Samueli i lo simama ku maha za zi nene

Kusukela xikhatini lexi Samueli a nga hi nwanana, yena i wa hanya a tlhela a tira tabernakelini, laha a vanhu va ngata kasi ku ta khozela Jehova. Xana wa zi tiva ku zi mahekisile kuyini lezaku Samueli a kumeka tabernakelini? A kuranga, a hi gonze xungetano hi Hana, mamani wa Samueli.

Hi xikhati xo leha, Hana i wa lava n’wana, kanilezi i wa nga mu kumi. Hikwalaho, yena i lo khongela ka Jehova a mu kombela lezaku a mu vuna. Yena i lo tsumbisa lezaku loku a kuma n’wana, i ta mu rumela tabernakelini lezaku a ya hanya kona a tlhela a tira seyo. Jehova i hlamulile mukhongelo wakwe, niku yena i lova ni n’wana wa mufana. Yena i lo mu chula vito ga Samueli. Niku kota lezi Hana a nga zi tsumbisile, loku Samueli a mahile malembe manharu kutani mune, yena i lo mu yisa tabernakelini kasi ku ya tirela Nungungulu na a tshama hi kwaseyo.

Eli i wa hi yena mupristi wa hombe le tabernakelini. A vana vakwe va vambiri va majaha vonawu va wa tira kwaseyo. Alakanya lezaku a tabernakeli gi wa hi yindlu ya Nungungulu ya wukhozeli, niku ku wa rinzelwa lezaku a vanhu va tirako seyo va maha zilo za zi nene. Kanilezi a vana va Eli va wa maha zilo zo biha nguvu. Samueli i wa zi wona lezi va nga kari va maha. Xana Samueli i mahile zilo zo biha a ku fana ni vana va Eli? — Ahihi, yena i lo simama ku maha lezi zi nga zi nene, kota lezi a vapswali vakwe va nga mu gonzisile.

Zini lezi Eli a nga fanele ku maha xungetano hi vana vakwe va vambiri? — Yena i wa fanele ku va tsayisa, a tlhela a nga ha va vumeleli ku tira ndlwini ya Nungungulu. Kanilezi, Eli a nga mahangi lezo, hikwalaho Jehova i lo zangarela Eli ni vana vakwe va vambiri. Jehova i lo boha ku va tsayisa.

Ka wusiku go kari na Samueli a etlele, yena i lozwa wokari na a mu vitana aku: ‘Samueli!’ Yena i lo tsutsuma aya ka Eli, kanilezi Eli i te ngalo: “A nzi ku vitanangi, nwananga.” Lezo zi lo tlhela zi maheka hi zikhati zimbiri. Anzhako ka khati ga wunharu, Eli i lo byela Samueli lezaku loku a tshuka a vitaniwa kambe, i fanele ku wula lezi: ‘Maha wuxinji, Jehova, wulawula; nza kuzwa.’ Hi zalezo a nga maha Samueli. Jehova i te ngalo ka Samueli: ‘Byela Eli lezaku nzi ta tsayisa yena ni ngango wakwe hi kota ya zilo zo biha lezi va mahako.’ Xana u alakanya lezaku zi wa vevuka ku Samueli a mu byela mahungu lawa Eli? — Ahihi, zi wa nga vevuki. Hambu lezi Samueli a nga chava, yena i lo maha lezi a nga byelilwe hi Jehova. Lezi Jehova a nga zi wula zi mahekile. A vana va vambiri va Eli va delwe niku Eli yenawu i lofa.

Samueli xikombiso xi nene ka hina. Yena i wa maha za zi nene hambu loku a wona vanwani vanhu na va maha zilo zo biha. Ahati wena ke? Xana wenawu u nga fana na Samueli u tlhela u simama ku maha za zi nene? Loku u maha lezo, u ta tsakisa Jehova, u tlhela u tsakisa vapswali va wena.