Xana Jesu I Belekilwe Hi Dezembro?

A BIBLIA a gi hi byeli lezaku Jesu i belekilwe rini. Kanilezi ga hi nyika xigelo xa xi nene xa ku tiva lezaku yena a nga belekwangi hi Dezembro.

Wona lezi a nguva yi nga zona xikhatini lexo xa lembe le Betlehema, lomu Jesu a nga belekelwa kona. A hweti ya xiJuda ya Kislevi (yi yelanako ni Novembro/Dezembro) yi wa hi hweti yo titimela ni ya tivula. A hweti yi nga lanzela leyo yi wa hi Tebeti (Dezembro/Janeiro). Yi wa hi hweti yi nga hi ni xirami xa hombe nguvu a ku hunza tontlhe ta lembe, a zikhati zinwani ku wana a gapongo le mitsungeni. A hi woneni lezi a Biblia gi hi byelako xungetano hi tshamela ga wutshamu lego.

A mutsali wa Biblia Ezra i komba lezaku Kislevi hakunene yi wa hi hweti yi nga tiviwa hi kuva ni xirami ni tivula. Anzhako ka kuva a wulile lezaku ku wa hi ni xidlemo xi nga tsombene le Jerusalema “lomu ka hweti ya wu 9 [Kislevi] hi siku ga 20,” Ezra i ngalo a vanhu va wa kari va “rurumela hi kota ya . . . vula ya hombe.” Xungetano hi matshamela ya nguva xikhatini lexo xa lembe, a vanhu lavo va nga tsombene va te ngalo: “Xikhati xa tivula ta hombe; a hi zi koti ku yima lomu handle.” (Ezra 10:9, 13; Jeremia 36:22) A zi hlamalisi lezaku a varisi va nga kari va hanya lomu kusuhani ni Betlehema va wa nga tshami ge hambu ku tsika mitlhambi yabye le handle ni wusiku hi Dezembro!

Kanilezi, a Biblia gi bika lezaku ku wa hi ni varisi le livaleni na va hlayisa a mitlhambi yabye ka wusiku legi Jesu a nga belekwa ha gona. Hakunene, a mutsali wa Biblia Luka i komba lezaku a ka xikhati lexo, a varisi va wa “tshamile mikoveni, va lavelela a mitlhambi yabye ni wusiku” kusuhani ni Betlehema. (Luka 2:8-12) Wona lezaku a varisi hi lisine va wa tshamile le handle, va wa nga fambafambi ntsena le handle ni hlikanhi. Va wa hi ni mitlhambi yabye livaleni ni wusiku. Xana a tlhamuselo lowo wa ku tshama le handle wa zwanana ni nguva ya kutitimela ni ya tivula ya Betlehema hi Dezembro? Ahihi, a wu zwanani. Hikwalaho a matshamela ya nguva ya kubelekwa ka Jesu ma komba lezaku yena a nga belekwangi hi Dezembro.a

A Mhaka ya Nungungulu yi hi byela hi kukongoma lezaku Jesu i file rini, kanilezi yi hi nyika mitlhamuselo yitsongwani ntsena xungetano hi xikhati xa kubelekwa kakwe. Lezo zi hi alakanyisa a magezu lawa ya Hosi Solomoni: “A kudzunzeka [“vito gi nene,” NM] ku nene ku hunza mafura ya ntsengo; ni siku ga kufa gi hunza a siku ga kubelekwa.” (Mutshawuteli 7:1) Hikwalaho, a hi faneli ku hlamala hi lezi a Biblia gi hi nyikako mitlhamuselo yo tala xungetano hi wutireli ni kufa ka Jesu kanilezi na gi hi byela zitsongwani xungetano hi xikhati xa kubelekwa kakwe.