mahlweni ka Nungungulu ku wa hi ka lisima nguvu a ku hunza a wutomi legi ma nga gi hanya xikhatini lexo! — Danieli 3:14-18.
14. Xana zi nga kotekisa kuyini ka hina lezaku hi komba a ku hakunene ha tsumbeka ka Jehova hambu lezi hi nga vanhu va nga mbhelelangiko?
14 Xana hi fanele ku alakanya lezaku hikwalaho ka zikombiso lezo a kuva munhu a tsumbeka mahlweni ka Jehova, i fanele kuva a mbhelele kutani ku ngalo loyi a mahako xihoxo a nga amukeleki hi kumbhelela? A hi zona! A Biblia gi hi byela lezaku ku na ni zikhati lezi Mosi a nga hoxisa. Hambulezi Jehova a nga kala ku xalala hi zona, yena a nga alangi Mosi. A vapostoli va Jesu Kristu vonawu va wa hi ni magome yabye. Hi ku alakanyela a kungambheleli ka hina, Jehova wa xalala loku hi nga kanyisi ha womu a kuranza kakwe zilweni zontlhe. Loku hi hoxisa hi kota ya gome, za lisima lezaku hi ti sola hi mbilu yontlhe hi tlhela hi nga ha mahi a xihoxo lexo. Hi ndlela leyo hi kombisa lezaku hakunene ha ranza lezi Jehova a nge ngalo zi nene hi tlhela hi venga lezi a nge zi bihile. Hikwalaho ka kukholwa ka hina ka lisima la muphahlo wa Jesu wu tirulako zionho, ha zi kota ku kuma xiyimeko xi basileko mahlweni ka Nungungulu. — Amosi 5:15; Mitiro 3:19; Maheberu 9:14.
15. (a) Himani loyi a tsumbekileko hi kumbhelela ka Nungungulu xikari ka vanhu vontlhe, niku xana lezo zi kombile yini? (b) Xana hi vunekisa kuyini hi ka lezi Jesu a zi mahileko?
15 Hambulezo, xana a kuingisa a wuhosi ga Jehova hi kumbhelela a zi koteki ka vanhu futsi? A hlamulo wa lezo wu tshamile wu hi “fihlakalo” wo basa hi xipimo xa 4.000 wa malembe. (1 Timote 3:16) Adamu, hambu lezi a vangilweko na a mbhelele, a nga vekangi xikombiso xo mbhelela xa kuhanya ka kukholwa. Kanilezi himani a nga wa ta veka a xikombiso lexo? Hi lisine a hi munwe wa vana vakwe va vaonhi. A munhu loyi a nga wa ta zi kota a ku maha lezo hi Jesu Kristu. (Maheberu 4:15) Lezi Jesu a zi mahileko zi kombile lezaku Adamu, loyi a nga hi ka ziyimo za zi nene khwatsi, i wa tava a zi kotile ku tsumbeka hi kumbhelela loku ku wo khwatsi i wa zi lavile. A xihoxo xi wa nga hi lomu ka lezi Nungungulu a zi vangileko. Hikwalaho Jesu Kristu hi yena a nga xikombiso lexi hi faneleko ku hlota a ku xi pimanyisa kukombiseni ka kuingisa nayo wa Nungungulu ni kutinyiketeleni ka hina wutsumbu ka Jehova kambe, a Hosi ya Hombe wuakweni gontlhe. — Deuteronome 32:4, 5.
Hi Wihi Hlamulo Wa Hina Wutsumbu?
16. Hikuyini hi faneleko ku ti wonela xikhati xontlhe xungetano hi lezi hi gi wonisako zona a wuhosi ga Jehova?
16 Munwe ni munwani wa hina inyamutlha i ta yimisana ni mhaka ya wuhosi ya wuako gontlhe. Loku hi wulile laha kubaseni lezaku hi le tlhelweni ga Jehova, Satani i hi maha xipotiyelo. Yena i tisa zikarato hi ka matlhelo wontlhe niku i ta simama a ku maha lezo kala kugumeseni ka mafambisela yakwe yo biha ya zilo. Hi fanele ku ti wonela. (1 Pedro 5:8) A mahanyela ya hina ma komba laha hi yimileko kona mhakeni ya hombe ya wuhosi ga Jehova ni ka mhaka ya wumbiri ya kutsumbeka ka Nungungulu loku hi ringiwa. Zi wa tava mhango loku hi wona a mahanyela ya kungatsumbeki kota lawa ma nga hiko ya lisima ntsena hi lezi ma tolovelekileko lomu tikweni. A ku hlayisa a kutsumbeka ku lava lezaku hi ti karatela ku tirisa a tindlela to lulama ta Jehova zilweni zontlhe za wutomi.
