Jehovha a wulawula na Samuweli

Eli, a Mupristi wa Hombe, i wa hi ni vafana vambiri va nga tira lomu tabhernakelini kota vapristi. A mavito yabye ku wa hi Hofeni na Fineyasi. Va wa nga ingisi milayo ya Jehovha niku va wa khoma vanhu hi ndlela ya xapi. Loku a vaIzrayeli va famba ni zvifuyo va ya maha miphahlo ka Jehovha, Hofeni na Fineyasi, va wa langa nyama leyi ya yinene ya kona vaga. Eli i nozwa lezvi a vafana vakwe va nga kari va maha, kanilezvi a nga mahangi nchumu. Xana Jehovha i wa ta zvi tsika zvi simama?

Hambu lezvi Samuweli a nga hi n’wanana nguvhu ka Hofeni na Fineyasi, a nga va pimanyisangi. Jehovha i wa xalala hi Samuweli. Ka wusiku go kari, Samuweli na a etlele, i nozwa gezu na gi mu vitana. I no vhuka a tsutsuma a ya ka Eli, a yaku: ‘Hi mina loyi, ndzi chikele’! Eli aku: ‘A ndzi ku vitanangi. Tlhela u ya etlela’. Samuweli i no tlhela a ya etlela. Zvi no tlhela zvi phinda kambe. A cikhati leci Samuweli a ngazwa gezu lego hi khati ga wunharu, Eli i no pola lezvaku ku wa hi Jehovha a nga kari a vitana Samuweli. Eli i no byela Samuweli aku loku a gezu lego gi tlhela gi mu vitana kambe, i wa wule ku: ‘Wulawula Jehovha, a nandza ga wena ga ku ingisela’.

Samuweli i no tlhela a ya etlela. Makunu a gezu lego gi no zwala kambe, giku: ‘Samuweli! Samuweli!’ Yena aku: ‘Wulawula, hakuva a nandza ga wena ga ku ingisela’. Jehovha aku: ‘Byela Eli lezvaku ndzi lava ku mu tsayisa, yena ni ngango wakwe. Wa zvi tiva lezvaku a vafana vakwe va maha zvilo zvo biha lomu tabhernakelini ga mina, kanilezvi o va tsika — a nga mahi nchumu’. Ni mixo ya kona, Samuweli i no vhulula tivati ta tabhernakeli kota lezvi a nga tolovela ku maha. I wa chava ku byela Eli, a Mupristi wa Hombe, lezvi Jehovha a nga wulile. Kanilezvi Eli i no mu vitana a ta mu wutisa, aku: ‘N’wananga, zvini a nga wula Jehovha? Ndzi byele zvontlhe’. Hikwalaho, Samuweli i no mu byela zvontlhe.

Laha Samuweli a ngaya a kula, Jehovha i no simama ku mu vhuna. Lomu tikweni gontlhe, a vaIzrayeli va wa zvi tiva lezvaku Jehovha i hlawulile Samuweli kasi ava muphrofeti ni mulamuli.