Va xaxametilwe lezaku va tirela a “Nungungulu wa kurula”

1, 2. Kucica muni loku a Zion’s Watch Tower a vileko nako hi Janeiro wa 1895, niku xana a vamakabye va ku wonisile kuyini?

A XIKHATI lexi John A. Bohnet, a Xigonzani xo hiseka xa Biblia, a nga amukela a revista gakwe Zion’s Watch Tower ga Janeiro wa 1895 i lo tala hi kuhlamala. A revista lego gi wa hi ni kapa yiswa yo hatima — yi nga hi ni xikombiso xa yindlu yo tlakuka yi nga hi ni kandiya yo komba ndlela a zitimela leyi yi nga kari yi woninga munyameni. A kapa leyi ya yiswa yi wa vitanwa ku “Kucuwukeka ka hina ka kuswa.”

² Na a hlamala nguvu, makabye Bohnet i lo tsalela papilo makabye Russell aku: “Nza bonga hi ku wona a Watch Tower na a sasekile. I sasekile nguvu.” A Xigonzani xinwani xo tsumbeka xa Biblia, John H. Brown, xi tsalile lezi xungetano hi kapa leyo: “Ya hlamalisa nguvu. A xiseketelo xa khokhola xi simama xi tiyile hambu loku xi biwa hi mabyandlati.” A kapa leyo ya yiswa yive kucica ko sangula loku a vamakabye va hina va ku wonileko lembe lego — kanilezi ku wa nga hi ko gumesa. Hi Novembro wa lembe lego va wonile a kucica kunwani ka hombe. Za hlamalisa, hakuva a kucica loko konawu ku wa yelana ni bimbi gi nga kwatile.

3, 4. Xikarato muni ku wulawulilweko hi xona ka Watch Tower wa 15 ka Novembro wa 1895, niku kucica muni ka hombe loku ku tivisilweko?

³ A nzima yo leha yi humesilweko ka Watch Tower wa 15 ka Novembro wa 1895 yi tlhamusele a xikarato xo kari: A mabyandlati ma kwatileko ya bimbi ma wa onha a kurula ka hlengeletano ya Zigonzani za Biblia. A vamakabye va wa tshamela ku phikizana xungetano hi ku hi mani a faneleko ku rangela a bandla. Kasi ku vuna a vamakabye a ku wona lezi zi lavekako lezaku ku fuviswa a kuavana ni moya wa kuphikizana, a nzima leyo yi fananisile a hlengeletano ni xitimela. Yi tlhela yi vumela lezaku a varangeli va hlengeletano va tsanzekile ku longisela a xitimela xo fananisa lezaku xi yimisana ni bhubhutsa. Zini zi nga fanele ku mahiwa?

⁴ A nzima leyo yi wulile lezaku a nduna yi nene ya vamarinyero yi fanele ku tiyiseka lezaku a masalva-vida ma kona lomu xitimeleni ni lezaku a ntlawa wontlhe wu tirisanako naye wu longile ku maha xokari kasi ku pona loku kuta bhubhutsa. Hi kufanana, lava va rangelako a hlengeletano va fanele ku tiyiseka lezaku a mabandla wontlhe ma longile ku yimisana ni ziyimo zo binza zo fana ni bhubhutsa. Kasi zi koteka, a nzima yi tivisile lezaku ku wa tava ni kucica ka hombe nguvu. Yi te, “ka tontlhe tikoponi ku fanele ku hlawuliwa madota” lezaku “‘ma rangela’ a ntlhambi,” a nzima leyo yi tlhelile yi wula lezaku a xitiviso lexi xi fanele ku tekela ku tira. —  Miti. 20:28.

5. a) Hikuyini a lulamiselo go sangula ga wudota gi chikeleko hi xikhati xi faneleko? b) Ziwutiso muni hi to zi kambisisa?

⁵ A lulamiselo ga madota give zambo gi tekilweko hi xikhati xi faneleko lezaku a mabandla ma tiya khwatsi. Gi vunile a vamakabye va hina a ku yimisana khwatsi ni bhubhutsa legi gi vangilweko hi Yimpi yo Sangula ya Misava. Ka makume ya malembe lawa ma nga lanzela, a kuchukwatiswa ka hlengeletano loku ku nga simama ku vunile a vanhu va Nungungulu lezaku va longiselelwa khwatsi a ku tirela Jehova. Xiprofeto muni xa Biblia xi wulawulako hi kuchukwatiswa loko? Kucica muni ka hlengeletano u ku wonileko hi mahlo? Ku ku vunisile kuyini?

