A tingilozi ti tivisa kupswaliwa ka Jesu

Khezari Augustu, a hosi ya mufumo wa Roma, i no laya a vaJudha vontlhe lezvaku vaya lomu va nga pswaliwa kona va ya tsalelwa. Hikwalaho, Josefa na Mariya va no endza va ya le Bhetlehema, lomu a maxaka ya Josefa ma nga pswalelwa kona. Ka cikhati leco, ma wa chikela masiku ya ku Mariya a pswala n’wana.

A cikhati leci Josefa na Mariya va nga chikela Bhetlehema, ku wa nga hi na kun’wani ko tshama kona, ku wa no sala ranga basi. Hi kwalomo Mariya a nga mu pswalela kona a n’wana wakwe, Jesu. I no mu phutsela lomu ka nguwo ya yinene, a mu lata khwatsanyana lomu ka cigowolo.

Ka wutshamu go kari ga laha kusuhani ni Bhetlehema, ku wa hi ni varisi va nga hi lahandle va wonelela zvifuyo zvabye ni wusiku. Hi citshuketi, a ngilozi yi nota yi ta yima mahlweni kabye va randzelwa hi kuwonekela ka kungangamela ka Jehovha. A varisi va no chava nguvhu. Kanilezvi, a ngilozi yi no va byela lezvi: ‘Mu nga chavi. Ndzi na ni mahungu yo tsakisa. Nyamutlha ku pswalilwe Mesiya le Bhetlehema’. Ka cikhati caleco, ku no woneka tingilozi to tala le tilweni, tiku: ‘I wa dzundziwe Nungungulu le tilweni niku laha misaveni a kuve ni kurula’. A tingilozi ti no gumesa ti nyamalala. Zvini lezvi a varisi va nga maha?

Va no byelana vaku: ‘A hi fambeni Bhetlehema zvezvi’. Va no tekela ku famba hi kuhatlisa va ya kuma Josefa na Mariya lomu rangeni ni n’wana wabye a nga ha hi ku pswaliwa.

Vontlhe va ngazwa lezvi a tingilozi ti nga byela varisi va no hlamala. Mariya i no ehleketa nguvhu hi lezvi a tingilozi ti nga wula, niku a nga tshukangi a zvi rivala. A varisi va no tlhela ka zvifuyo zvabye, na va bonga Jehovha hi zvontlhe lezvi va nga zvi wonile ni ku zvizwa.