Lava Nungungulu lezaku a ku vuna kuva ni wukati go tsakisa

Jehovaa Nungungulu hi yena a nga chadisa a vatekani vo sangula. A Biblia gi hi byela lezaku yena i lo vanga a wasati wo sangula “a mu neha ka wanuna.” Adamu i lo tsaka nguvu laha ka kuza aku ngalo: “Loyi hi rambu ga marambu ya mina, ni nyama ya nyama ya mina.” (Genesisi 2:22, 23) Jehova wa ha lava lezaku a vatekani va tsaka.

A xikhati lexi u chadako, kuzilava u nga alakanya lezaku zontlhe zi ta famba khwatsi. Kanilezi a lisine hi lezaku hambu a nuna ni sati lava hakunene va ranzanako nguvu va ta tshuka va yimisana ni zikarato. (1 Va Le Korinte 7:28) Lomu ka broxura legi, u ta kuma matshinya ya milayo ya Biblia lawa ma zi kotako ku neha litsako wukatini ni ngangweni wa wena loku ma tiriswa. — Tisimu 19:8-11.

1 VUMELA A NTIRO LOWU JEHOVA A KU NYIKILEKO

LEZI A BIBLIA GI WULAKO: A nuna hi yena hloko ya ngango. — Va Le Efesusi 5:23.

Loku u hi nuna, Jehova i rinzela lezaku u hlayisa sati wa wena hi matsenya. (1 Pedro 3:7) Yena i mahile wasati lezaku ava muvuni wa wena niku i lava ku u mu hlayisa hi xichawo ni liranzo. (Genesisi 2:18) U fanele ku ranza nguvu sati wa wena laha ka kuza u ti yimisela ku rangisa a kuranza kakwe mahlweni ka loku ka wena wutsumbu. — Va Le Efesusi 5:25-29.

Loku u hi sati, Jehova i rinzela lezaku u kombisa xichawo xo eta ka nuna wa wena u tlhela u mu vuna ku maha a ntiro wakwe. (1 Va Le Korinte 11:3; Va Le Efesusi 5:33) Seketela a ziboho zakwe u tlhela u tirisana naye hi mbilu yontlhe. (Va Le Kolosi 3:18) Loku u maha lezo, u ta saseka mahlweni ka nuna wa wena ni ka Jehova. — 1 Pedro 3:1-6.

LEZI U NGA MAHAKO:

• Wutisa a munghana wa wena wa wukati lezi u nga mahako kasi kuva nuna kutani sati wa chukwana. Ingisela khwatsi, u tlhela u maha zontlhe u zi kotako kasi ku chukwatisa laha ku lavekako

• Ngha uva ni lihlaza-mbilu. Zi ta teka xikhati lezaku hi wumbiri ga nwina mu tiva ku tsakisana

2 KHATALELA A KUTIZWA KA MUNGHANA WA WENA WA WUKATI HI MBILU YONTLHE

LEZI A BIBLIA GI WULAKO: U fanele ku khatalela zilaveko za munghana wa wena wa wukati. (Va Le Filipi 2:3, 4) Wona a munghana wa wena kota munhu wa lisima, na u alakanya ku Jehova i lava lezaku a malanza yakwe ma ‘rula ka vontlhe.’ (2 Timote 2:24) Loku u nga ti woneli, a mawulawulela ya wena ma tava “timhaka ti tlhavako khwatsi i supado.” Hikwalaho, hlawula khwatsi magezu. (Mavingu 12:18) A moya wa Jehova wu ta ku vuna a ku wulawula hi wunene ni liranzo. — Va Le Galatia 5:22, 23; Va Le Kolosi 4:6.

LEZI U NGA MAHAKO:

• Maha mukhongelo u kombela ku vuniwa a ku ti khoma ni ku tlhatlheka na mu nga se bhula zilo zo binza ni munghana wa wena wa wukati

• Ranga hi ku alakanyela khwatsi lezi u to wula ni lezi u to zi wulisa zona

3 NGHA MUVA NI MAALAKANYO MANWE

LEZI A BIBLIA GI WULAKO: A xikhati lexi u chadako, wo maha “nyama yinwe” ni munghana wa wena wa wukati. (Mateu 19:5) Kanilezi ma hi vanhu vambiri va zi kotako kuva ni mawonela yo hambana. Hikwalaho, mu fanele ku gonza kuva ni maalakanyo manwe ni kutizwa kunwe. (Va Le Filipi 2:2) A wumunwe ga lisima nguvu kumaheni ka ziboho. A Biblia gi ngalo a “makungo ma tiyisiwa hi wusungukati.” (Mavingu 20:18) Tsikani a Biblia gi mu rangela a xikhati lexi mu mahako zinwe a ziboho za lisima. — Mavingu 8:32, 33.

LEZI U NGA MAHAKO:

• Loku u bhula ni munghana wa wena wa wukati, u nga mu byeli mahungu ntsena, tlhela u mu byela lezi u ti zwisako zona

• Ranga hi ku bhulisana ni munghana wa wena wa wukati na u nga se maha ziboho