“Nzi ta veka kurula a kuva mufumeli wa wena”

6, 7. a) Hi wihi a tlhamuselo wa Isaya 60:17? b) Xana a magezu “mufumeli” ni “nwinyi” ma komba yini?

⁶ Kota lezi hi wulawulileko hi zona ka Xipimo 9 xa bhuku legi, Isaya i profetile lezaku Jehova i wa ta katekisa a vanhu vakwe hi kuanza ka hombe nguvu. (Isa. 60:22) Kanilezi Jehova i tsumbisile ku maha za hombe ku hunza lezo. Ka xiprofeto xalexi xa xinwe, yena i te ngalo: “Wutshanwini ga suku nzi ta neha nzalama, ni wutshanwini ga xiketse nzi ta neha siliva, a suku wutshanwini ga tisinya ni xiketse wutshanwini ga maribye. Nzi ta veka kurula a kuva mufumeli wa wena, ni nongameto a kuva nwinyi wa wena.” (Isa. 60:17) Xana a xiprofeto lexi xi wula yini? Xana xi tatisekisa kuyini nyamutlha?

⁷ A xiprofeto lexi xa Isaya xi wula lezaku a zokari zi ta valetwa hi zinwani. Kanilezi, wona lezaku a kuvaletwa loko ku wula kucica, na ku nga hi hi ka zo biha ziya ka za zi nene, kanilezi hi ka za zi nene ziya ka za chukwana. A ku valeta a suku hi nzalama ku chukwatiswa, niku za fana ni ka lezi zinwani zi xaxametilweko. Hi ndlela leyo, Jehova i tirisile a mufananiso lowu lezaku a profeta ku a matshamela ya vanhu vakwe ma ta chukwata hi kutsongwani-kutsongwani. Makunu, xana a xiprofeto lexo xi wula a kuchukwatiswa ka yini? Loku a kumbuka “mufumeli” ni “nwinyi,” Jehova i kombile a kuchukwatiswa loku ku nga wa ta maheka xikari ka vanhu vakwe xungetano hi lezi va hlayisiswako zona ni ku xaxametwa.

8. a) Xana a kuchukwatiswa loku ku kumbukiwako ka xiprofeto xa Isaya ku vangiwa hi mani? b) Hi vunekisa kuyini hi kuchukwatiswa loko? (Wona kambe a kwadru “I vumelile ku kawukiwa hi kutikoramisa.”)

⁸ Himani a nga wa ta vanga a kuchukwatiswa loko ka hlengeletano? Jehova i ngalo: “Nzi ta neha nzalama, . . . Nzi ta neha siliva, . . . ” niku “nzi ta veka kurula.” Hakunene, a kuchukwatiswa ka maxaxametelwa ya bandla ku vangiwa hi Jehova wutsumbu na ku nga hi hi mizamo ya vanhu. Niku kusukela loku Jesu a yimisilwe kota Hosi, Jehova i vanga a kuchukwatisa loko hi ku tirisa a N’wana wakwe. Xana hi vunekisa kuyini hi kuchukwatiswa loko? A vesi galegi gi tlhela gi wula lezaku a kuchukwatiswa ku wa ta neha “kurula” ni “nongameto.” Loku hi vumela a wurangeli ga Nungungulu hi tlhela hi cica lezi zi lavekako, hi ti buza hi kurula niku a kuranza ka hina a kululama ku hi kuca ku tirela Jehova, loyi mupostoli Paule a mu tlhamuseleko kota “Nungungulu wa kurula.” — Fil. 4:9.