17. Ku wuliwa yini xungetano hi kutumbuluka ka kuhemba ni kuyiva loku ku faneleko ku hi maha hi ku potsa?
17 Hi xikombiso, a hi faneli ku pimanyisa Satani, loyi a nga “raru wa mawunwa.” (Johani 8:44) Hi fanele ku tsumbeka kutirisaneni ka hina kontlhe. A ka mafambisela ya Satani, a vanhu vaswa va tolovela a ku nga tsumbeki ka vapswali vabye. Kanilezi a vanhu vaswa va nga maKristu va potsa a ku maha lezo, niku hi ku maha lezo, va kombisa ku ngalo a kuphikiza ka Satani ka lezaku a vanhu va Nungungulu va ta tsika a kutsumbeka kabye loku va ringiwa, mawunwa. (Joba 1:9-11; Mavingu 6:16-19) Zonake ku na ni mabhinzu lawa ma zi kotako ku komba lezaku a munhu i le tlhelweni ga “raru wa mawunwa” wutshanwini ga kuva tlhelweni ga Nungungulu wa kutsumbeka. Ha potsa a mabhinzu lawo. (Mika 6:11, 12) A ku yiva kambe a ku na xigelo, hambu loku a munhu a hi ni xilaveko kutani hambu loku loyi a tekelwako zilo zakwe a ganyile. (Mavingu 6:30, 31; 1 Pedro 4:15) Hambu loku zi tolovelekile lomu hi hanyako kona kutani loku lexi xi tekiwako xi hi xitsongwani, a kuyiva ka ha simama ku lwisana ni milayo ya Nungungulu. — Luka 16:10; Va Le Roma 12:2; Va Le Efesusi 4:28.
18. (a) A kugumeseni ka Kufuma ka Kristu ka 1.000 wa Malembe, hi wihi a nzhingo lowu wu to wela a vanhu vontlhe? (b) Hi wihi a tolovelo lowu hi faneleko ku wu hlakulela zalezi?
18 Nzeni ka Kufuma ka Kristu ka 1.000 wa Malembe, Satani ni madimoni yakwe va tava nkeleni wa lieswila, na va nga zi koti ku kucetela vanhu. Lezo zi ta neha kuhumula ka hombe! Kanilezi anzhako ka 1.000 wa malembe, vona va ta tlhatlhiwa hi xikhatanyana. Satani ni lava va mu lanzelako va ta vangela zikarato a vanhu lava va simamako va tsumbeka ka Nungungulu xikari ka lava va tlheliselweko kuhanyeni. (Kuvululelwa 20:7-10) Loku hi hi ni lungelo ga ku hanya xikhatini lexo, xana hi ta yima ka tlhelo gihi mhakeni ya wuhosi ga wuako gontlhe? Kota lezi a vanhu vontlhe va to ngha va mbhelele, ni xihi xihoxo xi to mahiwa xi tava xo mahiwa ha womu niku lezo zi ta gumesa hi kuloviswa ka pinzukelwa. Hikwalaho, za lisima nguvu a kuva hi hlakulela a tolovelo wa ku ingisa khwatsi a zileletelo zontlhe lezi Jehova a hi nyikako zalezi, kani kova hi ku tirisa Mhaka yakwe kutani hi ku tirisa a hlengeletano yakwe! Hi ku maha lezo, hi komba a kutinyiketela ka hina ko mbhelela ka yena kota Hosi ya Hombe Wuakweni Gontlhe.
Ziwutiso Za Kuvuxeta
• Xana hi yihi mhaka ya hombe leyi hontlheni hi ta nga yimisana nayo? Xana hi kalile hi patsekisa kuyini ka yona?
• Xini xi dlunyatekako nguvu xungetano hi tindlela leti a vavanuna ni vavasati va zikhati za kale va kombisileko zona a kutsumbeka kabye ka Jehova?
• Hikuyini zi nga za lisima lezaku hi dzunza Jehova hi mahanyela ya hina ya siku ni siku?