XIPANZE 2

Tsumbeka ka munghana wa wena wa wukati

“Lezi Nungungulu a zi tlhanganyisileko, ngha zi nga hambanyiswi hi munhu.” — Marku 10:9

Jehova i lava lezaku hi tsumbeka. (Tisimu 31:23) Lezo za lisima nguvunguvu wukatini ga wena hakuva hi xalexo xi to mu maha mu tsumbana. Niku a kutsumbana hi kona ku tiyisako liranzo.

Inyamutlha, a kutsumbeka wukatini a ka ha khatalelwi. Lezaku u vikela a wukati ga wena, u fanele ku ti yimisela ku maha zilo zimbiri.

1 RANGISA WUKATI GA WENA KA ZONTLHE

LEZI A BIBLIA GI WULAKO: “Hlawula lezi zi nga zi nene.” (Va Le Filipi 1:10) A wukati ga wena xinwe xa zilo za lisima nguvu ka zontlhe wutomini ga wena. Gi fanele ku khatalelwa nguvu ku hunza zinwani.

Jehova i lava lezaku u khatalela nguvu a munghana wa wena wa wukati mu tlhela mu ‘hanya zinwe hi kutsaka.’ (Mutshawuteli 9:9) Yena i zi wula kubaseni lezaku a wu faneli ku tshuka u maha mihoni kukhataleni loko, niku mu fanele ku hlota tindlela to tsakisana. (1 Va Le Korinte 10:24) A munghana wa wena wa wukati i fanele ku zi tiva lezaku wa mu lava ni ku mu ranza.

A nuna i tisela caya a sati wakwe; a nuna i wuya hi ntirweni a ta kuma a sati wakwe na a bhika

LEZI U NGA MAHAKO:

Ti nyike xikhati xa ku tshama ni munghana wa wena wa wukati, u tlhela u mu khatalela khwatsi xikhatini lexo
Timhakeni tontlhe, alakanyela zilo hi wu “hina” na ku nga hi hi wu “mina”

Nuna ni sati va gako na va hi kuhlakaneni

2 VIKELA A MBILU YA WENA

LEZI A BIBLIA GI WULAKO: “Kani hi mani a cuwukako wasati a mu navela, i sina a bhayile naye mbilwini yakwe.” (Mateu 5:28) Loku a munhu a tshama hi ku alakanyela ku hlengela masango ni munhu a nga hiko munghana wakwe wa wukati, a nga tsumbeki ka munghana wakwe hi ndlela yo kari.

Jehova i ngalo u fanele ku “hlayisa mbilu ya wena.” (Mavingu 4:23; Jeremia 17:9) Kasi ku maha lezo, u fanele ku vikela a mahlo ya wena. (Mateu 5:29, 30) Lanzela a xikombiso xa Joba, a nga hi hloko ya ngango, loyi a nga maha xivumelwano ni mahlo yakwe lezaku a nga tshuki a navela munwani wasati. (Joba 31:1) Ti bohe lezaku u nga tshuki u hlalela zithombe za masango. Tlhela u ti yimisela ku potsa ku navelana ni munhu a nga hiko munghana wa wena wa wukati.

Nuna a vekileko mufota wa sati wakwe mezeni yakwe ya ntiro

LEZI U NGA MAHAKO:

Zi kombise kubaseni lezaku u namarele hi kumbhelela ka munghana wa wena wa wukati
Khatalela a kutizwa ka munghana wa wena wa wukati, u tlhela u tekela ku tsika ku tolovelana ni vontlhe lava a munghana wa wena wa wukati a alakanyako lezaku kuzilava va nga tshuka va mu tekela wutshamu