9. Hi xihi a xiseketelo xi faneleko xa kululama ni wumunwe ga bandla, niku hikuyini?

⁹ Xungetano hi Jehova, Paule i tlhelile a tsala lezi: “Nungungulu a hi Nungungulu wa woyonga, kanilezi wa kurula.” (1 Kor. 14:33) Wona lezaku Paule i wa nga hambanyisi a woyonga ni kululama, kanilezi i wa yi hambanyisa ni kurula. Hikuyini? Alakanyela lezi: A hi zikhati zontlhe lezi a kululama koce ku nehako kurula. Hi xikombiso, a ntlawa wa masochwa wu nga ha marxara hi ndlela yo lulama wuya kulweni, kanilezi a kululama loko a ku vangi kurula, ku vanga yimpi. Hikwalaho, kota maKristu, hi lava ku alakanya a mhaka leyi ya lisima: Zontlhe lezi zi mahiwako hi nayo kanilezi na zi nga hi na xiseketelo xa kurula zi gumesa hi ku fayela. Kanilezi, a kurula ku kuciwako hi Nungungulu ku vuvumisa a kululama ka pinzukelwa. Hizalezo, a ho ku bonga hi lezi a hlengeletano ya hina yi fambisiwako yi tlhela yi chukwatiswa hi “Nungungulu wa kurula”! (Rom. 15:33) A kurula ku nyikwako hi Nungungulu ku wumba xiseketelo xa kululama ku vunako ni wumunwe legi hi ti buzako hi gona ni ku gi tsakela mabandleni ya hina misaveni yontlhe. — Tis. 29:11.

10. a) Kuchukwatiswa muni ku mahekileko hlengeletanweni ya hina malembeni ya yona yo sangula? (Wona a kwadru “Kuchukwatiswa ka wuwoneleli.”) b) Ziwutiso muni hi to zi kambisisa zalezi?

¹⁰ A kwadru “Kuchukwatiswa ka wuwoneleli” gi komba a kucica ku bhinzulako loku ku mahekileko hlengeletanweni ya hina na ya ha sangula xikhatini xa hina. Kanilezi, kucica muni ‘ka suku lezaku yiva nzalama’ loku Jehova a ku vangileko malembeni lawa yo gumesa hi ku tirisa a Hosi ya hina? Xana a kucica nzeni ka wurangeli ku tiyisisile kuyini a kurula ni wumunwe ga mabandla misaveni yontlhe? Ku ku vunisa kuyini wena wutsumbu lezaku u tirela a “Nungungulu wa kurula” ke?

Lezi Kristu a rangelisako zona a bandla

11. a) Kucica muni ka mazwisisela loku ku kotekileko hi kota ya kugonziwa ka Mitsalo? b) Zini lezi a vamakabye va hubye yi fumako va nga ti yimisele ku maha?

¹¹ Kusukela 1964 kala 1971, a hubye yi fumako yi wonelele a tsima ga ku gonza a Biblia hi kuetileko kasi ku kambisisa a timhaka to kota lezi a bandla ga wuKristu ga zana ga malembe go sangula gi nga kari gi tirisa zonaa. Xungetano hi lezi gi nga xaxametisilwe zona, a xigonzo lexo xi kombile lezaku a mabandla ya zana ga malembe go sangula ma wa wonelelwa hi hubye ya madota, na ku nga hi hi dota kutani muwoneleli munwe. (Gonza Va Le Filipi 1:1; 1 Timote 4:14.) A xikhati lexi yi nga zwisisa khwatsi a mhaka leyo, a hubye yi fumako yi wonile lezaku a Hosi ya yona, Jesu, yi wa va rangela lezaku va chukwatisa zokari ka ndlela leyi a vanhu va Nungungulu va xaxametilweko ha yona — niku a vamakabye va hubye yi fumako va wa ti yimisele ku lanzela a wurangeli ga Hosi. Va lo tekela ku cica zokari hlengeletanweni kasi ku lanzela khwatsi a xikombiso xi nyikiwako hi Mitsalo xungetano hi kuyimiswa ka madota. Kucica muni ku mahilweko kusanguleni ka va 1970?

12. a) Kucica muni ku mahekileko nzeni ka hubye yi fumako? b) Tlhamusela lezi a Hubye yi Fumako yi xaxametisilweko zona makunu. (Wona a kwadru “Lezi a Hubye yi Fumako yi khatalelisako zona a zilaveko za Mufumo.”)

