Mariya a endzelwa hi ngilozi Gabriyeli

Elizabheti i wa hi ni xaka ga nhanyana, gi nga vitaniwa ku hi Mariya, gi nga hanya dhoropeni ga Nazareta, le Galileya. Mariya i wa tsumbisene ku chadha na Josefa, loyi a nga hi muvatli. A cikhati leci a nyimba ya Elizabheti yi nga hi ni 6 wa tihweti, Mariya i no endzelwa hi ngilozi Gabriyeli, yi yaku: ‘Xewe Mariya. Jehovha i ku tsakele nguvhu’. I wa nga zvi zwisisi lezvi Gabriyeli a nga zvi wula. Gabriyeli i no gumesa aku: ‘U ta xura nyimba u pswala a n’wana wa mufana, niku u ta mu chula ku hi Jesu. A n’wana loye i tava Hosi. A Mufumo wakwe wu ta tshama kala kupindzuka’.

Mariya aku: ‘Ndzi ta pswalisa kuyini n’wana? Phela mina a ndzi se etlela ni wanuna’! Gabriyeli aku: ‘Jehovha a nga tsandziwi hi nchumu. A moya wo basa wu tata hehla ka wena, niku u ta pswala n’wana. A xaka ga wena, Elizabheti, yenawu i xurile nyimba’. Mariya i no gumesa aku: ‘Ndzi nandza ga Jehovha. A zvi maheke ka mina lezvi u zvi wulileko’.

Mariya i no endza a ya vhuxela Elizabheti le dhoropeni ga zvitsunga. A cikhati leci Mariya a nga mu losa, Elizabheti i nozwa cin’wanana cakwe lomu ndzeni na ci tlula. I no tala hi moya wo basa, aku: ‘Mariya, Jehovha i ku katekisile. Wudzundzo ka mina a ku wona mamani wa Hosi ya mina laha kaya ka mina’. Mariya aku: ‘Ndzi dzundza Jehovha hi mbilu ya mina yontlhe’. Mariya i no tshama na Elizabheti hi tihweti tinharu, a gumesa a tlhela kaya le Nazareta.

A cikhati leci Josefa a nga tiva lezvaku Mariya i na ni nyimba, i wa lava ku mu tsika. Kanilezvi, ku no woneka ngilozi kakwe hi noro yi mu byela lezvi: ‘U nga chavi ku chadha na Mariya. A nga mahangi nchumu wa kubiha’. Hikwalaho, Josefa i no chadha na Mariya, a mu teka a famba naye kaya kakwe.