Jesu Kristu — i nwanana kutani i hosi ya ntamu ke?

Hi Dezembro a vanhu vo tala misaveni va wona zithombe za Jesu na a hi nwanana. I kombisiwa na a hi lomu ka xigowolo, ku nga lomu ku cheliwako byanyi lezaku a zihari zi gela kona. Kanilezi, xana hi fanele ku alakanya Jesu kota nwanana ntsena? — a Zalezi, a hi bhule hi ndlela ya lisima nguvu ya ku mu alakanya hi yona. Hi nga gonza ndlela leyo ka lezi zi nga humelela a ntlawa wa varisi ni wusiku kusuhani ni Betlehema.

Hi xitshuketi, ku lo woneka a ngelosi ka varisi. Yiku ngalo kabye: “Nyamutlha mu belekelwe a Muhanyisi . . . loyi a nga Kristu a Hosi.” A ngelosi yi lo va byela kambe lezaku va ta kuma Jesu ‘na a petselwe dzobyeni, a latiwa lomu xigowolweni.’ Zalezo ku lo woneka a tingelosi tinwani to tala, ti “dumisa Nungungulu.”

U nga ti zwisa kuyini loku wozwa tingelosi na ti dumisa Nungungulu? — A varisi va lo tsaka! Zonake vaku: “A hi fambeni Betlehema, hi ya wona lexi xi mahekileko kona.” Loku va chikele, va lo kuma “Maria na Josefa, ni xinwanana na xi latilwe xigowolweni.”

Na ku nga se hunza xikhati xo leha, ku lota vanhu vanwani le Betlehema laha Maria na Josefa va nga hi kona. Laha a varisi va nga va hlawutela lezi zi nga humelela, vontlhe va lo hlamala nguvu. Za ku tsakisa a ku tiva zilo lezi zo saseka xungetano hi Jesu ke? — Hontlheni hi ranzako Nungungulu ha tsaka. Zalezi a hi wone a ku hikuyini a vanhu va tsakileko nguvu hi kupswaliwa ka Jesu. Kasi ku maha lezo, hi fanele ku alakanya lezi zi nga humelela Maria na a nga se chada.

Ka siku go kari, Maria i lo enzelwa hi ngelosi yi vitwako Gabrieli. Yi lo mu tsumbisa lezaku i wa ta pswala n’wana loyi a nga wa ‘tava wa hombe, a vitanwa aku N’wana wa loyi a nga Hehla-Hehla.’ Gabrieli i lo engeta aku: ‘I ta fuma kota hosi; a mufumo wakwe cima wu nga ta gumelwa.’

Maria i wa lava ku tiva lezi zi to mahekisa zona, hakuva i wa nga se tshuka a etlela ni wanuna. Hikwalaho, Gabrieli i lo mu tlhamusela aku: A “ntamu wa loyi a nga Hehla-Hehla wu ta ku fenengeta,” niku “a n’wana wo basa loyi a ta nga belekiwa i ta vitanwa a N’wana wa Nungungulu.” A kuva Nungungulu a tekile a n’wana wakwe a mu rumela rumbyini ga Maria, zonake a pswaliwa kota nwanana — ku’ve xihlamaliso xa hombe nguvu!

Wa tshuka u wona zithombe kutani makwadru ma kombisako “titlhari” tinharu zinwe ni varisi na va enzela Jesu na a hi nwanana ke? — Xikhatini xa khisimuso, a zilo lezi za tolovela ku kombiswa. Kanilezi, a zi kombi lisine. Hi lisine, a “titlhari” leto vagonzi va tinyeleti, va nga vamahi va zilo zi bihileko ka Nungungulu. A hi wone lezi zi nga maheka a xikhati lexi va nga chikela. A Biblia gi ngalo: “Va lo enghena lomu ndlwini, va wona a xihlangana ni nyine wa xona Maria.” Hikwalaho, Jesu i wa nga ha hi xihlangi xi nga hi lomu ka xigowolo; kanilezi i wa hi nwanana a nga hanya laha kaya na Josefa zinwe na Maria!

Va mu kumisile kuyini Jesu a vagonzi lavo va tinyeleti? — Va lo rangelwa hi “nyeleti” lezaku va sangula hi kuya ka Hosi Herodi le Jerusalema, wutshanwini ga kuya Betlehema. A Biblia gi wula lezaku Herodi i wa lava Jesu kasi ku mu daya. Hi nga alakanyela lezi. Hi mawonela ya wena, himani a mahileko lexo xi nga wonekisa ku khwatsi i nyeleti lezaku xi va komba ndlela a vagonzi lavo va tinyeleti kala ka Herodi ke? — A hi Jehova, a Nungungulu wa lisine, kanilezi i nala wakwe, Satani!

Inyamutlha, Satani i zama ku maha vanhu va alakanya lezaku Jesu xinwanana ntsena, lexi xi nga zi kotiko ku maha nchumu. A ku hambana ni lezo, a ngelosi Gabrieli yi byelile Maria yiku: ‘I ta fuma kota hosi, niku a mufumo wakwe cima wu nga ta gumelwa.’ Ka xikhati lexi, Jesu o fuma kota Hosi le tilweni, niku lokuloku i ta lovisa a valala vontlhe va Nungungulu. Hi lezo hi faneleko ku mu alakanyisa zona Jesu, niku a zilo lezi, hi fanele ku bhulela vanwani.