¹² A kucica ko sangula ku mahekile hubyeni yi fumako. Kala xikhatini lexo, a ntlawa lowo wa vamakabye va totilweko wu wa wumbiwa hi ntlhanu wa ziro ni zimbiri za varangeli va Sociedade Torre de Vigia de Bíblias e Tratados de Pensilvânia. Kanilezi, hi 1971, a hubye yi fumako yi lo engetela ziro hi ka 7 zi maha 11 niku yi lo hambanyiswa ni wurangeli ga Sociedade Torre de Vigia. Ku wa nga hi na xiro xa hubye yi fumako xi nga ti wona kota xa hombe ku hunza vanwani niku va lo sangula ku teketana ka wurangeli ga hubye lembe ni lembe hi ku lanzela a maletela ya mavito yabye kusukela A kala Z.

13. a) I lulamiselo muni legi gi nga tira hi 40 wa malembe? b) Zini lezi a Hubye yi Fumako yi zi mahileko hi 1972?

¹³ A kucica ku lanzeleko ku khumbile mabandla. Hi ndlela muni? Kusukela 1932 kala 1972, a bandla gi wa wonelelwa nguvunguvu hi makabye munwe wa xinuna. Kala 1936, a makabye loye a yimisilweko i wa vitanwa ku murangeli wa ntiro. Anzhako ka lezo, a vito lego gi lo ciciwa giva nanza ga koponi, gi tlhela gi ciciwa kambe giva nanza ga bandla, niku hi kugumesa gi lova muwoneleli wa bandla. A vamakabye lavo va yimisilweko va wa khatalela nguvu a kutshamiseka ka moya ka ntlhambi. A kutala ka zikhati a muwoneleli wa bandla i wa maha ziboho zi khumbako bandla na a nga sangulangi hi ku wutisa a malanza manwani ya bandla lego. Kanilezi, hi 1972, a Hubye yi Fumako yi longisele ndlela yi nehileko kucica ko hlamalisa. Xana a kucica loko ku wa patsa yini?

14. a) I lulamiselo muni ga giswa legi gi sangulileko ku tira hi 1 ka Outubro wa 1972? b) Xana a mutlhanganyisi wa hubye ya madota i gi tirisisa kuyini a wusungukati ga Va Le Filipi 2:3?

¹⁴ Wutshanwini ga ku kuva makabye munwe ntsena a tirako kota muwoneleli ka bandla ginwe ni ginwani, makunu ku wa ta yimiswa vanwani vamakabye va xinuna va ringanelwako hi kuya hi Mitsalo lezaku va tirawu kota madota ya wuKristu, na zi mahiwa hi ndlela ya Nungungulu. A madota lawo ma wa ta wumba a hubye ya madota leyi yi nga wa ta wonelela a bandla lego. A lulamiselo lego ga madota gi sangulile ku tira hi 1 ka Outubro wa 1972. Inyamutlha, a mutlhanganyisi wa hubye ya madota a nga ti woni na a hi wa lisima ku hunza madota manwani, kanilezi kota “loyi a nga tsongwani.” (Luka 9:48) Hakunene a vamakabye lava vo ti koramisa makatekwa ka wumakabye ga hina ga misava yontlhe! — Fil. 2:3.

15. a) Xana a lulamiselo ga lezaku a mabandla mava ni hubye ya madota gi nehile mabhinzu muni? b) Zini zi kombako lezaku a Hosi ya hina yi mahile zilo hi wutlhari?

¹⁵ A lulamiselo ga ku nyika wutihlamuleli ga bandla a ziro za tihubye ta madota give kuchukwatiswa ka hombe. Wona zilo zinharu zi bhinzulwako: Xa kusangula ni xa lisima ka zontlhe, a lulamiselo legi gi vuna a madota wontlhe — na ku nga khataliseki a wutihlamuleli legi va nga nago lomu bandleni — a ku alakanya lezaku Jesu hi yena Hloko ya Bandla. (Efe. 5:23) Xa wumbiri, kota lezi Mavingu 15:22 a wulako: “A zikungo . . . za tiya hi kutala ka masungukati.” A xikhati lexi a madota ma wutisanako a timhaka ti khumbako kutshamiseka ka moya ka bandla ma tlhela ma chela kota hi mawonela ya munwe ni munwani wabye, ma vuniwa ku maha ziboho zi zwananako ni matshinya ya milayo ya Biblia. (Mav. 27:17) Jehova wa zi katekisa a ziboho lezo, niku lezo zi maha lezaku a bandla gi simama gi kula. Xa wunharu, kota lezi ku nga ni vamakabye vo tala va ringanelwako va tirako kota madota, a hlengeletano ya zi kota ku yimisana khwatsi ni xilaveko lexi xi yako xi engeteleka xa ku wonelela ni ku risa mabandla. (Isa. 60:3-5) Ehleketa hi lezi — a hlayo ya mabandla ya misava yontlhe yi engetelekile hi ka ku hunza 27.000 hi 1971 yiya ka ku hunza 113.000 hi 2013! Zi la su dlunya lezaku, hi wutlhari, a Hosi ya hina yi kumekisa a varisi hi xikhati xi faneleko lezaku va risa a valanzeli va yona. — Mik. 5:5.

