‘Loyi i N’wana wa mina’

LOKU a nwanana a maha zilo za zi nene, a vapswali vakwe va tsaka. Loku a nhanyana a maha za zi nene, a papai wakwe wa tizwa matshanza a wula lezaku: “Loyi i nhanyana wa mina.” Kutani loku a mufana a maha zilo za zi nene, a papai wakwe wa wula lezi na a xalele: “Loyi mufana wa mina.”

Xontlhe xikhati Jesu i maha lezi zi tsakisako a Papai wakwe. Hikwalaho, a Papai wakwe wa tizwa matshanza hi yena. Wa zi alakanya lezi a Papai wakwe a nga maha a xikhati lexi Jesu a nga hi ni valanzeli vakwe va vanharu? — Ina, Nungungulu i wulawulile hi kwale tilweni a va byela lezi: ‘Loyi i N’wana wa mina a ranzekako, nzi xalalako ha yena.’ — Mateu 17:5.

Xontlhe xikhati Jesu i maha lezi zi xalalisako a Papai wakwe na a tsakile. Wa zi tiva a ku hikuyini? Hi lezaku i ranza a Papai wakwe hi mbilu yontlhe. Loku a munhu a maha zilo na a nga zi lavi, zi wonekisa ku khwatsi za karata. Kanilezi, loku a maha hi kuziranza, a zi karati. Wa zi tiva a ku zi wula yini ku maha zilo hi kuziranza? — Zi wula ku zi maha na zi sukela mbilwini.

Hambu na a nga seta laha misaveni, Jesu i wa zi tsakela ku maha zontlhe lezi a Papai wakwe a nga lava lezaku a zi maha. I wa maha lezo hakuva wa mu ranza a Papai wakwe, Jehova Nungungulu. Jesu i wa tshama ka wutshamu ga gi nene nguvu le tilweni zinwe ni Papai wakwe. Kanilezi, Nungungulu i wa hi ni ntiro wo hlawuleka a nga lava ku Jesu a wu maha. Kasi ku maha a ntiro lowo, Jesu i wa fanele ku suka le tilweni a ta pswaliwa laha misaveni kota xinwanana. Jesu i wa zi tsakela ku maha lezo hakuva hi zalezo Jehova a nga lava ku a maha.

Kasi a pswaliwa kota xinwanana laha misaveni, ku lavekile lezaku Jesu ava ni mamani. Wa zi tiva a ku kuve mani a mamani wakwe? —  Hi Maria. Jehova i rumele a ngelosi yakwe Gabrieli hi le tilweni lezaku yi ta wulawula na Maria. A ngelosi leyo yi lo mu byela lezaku i wa tava ni xinwanana xa mufana. A xinwanana lexo va wa ta xi chula a ku hi Jesu. Makunu ku wa tava mani a papai wa xinwanana lexo? — Gabrieli i lo mu byela lezaku a Papai wa xinwanana lexo ku wa tava Jehova Nungungulu. Hi kota ya lezo, Jesu i wa ta vitaniwa ku i N’wana wa Nungungulu.

U alakanya lezaku i ti zwisile kuyini Maria? — Xana i wulile ku: “A nzi zi lavi ku maha mamani wa Jesu”? Ahihi. Maria i wa ti yimisele ku maha lezi Nungungulu a nga zi lava. Kanilezi, a N’wana wa Nungungulu wa le tilweni i wa ta pswalisiwa kuyini kota xinwanana laha misaveni? Wa zi tiva a ku hikuyini a kupswaliwa ka Jesu ku vileko ko hambana ni ka zivanana zinwani? — 

Nungungulu i mahile vapswali va hina vo sangula, Adamu na Eva, hi ndlela ya ku va zi kota ku kumana hi ndlela yo hlamalisa. Anzhako ka lezo, lomu nzeni ka wasati ku wa ta kula xinwanana. A vanhu va wula lezaku lezo xihlamaliso! Handle ko kanakana wenawu wa kholwa lezo.

Makunu, Nungungulu i mahile xihlamaliso xa hombe ku hunza lexo. I lo teka a wutomi ga N’wana wakwe hi le tilweni zonake a gi chela lomu nzeni ka Maria. Nungungulu i wa nga se tshuka a maha nchumu wo fana ni lowo, niku a nga se wu maha kambe. Anzhako ka lezo, Jesu i lo sangula ku kula lomu nzeni ka Maria a ku fana ni lezi a zivanana zinwani zi kulisako zona lomu nzeni ka vamamani va zona. Anzhako ka lezo, Maria i lo chada na Josefa.

Laha ku nga chikele a xikhati xa lezaku Jesu a pswaliwa, Maria na Josefa va wa enzele a doropa ga Betlehema. Kanilezi, ku wa tele hi vanhu, ne ku wa nga hi na yindlu kasi Maria na Josefa va tshama ka yona. Hikwalaho, va lo ya tshama lomu ku nga tshama zihari. Hi kwalomo Maria a nga pswala kona, niku Jesu i lo vekiwa lomu ka xigowolo, kota lezi u zi wonako laha. A xigowolo hi lomu va chelako kona a zakuga za tihomu ni za zihari zinwani kasi zi gela kona.

