Mawonela ya Biblia xungetano hi kutlhatlha wukati ni kuhambana

Jehova i rinzela lezaku lava va chadileko va simama na va tsumbekile ka xiboho xa wukati. A xikhati lexi a nga tlhanganyisa a wanuna ni wasati vo sangula hi wukati, Jehova i te ngalo: “A wanuna i ta . . . namarela ka sati wakwe; vona va tava nyama yinwe.” Hi nzhako, Jesu Kristu i lo phinda a magezu lawo a tlhela a engetela lezi: “Hikwalaho lexi Nungungulu a xi tlhanganyisileko, ngha xi nga hambanyiswi hi munhu.” (Genesisi 2:24; Mateu 19:3-6) Hi xigelo lexo, Jehova na Jesu va wona wukati kota xiboho xa wutomi gontlhe lexi xi mbhelako ntsena loku a munwe wabye afa. (1 Va Le Korinte 7:39) Kota lezi a wukati gi nga lulamiselo go basa, a kutlhatlha wukati a ku faneli ku woniwa kota nchumu wo hlakana. Hi lisine, Jehova wa venga a kutlhatlhiwa ka wukati loku ku nga seketelwiko hi Mitsalo. — Malaki 2:15, 16.

Hi xihi a xiseketelo xa Mitsalo xa kutlhatlha wukati? Kunene, Jehova wa venga a wubhayi ni wurembi. (Genesisi 39:9; 2 Samueli 11:26, 27; Tisimu 51:4) Hakunene, i wona a wubhayi kota go nyenyeza nguvu laha ka kuza a vumela lezaku giva xiseketelo xa kutlhatlha wukati. (Kasi u tiva a ku xini wubhayi, wona a Xipimo 9 nzimana 7, lomu a wubhayi gi tlhamuselwako kona.) Jehova i nyika a nuna kutani sati loyi a nga hiko na nanzu a fanelo ya ku hlawula lezaku i ta simama wukatini lego ni loyi a mu onheleko kutani i ta gi tlhatlha ke. (Mateu 19:9) Hikwalaho, loku a nuna kutani sati loyi a nga hava nanzu a zi wona na zi hi chukwana a ku tlhatlha wukati, a nga mahi zilo zi vengiwako hi Jehova. Hambulezo, a bandla ga wuKristu a gi kuci munhu lezaku a lava ku tlhatlha wukati. Hi lisine, a ziyimo zo kari zi nga ha kuca loyi a onhelweko lezaku a simama ni nuna kutani sati wakwe a nga ni nanzu, nguvunguvu loku yena a kombisa kutisola ka lisine. Kanilezi hi magumo, lava va nga ni xiseketelo xa Mitsalo xa kuva va tlhatlha wukati hi vona va faneleko ku ti mahela xiboho xabye wutsumbu va tlhela va vumela zontlhe lezi zi to va humelela anzhako ka lezo. — Va Le Galatia 6:5.

Ka ziyimo zo kari zo nonoha nguvu, a maKristu yo kari ma mahile xiboho xa ku hambana ni nuna kutani sati wabye kutani ku tlhatlha wukati hambu loku ku nga mahiwangi wubhayi. Ka xiyimo lexo, a Biblia gi laya lezaku loyi a tsikako nuna kutani sati “ngha a tshama a nga [chadi], kutani a tlhela a zwanana” naye. (1 Va Le Korinte 7:11) A muKristu loye a nga tlhatlhekangi lezaku a lava munhu munwani kasi ku chada naye. (Mateu 5:32) Wona a ziyimo zitsongwani lezi a vokari va zi wonako kota xiseketelo xa kuhambana.

Ku ala ku wundla ngango ha womu. A ngango wu nga ha hanya wusiwaneni ga hombe nguvu, wu vumala zakuga ni za kuambala, hi kota ya lezi a nuna a nga wu hlayisiko, hambu lezi a nga ni ntamu wa ku maha lezo. A Biblia gi ngalo: “Loku a hi kona munhu a nga hlayisiko . . . a va ngango wakwe, yena i kanetile a kukholwa, i bihile ku hunza loyi a nga kholwiko.” (1 Timote 5:8) Loku a wanuna loye a ala ku cica mahanyela yakwe, a sati a nga ha ti mahela xiboho xaku xana i ta simama wukatini lego kutani i ta hambana naye hi nayo kasi ku vikela a wutomi gakwe ni ga vana vakwe. Hakunene, a madota ya bandla ma fanele ku hlola khwatsi a xilumbeto lexo xa lezaku a muKristu wo kari wa ala ku hlayisa a ngango wakwe. Loku munhu a ala ku hlayisa a ngango wakwe a nga ha gumesa hi ku susiwa bandleni.

Ku xanisa a nuna kutani sati. A nuna kutani sati loyi a xanisako munghana wakwe wa wukati a nga ha maha lezo hi tihanyi to tshisa laha ka kuza a miri hambu wutomi ga loyi a xaniswako ziva mhangweni. Loku loyi a xanisako munghana a hi muKristu, a madota ya bandla ma fanele ku hlola a mhaka leyo kasi va tiyiseka lezaku lisine ke. A ku tshamela ku kombisa zanga ni mahanyela ya tihanyi xiseketelo xa kususiwa bandleni. — Va Le Galatia 5:19-21.

Kuva mhangweni ya ku tsema kuzwanana na Jehova. A nuna kutani sati a nga ha tshamela ku valela a munghana wakwe wa wukati lezaku ava wukhozelini ga lisine kutani ku zama a ku mu kurumeta lezaku a hambunyeta milayo ya Nungungulu hi ndlela yo kari. Ka xiyimo lexo, a nuna kutani sati loyi a nga mhangweni a nga ha ti mahela xiboho xa lezaku kuzilava a ndlela yinwe ntsena ya “ku ingisa Nungungulu ku hunza ku ingisa vanhu” ku hambana naye hi nayo. — Mitiro 5:29.

Ka ziyimo zontlhe zo nonoha nguvu zo kota lezi ha ha hiko ku wulawula hi zona, a ku na munhu a faneleko ku kurumeta loyi a nga hava nanzu lezaku a hambana kutani ku simama ni nuna kutani sati wakwe. Hambu lezi a vanghana vo buva hi tlhelo ga moya ni madota va nga ha nyikako wusungukati gi seketelweko ka Biblia, a va nge zi tivi hi kumbhelela lezi zi humelelako xikari ka nuna ni sati. Hi Jehova ntsena a zi kotako ku zi wona. Hakunene, a sati a nga muKristu i wa nga ta ngha a dzunza Nungungulu kutani a lulamiselo ga wukati loku i wo engetela a kubinza ka zikarato zakwe za laha mutini ntsena hi ku fela ku hanya na a hambene ni nuna wakwe, ge hambu loku ku hi nuna a mahako lezo. Jehova wa ti tiva a tipulani tontlhe xungetano hi kuhambana, hambu loku munhu a zama ku ti fihla. Hakunene, “zontlhe zi vululwe ziku dlunya mahlweni ya yena loyi hi ta nga ti hlamulela mahlweni kakwe.” (Maheberu 4:13) Kanilezi loku a xiyimo xo kari xa mhango nguvu xi simama, a ku na munhu a faneleko ku sola a muKristu loyi a ti mahelako xiboho xa ku hambana ni nuna kutani sati wakwe hi kuva a mbhelelwe hi tindlela tontlhe ta ku lulamisa a xikarato xabye. Hi kugumesa, “a munwe ni munwani wa hina i ta ti hlamulela mahlweni ka Nungungulu.” — Va Le Roma 14:10-12.