“Mu maha zikombiso ka ntlhambi”

16. a) Wutihlamuleli muni legi a madota ma nga nago? b) Xana a Zigonzani za Biblia zi gi wonisile kuyini a wusungukati ga Jesu ga ‘ku risa a tiyivu’?

¹⁶ Masikwini yo sangula ya Zigonzani za Biblia, a madota ma wa sina ma zi zwisisa lezaku ma na ni wutihlamuleli ga ku vuna a vamakabye vabye a ku simama vava malanza ya Nungungulu. (Gonza Va Le Galatia 6:10.) Hi 1908, a nzima yo kari yi humesilweko ka Watch Tower yi wulawulile hi xileletelo xa Jesu xa ku: “Risa tiyivana ta mina.” (Joh. 21:15-17) A nzima yi te ngalo ka madota: Za lisima nguvu lezaku a xileletelo xa Hosi xungetano hi ntlhambi xiva xa lisima timbilwini ta hina, hi komba hi kufaneleko lezaku ha gi nyika lisima a lungelo legi ga hombe ga ku gisa ni ku hlayisa a valanzeli va Hosi.” Hi 1925, The Watch Tower i tlhelile a khanyisa a lisima la ku tira kota varisi hi ku alakanyisa lezi a madota: “A chechi nja Nungungulu wutsumbu, . . . niku vontlhe lava va nga ni lungelo ga ku tirela a vamakabye vabye va ta ti hlamulela kakwe.”

17. Xana a vawoneleli va vuniswa kuyini a ku maha varisi va nene?

¹⁷ Xana a hlengeletano ya Jehova yi ma vunisile kuyini a madota a ku chukwatisa a wuzikoti ga wona go risa gi suka ka ‘xiketse giya ka siliva’ ke? Hi ku ma nyika gonziselelo. Hi 1959, ku mahilwe a Xikola xo sangula xa Wutireli ga Mufumo ka vawoneleli. Ka xinwe xa zipanze za xona ku wulawulilwe hi ku “Khatalela vanhu hi munwe munwe.” A vamakabye lavo va nga ni wutihlamuleli va kucilwe ku “ti mahela longoloko wa ku vuxela a vahuweleli mitini yabye.” A xipanze lexo xi kombile lezi a varisi va nga mahisako zona a tienzo ti akako. Hi 1966, ku sangulile a Xikola xa Wutireli ga Mufumo xi chukwatisilweko. Xi lo wulawula hi “Lisima la ntiro wa wurisi.” Yi wa hi yihi a mhaka-tshinya ya xipanze lexo? Lava va rangelako mabandleni “va fanele ku khatalela a ntlhambi wa Nungungulu hi liranzo, va tlhela va nga tsiki ku khatalela a mingango ya vona venyi hi kufaneleko zinwe ni ntiro wa simu.” Ka malembana lawa, ka mahiwa zikola za madota zo engeteleka. Hi wahi a mabhinzu ya gonziselelo ya simasima leyi a hlengeletano ya Jehova yi tako na yi nyika madota? Nyamutlha, a bandla ga wuKristu gi na ni makume ya mazana ya vamakabye va xinuna va ringanelwako ku tira kota varisi va moya.

18. a) Wutihlamuleli muni ga lisima nguvu legi a madota ma nyikilweko? b) Hikuyini Jehova na Jesu va ma ranzako a madota lawa ma tirako hi kutikarata?

