Kupswalwa Ka Jesu Kala Kufeni Kakwe

A ngelosi Gabrieli yi rumelwe ka nhwana wa mu nene a vitwako Maria. Yona yi lo mu byela ku ngalo yena i wa ta pswala a nwanana a nga wa ta fuma kota hosi kala kupinzuka. A nwanana, Jesu, i pswalilwe lomu rangeni, laha a varisi va nga ta mu wonela kona. Anzhako, a nyeleti yo kari yi lo komba ndlela vavanuna vo kari kusukela Mutsuwuka-gambo kala laha a nwanana tsongwani a nga hi kona. Hi pola loyi a mahileko lezaku vona va wona a nyeleti leyo, ni lezi Jesu a nga ponisiswa zona hi ka mizamo ya ku mu daya.

Hi kulanzela, hi kuma Jesu, a xikhati lexi a nga hi tangeni ya 12 wa malembe, na a wulawula ni vagonzisi lomu tempeleni. Jesu i bapatizilwe na ku hunzile a khume ga malembe ni ntlhanu ni manharu anzhako ka lezo, niku zalezo i lo sangula a ntiro wa kuchumayela a Mufumo ni wa kugonzisa lowu Nungungulu a mu rumeleko wona misaveni akuva a wu maha. Kasi ku mu vuna ntirweni lowo, Jesu i lo hlawula a 12 wa vavanuna a va maha vapostoli vakwe.

Jesu i mahile zihlamaliso zo tala kambe. Yena i phamelile makume ya mazana ya vanhu hi tinjhanjhi titsongwani ntsena ni zibaba zitsongwani. I hanyisile vababyi a tlhela a vuxa ni vafileko. Hi kugumesa, hi tiva zilo zo tala zi nga humelela Jesu ka siku go gumesa ga kuhanya kakwe, ni lezi a nga dayiswa zona. Jesu i chumayelile a xipimo xa malembe manharu ni khihlanya, hikwalaho a XIPANZE 6 xi eneta a xikhati xa ku hunzanyana a 34 wa malembe.