Vona va tsalile xungetano hi Jesu

Xana wa va wona a vavanuna lava laha ka mufananiso? — Hi Mateu, Marku, Luka, Johani, Pedro, Jakobe, Juda, na Paule. A vavanuna lava vontlhe va hanyile xikhatini xa Jesu, niku vona va lo tsala xungetano hi Jesu. A hi gonze zinwani xungetano hi vona.

A vanharu vabye va wa hi vapostoli va nga xumayela zinwe na Jesu. Xana wa va tiva a vavanuna lavo va vanharu? — Hi Mateu, Johani, na Pedro. Mupostoli Mateu na Johani va wa mu tiva khwatsi Jesu, niku a munwe ni munwani wabye i lo tsala bhuku xungetano hi wutomi ga Jesu. Mupostoli Johani i lo tlhela a tsala bhuku gi vitwako Kuvululelwa ni mapapilo manharu ma vitwako Johani wo Ranga, Johani wa Wumbiri, ni Johani wa Wunharu. Mupostoli Pedro i tsalile mapapilo mambiri lawa ma nga lomu ka Biblia. Wona ma vitaniwa ku Pedro wo Ranga ni Pedro wa Wumbiri. Ka papilo gakwe ga wumbiri, Pedro i tsalile xungetano hi xikhati lexi Jehova a nga wulawula hi Jesu na a hi le tilweni aku: ‘Loyi i n’wana wa mina. Nza mu ranza, niku nza tizwa matshanza hi yena.’

A vavanuna vanwani lava va nga laha ka mufananiso, vonawu va hi gonzisa zokari xungetano hi Jesu lomu ka mabhuku lawa va nga tsala. A munwe wabye hi Marku. Kuzilava yena i wa hi kona a xikhati lexi Jesu a nga khonwa niku i wonile zontlhe lezi zi nga maheka. A munwani hi Luka. Yena i wa hi dokodela niku kuzilava i vile muKristu anzhako ka kufa ka Jesu.

A vanwani vatsali va Biblia va vambiri lava u va wonako laha ka mufananiso tinzisana ta Jesu. Xana wa ma tiva a mavito yabye? — A mavito yabye hi Jakobe na Juda. A kusanguleni vona va wa nga kholwi ka Jesu. Vona va zile va alakanya lezaku wa hlanya. Kanilezi anzhako ka xikhati va kholwile ka Jesu, va tlhela va maha maKristu.

A mutsali wa Biblia wo gumesa loyi u mu wonako laha ka mufananiso hi Paule. Na a nga seva muKristu, a vito gakwe i wa hi Saule. Yena i wa venga maKristu a tlhela a ma xanisa nguvu. Xana wa zi tiva lezi zi nga maha Paule a lava kuva muKristu? — Ka siku go kari, na Paule a enza, hi xitshuketi i lozwa wokari le tilweni na a mu angula. Ku wa hi Jesu! Yena i lo wutisa lezi ka Paule: ‘Hikuyini u xanisako lava va kholwako ka mina?’ Anzhako ka lezo, Paule i lo cica a maha muKristu. Paule i tsalile 14 wa mabhuku ya Biblia, kusukela ka Va Le Roma kala ka Maheberu.

Ha lera a Biblia siku ni siku, a hi zona? — Hi ku lera a Biblia, hi gonza zotala xungetano hi Jesu. Xana wa zi lava ku gonza zinwani xungetano hi Jesu? —