¹⁸ A madota ya wuKristu ma yimisilwe hi Jehova hi ku tirisa a Hosi ya hina, Jesu, lezaku ma maha a ntiro wa lisima nguvu. I ntiro muni walowo? Ku rangela a tiyivu ta Nungungulu xikhatini lexi xo karata nguvu ka zontlhe matinwini. (Efe. 4:11, 12; 2 Tim. 3:1) Jehova na Jesu va ma tsakela nguvu a madota ma tirako hi kutikarata hakuva a vamakabye lavo va ingisa a wusungukati legi ga Mitsalo: “Risani a ntlhambi wa Nungungulu lowu mu nga nawo, . . . hi ku zi ranza; . . .  hi matsenya; . . . mu maha zikombiso ka ntlhambi.” (1 Ped. 5:2, 3) A hi woneni a timbiri xikari ka tindlela to tala leti a varisi va wuKristu va mahako zikombiso ha tona ka ntlhambi va tlhela va vuna nguvu lezaku kuva ni kurula ni litsako bandleni.

Lezi a madota ma risisako zona a ntlhambi wa Nungungulu inyamutlha

19. Xana hi ti zwisa kuyini hi madota lawa ma hi pangalatako ntirweni wa simu?

¹⁹ A kuranga, a madota ma tira ni ziro za bandla. Luka, a mutsali wa Ivangeli, i tsalile lezi xungetano hi Jesu: “I lo nzulanzula mitini ni zimitaneni, na a kanela ni ku tlhatlhambutela ivangeli ya mufumo wa Nungungulu, ni vakhume ni vambiri va wa hi zinwe naye.” (Luka 8:1) A ku fana ni lezi Jesu a nga kari a xumayela zinwe ni vapostoli vakwe, a madota ma nga zikombiso zi nene inyamutlha ma tirawu zinwe ni makholwa-kulobye ntirweni wa kuxumayela. Ma zi tiva lezaku loku ma maha lezo, ma vuna lezaku kuva ni moya wu nene lomu bandleni. Xana a ziro za bandla zi ti zwisa kuyini hi madota lawo? Jeannine, a nga makabye wa xisati a nga kumbheleni ka malembe ya wu 80, i ngalo: “A ku tira zinwe ni dota ntirweni wa simu zi nzi nyika lungelo gi nene ga ku bhula nago nzi tlhela nzi gi tiva khwatsi.” Steven, a nga makabye wa xinuna a nga xikari ka malembe ya wu 30, i ngalo: “Loku a dota gi tira na mina hi muti ni muti, nzi alakanya ku go lava ku nzi vuna. A ku nyikwa xivuno lexo za nzi tsakisa nguvu.”

20, 21. Xana a madota ma nga pimanyisisa kuyini a murisi wa lomu mufananisweni wa Jesu? Nyika xikombiso. (Wona kambe a kwadru “Maenzo ma bhinzulako ya viki ni viki.”)

²⁰ Ya wumbiri, a hlengeletano ya Jehova ya gonzisa madota lezaku ma khatalela lava va ti hambanyisileko ni bandla. (Maheb. 12:12) Hikuyini a madota ma faneleko ku vuna vanhu lavo va gome, niku ma fanele ku zi mahisa kuyini? A mufananiso wa Jesu xungetano hi murisi ni yivu yi lahlekileko wa nyika hlamulo. (Gonza Luka 15:4-7.) Loku a murisi loye a wona lezaku ka kiyela yivu, i yi lavetelisa ku khwatsi hi yona yoce a nga nayo. Xana a madota ya wuKristu inyamutlha ma nga xi pimanyisisa kuyini a xikombiso xi vekilweko hi murisi loye? A ku fana ni lezi a yivu leyo yi lahlekileko yi simamako kuva ya lisima ka murisi, lava va ti hambanyisileko ni vanhu va Nungungulu vonawu va simama va hi va lisima ka madota. Va wona a munhu a holileko hi tlhelo ga moya kota yivu yi lahlekileko. A ku hunza lezo, a ku fana ni lezi a murisi a bohako ku “famba a ya lava leyi yi lahlekileko, a kala a yi kuma,” a madota wonawu ma boha ku famba ma lavetela ma tlhela ma vuna lava va holileko.