Ka wusiku legi Jesu a nga pswaliwa hi gona, ku lo maheka zilo zo hlamalisa. Kusuhani ni Betlehema, a varisi vo kari va lo wona a ngelosi. A ngelosi leyo yi lo va byela lezaku Jesu i wa hi munhu wa lisima. Yi te ngalo: ‘Wonani! Nza mu bikela a mahungu ya kusaseka ya kutsaka ka hombe, loku ku tova kona ka vanhu vontlhe. Lezaku nyamutlha mu belekelwe loyi a to hanyisa vanhu.’ — Luka 2:10, 11.

A ngelosi leyo yi lo byela a varisi lavo lezaku va wa ta kuma Jesu le Betlehema, na a latilwe lomu xigowolweni. Zonake ku lo humelela tingelosi tinwani hi xitshuketi na tita hi le tilweni ti ta patsana ni leyi yo sangula, ti dumisa Nungungulu. Ti lo yimbelela tiku: ‘A wudzunzo a give ka Nungungulu, ni kurula a kuve misaveni xikari ka vanhu lava a xaleleko ha vona.’ — Luka 2:12-14.

Loku a tingelosi ti fambile, a varisi va loya Betlehema zonake va ya kuma Jesu. Loku va chikele, va lo byela Josefa na Maria zontlhe a zilo za zi nene lezi va nga zi zwile. Handle ko kanakana Maria i tsakile nguvu hi kuva a vumelile ku maha mamani wa Jesu.

Anzhako ka xikhati xo kari, Josefa na Maria va lo teka Jesu va famba naye doropeni ga Nazareta. Hi kwaleyo Jesu a nga ya kulela kona. A xikhati lexi a nga kula, i lo sangula a ntiro wakwe wa hombe wa ku gonzisa. Lowo wu wa hi wunwe wa mitiro leyi Jehova Nungungulu a nga lava lezaku a N’wana wakwe a yi maha laha misaveni. Jesu i wa zi tsakela nguvu a ku maha ntiro lowo hakuva i wa mu ranza nguvu a Papai wakwe wa le tilweni.

Na a nga se sangula a ntiro wakwe kota Mugonzisi wa Hombe, Jesu i lo bapatizwa hi Johani Mubapatizi lomu Congweni wa Jordani. Anzhako ka lezo, ku lo humelela a nchumu wo hlamalisa! Laha Jesu a nga kari a humesiwa hi lomu matini hi Johani, Jehova i lo wula lezi hi kwale tilweni: “Loyi hi N’wana wa mina a ranzekako, nzi xaleleko khwatsi ha yena.” (Mateu 3:17) A wu tsaki loku a vapswali va wena va ku byela lezaku va ku ranza? — Hi nga tiyiseka lezaku Jesu yenawu i tsakile.

Xontlhe xikhati Jesu i mahile zilo za zi nene. I wa nga lavi ku ti maha munhu munwani. I wa nga byeli vanhu lezaku i wa hi Nungungulu. Gabrieli, a ngelosi, i wa byelile Maria lezaku Jesu i wa ta vitaniwa ku i N’wana wa Nungungulu. Yena nwinyi i wulile lezaku i wa hi N’wana wa Nungungulu. A nga tshukangi a byela vanhu lezaku i wa tiva zilo zo tala a ku hunza Papai wakwe. I lo wula lezi: “Dadani ngwa hombe a ku hunza mina.” —  Johani 14:28.

Hambu a xikhati lexi Jesu a nga hi le tilweni, loku a Papai wakwe a mu nyika ntiro, i wa maha. I wa nga wuli lezaku i wa ta maha, a gumesa a maha zinwani. I wa mu ranza Papai wakwe. Hikwalaho, i wa ingisa lezi a Papai wakwe a nga kari a mu byela. A xikhati lexi a ngata laha misaveni kambe, Jesu i mahile lezi a Papai wakwe a nga mu rumile ku ta maha. A nga mbhetangi xikhati na a maha zilo zinwani. Hikwalaho, a zi hlamalisi lezi Jehova a nga mu tsakela nguvu a N’wana wakwe!

Hinawu hi lava ku tsakisa Jehova, a hi zona? — Hi zona futsi, hi fanele ku kombisa lezaku ha mu ingisa Nungungulu hakunene, a ku fana ni lezi Jesu a zi mahileko. Nungungulu i wulawula na hina hi ku tirisa Biblia. Zi wa nga tava zi nene a ku maha ku khwatsi ha mu ingisa Nungungulu, hi tlhelo ginwani na hi kholwa hi tlhela hi maha zilo lezi a Biblia gi kalako gi nga zi gonzisi, a hi zona? — Niku alakanya lezi, zi nga ta hi karatela niku hi ta tsaka hi ku ingisa Jehova loku hakunene hi mu ranza.