Maria A Enzelwa Hi Ngelosi

A WASATI loyi wo saseka hi Maria. Yena muIsraeli, a hanyako lomu doropeni ga Nazareta. Nungungulu wa zi tiva ku ngalo yena munhu wa mu nene nguvu. Hikwalaho yena i lo rumela a ngelosi yakwe Gabrieli lezaku yi ta wulawula naye. Wa zi tiva lezi Gabrieli a tileko ku ta byela Maria? A hi zi woneni.

Gabrieli i mu byela lezi: ‘Xewe, wena loyi u kumileko thomo ga hombe. Jehova i na wena.’ Maria cima a nga se mu wona munhu loyi. Yena wa karateka, hakuva a nga zi tivi a ku i lava ku wula yini. Kanilezi Gabrieli i tekela ku mu tangalisa kuchaveni kakwe.

Yena i ngalo: ‘U nga chavi, Maria. Jehova wa xalala nguvu hi wena. Hikwalaho yena i lava ku ku mahela a nchumu wo hlamalisa. U ta pswala xinwanana lokuloku. Niku u fanele ku xi vitana a ku hi Jesu.’

Gabrieli i simama a ku mu tlhamusela: ‘A nwanana loye i tava wa hombe, niku i ta vitanwa ku ngalo i N’wana wa Nungungulu a Hunzeleleko Kutlakuka. Jehova i ta mu maha hosi, kota lezi Davida a nga hi zona. Kanilezi Jesu i tava hosi kala kupinzuka, ni mufumo wakwe cima wu nga ta gumelwa!’

Maria i wutisa aku ngalo: ‘Zi nga mahisa kuyini lezo? A nzi se tekwa. A nzi se hanya ni wanuna, makunu nzi nga zi kotisa kuyini kuva ni xinwanana ke?’

Gabrieli i hlamula aku: ‘A ntamu wa Nungungulu wu tata hehla ka wena. Hikwalaho a nwanana i ta vitanwa a ku i N’wana wa Nungungulu.’ Zonake aku ngalo ka Maria: ‘Alakanya a xaka ga wena Elizabeti. A vanhu va te ngalo i wa khosahele nguvu akuva a kuma vana. Kanilezi lokuloku yena i tava ni n’wana. Wa zi wona makunu, a ku na nchumu wu nga mu tsanzako Nungungulu.’

Zalezo Maria i ngalo: ‘Nzi nanza ga Jehova! A zi maheke ka mina kota lezi u zi wulileko.’ Zonake a ngelosi yi suka yi famba.

Maria i hatlisa a famba a ya vuxela Elizabeti. Laha Elizabeti a zwako a gezu ga Maria, a xinwanana xi tlula hi kutsaka lomu nzeni ka Elizabeti. Elizabeti i tala hi moya wa Nungungulu, aku ngalo ka Maria: ‘U katekile nguvu wena xikari ka vavasati.’ Maria i tshama na Elizabeti a xipimo xa tihweti tinharu, zonake a tlhelela kaya le Nazareta.

Maria i laha kusuhani ni ku tekiwa hi wanuna a vitwako Josefa. Kanilezi laha Josefa a tivako lezaku Maria i tava ni xinwanana, yena i alakanyela ku ngalo a zi fanelangi akuva a mu teka. Zonake a ngelosi ya Nungungulu yi ngalo kakwe: ‘U nga chavi a ku teka Maria lezaku a maha sati wa wena. Hakuva hi Nungungulu a mu nyikileko n’wana.’ Hikwalaho Maria na Josefa va tekana, zonake va rinzela a kupswaliwa ka Jesu.