²¹ Zini lezi a murisi wa lomu mufananisweni a mahako loku a kuma a yivu? Hi liranzo i yi tlakula, a “yi rwala makatleni hi kutsaka,” a yi tlhelisa ntlhambini. Hi kufanana, a magezu yo zwela wusiwana ma humako mbilwini ya dota go kari ma nga tlakula loyi a holileko hi tlhelo ga moya ma tlhela ma mu vuna a ku tlhelela bandleni. Lezo zi mahekele Victor, a nga makabye wa xinuna wa le Afrika loyi a nga nyimile ku hlengela ni bandla. Yena i bika lezi: “Ka 8 wa malembe lawa nzi nga holile, a madota ma simamile ku zama ku nzi vuna.” Zini zi mu khumbileko nguvu? Yena wa tlhamusela: “A siku go kari, John, a dota legi nzi nga gonzile nago a Xikola xa Ntiro wa Wuphayona, i ti karatele ku nzi enzela a tlhela a nzi komba a mifota yo kari leyi hi nga susilwe zinwe xikoleni lexo. A mifota leyo yi nzi alakanyisile zilo zo tala zo saseka laha ka kuza nzi xuva a litsako leli nzi nga hi nalo na nza ha tirela Jehova.” Xikhatanyana nzhako ka ku ngha John a mu enzele, Victor i lo tlhelela bandleni. Zalezi i tira kota phayona. Hakunene a madota yo ti karata ya wuKristu ma hi vuna a kuva hi tsaka. — 2 Kor. 1:24.b

A kuchukwatiswa ka wuwoneleli ku tiyisa a wumunwe ga vanhu va Nungungulu

22. Xana a kululama ni kurula zi tiyisisa kuyini a wumunwe ga bandla ga wuKristu? (Wona kambe a kwadru “Hi khumbekile nguvu.”)

²² Kota lezi zi kombisilweko kusanguleni, Jehova i profetile lezaku a kululama ni kurula zi wa ta simama zi anza xikari ka vanhu va Jehova. (Isa. 60:17) A matshamela lawa ya mambiri ma tiyisa a wumunwe ga mabandla. Hi tindlela muni? Xungetano hi kululama, “Nungungulu wa hina i Jehova munwe.” (Deut. 6:4) A milayo yakwe yo lulama a yi hambani hi ka mabandla ya tiko go kari ziya ka mabandla ya tiko ginwani. A ku hambana ni lezo, a milayo yakwe ya lezi zi nene ni za kubiha yinwe, “mabandleni wontlhe ya vobasa.” (1 Kor. 14:34) Kunene, a bandla gi ta kula ntsena loku ku tirisiwa a milayo ya Nungungulu. Xungetano hi kurula, a Hosi ya hina a yi lavi ntsena lezaku hi ti buza hi kurula lomu bandleni kanilezi yi lava kambe lezaku hi hlota kurula. Hikwalaho, ‘hi hlota lezi zi vangako kurula.’ Hi maha xo kari kasi ku lulamisa a mazunga lawa ma nga ha humelelako xikari ka hina. (Rom. 14:19) Hi ndlela leyo, hi vuvumisa kurula ni wumunwe bandleni ga hina. — Isa. 60:18.

23. Kota malanza ya Jehova, zini hi ti buzako hi zona nyamutlha?

²³ Hi Novembro wa 1895, a xikhati lexi a Watch Tower a nga tivisa a lulamiselo go sangula ga wudota, a vamakabye lava va nga hi ka wurangeli va lo kombisawo a mixuvo yabye ya mbilu. Yi wa hi mixuvo muni? Va wa xuva va tlhela va khongelela lezaku a lulamiselo legi ga giswa ga hlengeletano gi vuna a vanhu va Nungungulu a ku “hatla vava ni wumunwe kukholweni.” Loku hi cuwuka nzhako, ka makume ya malembe ma hunzileko, ha bonga hi ku wona lezaku a kuchukwatiswa ka wurangeli loku ku mahiwako hi Jehova hi ku tirisa a Hosi ya hina hakunene ku tiyisile a wumunwe ga hina ga wukhozeli. (Tis. 99:4) Kota bhinzu ga kona, a vanhu va Jehova misaveni yontlhe inyamutlha va tsaka hi lezi hi fambako “hi moya munwe,” hi lanzela “makanzihelo manwe,” hi tlhela hi tirela a “Nungungulu wa kurula” “hi mbilu yinwe.” — 2 Kor. 12:18; gonza Zefania 3:9.