U alakanya yini hi wumanziko?

LEZI A BIBLIA GI ZI WULAKO

“Nungungulu . . . i ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa; hakuva a zilo zo sangula zi hunzile.” — Kuvululelwa 21:3, 4.

LEZI U ZI BHINZULAKO HI KU KHOLWA LEZO

U tava ni ntiro wo nyawula ni wo tsakisa. — Isaya 65:21-23.

A mababyi ni kuxaniseka zi nga ta hava kona. — Isaya 25:8; 33:24.

U tava ni wutomi gi nga mbheliko ni go tsakisa, na u hi zinwe ni ngango wa wena ni vanghana. — Tisimu 37:11, 29.

XANA LEZI A BIBLIA GI ZI WULAKO ZA TSUMBEKA HAKUNENE?

Ina, hi zigelo zimbiri hi wutsongwani ga kona:

• Nungungulu wa zi kota ku tatisa lezi a zi tsumbisako. Lomu ka Biblia hi Jehova Nungungulu yece a vitwako “Nyamintamu,” hakuva i na ni ntamu wu nga mbheliko. (Kuvululelwa 15:3) Hikwalaho, yena wa zi kota ku tatisa khwatsi a xitsumbiso xakwe xa ku cica a misava leyi lezaku yiva yinene. Kota lezi a Biblia gi zi wulako, a “zilo zontlhe za koteka ka Nungungulu.” — Mateu 19:26.

• Nungungulu wa xuva ku tatisa zitsumbiso zakwe. Hi xikombiso, Jehova wa ‘xuva’ ku tlhelisela wutomi a vanhu va fileko. — Joba 14:14, 15.

  A Biblia gi komba kambe lezaku Jesu, N’wana wa Nungungulu, i hanyisile vababyi. Hikuyini a mahileko lezo? Hi lezaku yena i wa xuva ku maha lezo. (Marku 1:40, 41) Jesu i kombisile hi kumbhelela a wumunhu ga Dadani wakwe hi ku xuva ku vuna lava va nga hi kuxanisekeni. — Johani 14:9.

  Hikwalaho, ha zi kota ku tiyiseka ku Jehova na Jesu va xuva ku hi vuna lezaku hi ti buza hi wumanziko go tsakisa! — Tisimu 72:12-14; 145:16; 2 Pedro 3:9.