Ndlela yo gonzisa a n’wana wa wena

A xikhati lexi Jehova a nga vanga ngango, i lo yimisa vapswali lezaku va wonelela a vana vabye. (Va Le Kolosi 3:20) I fanelo ya wena mupswali a ku gonzisa a n’wana wa wena a ku ranza Jehova a tlhela a maha munhu wa hombe a tivako. (2 Timote 1:5; 3:15) A xinwani kambe, u fanele ku tiva lezi zi nga mbilwini ya n’wana wa wena. A xikombiso xa wena xi ta vuna nguvu mhakeni leyo. U nga gonzisa khwatsi n’wana wa wena a Mhaka ya Jehova loku u ranga hi wena u yi chela mbilwini ya wena. — ​Tisimu 40:8.

1 TI KARATELE KUVA WO TSHINELELEKA

LEZI A BIBLIA GI WULAKO: ‘Hatlisa kuzwa, u nonoka ku wulawula.’ (Jakobe 1:19) Handle ko kanakana wa zi lava ku a vana va wena va ku tshinelela na va tlhatlhekile. Vona va fanele ku zi tiva lezaku wena u tlhatlhekile ku vazwa loku va lava ku wulawula. Hlakulelani kurula laha mutini lezaku zi va olovela a ku ti tlhatlha zifuva zabye. (Jakobe 3:18) Loku va alakanya lezaku u ta va bhongela kutani ku va solasola, za koteka ku va chava ku ku tlhatlhela lezi va nga nazo timbilwini. Khoma vana va wena hi lihlaza-mbilu, u tlhela u tshama hi ku va tiyisekisa lezaku wa va ranza. — Mateu 3:17; 1 Va Le Korinte 8:1.

LEZI U NGA MAHAKO:

• Ti nyike xikhati xa ku khatalela vana va wena loku va lava ku wulawula na wena

• Ti nyike xikhati xa ku bhula ni vana va wena hi kukhanzakanya, na ku nga hi ntsena loku ku humelela zikarato

2 ZAMA KU ZWISISA LEZI VA KU BYELAKO

LEZI A BIBLIA GI WULAKO: “Loyi a pimisisako khwatsi mhaka i ta kuma litsako.” (Mavingu 16:20) A xinwani xikhati zi ta lava ku u hlola khwatsi lezi a vanana va wulako kasi ku zwisisa a kutizwa kabye. Zi tolovelekile ku a nwanana a engetela zilo kutani ku wula zilo zi kalako zi nga hi zona lezi a nga lava ku wula. “Loyi a hlamulako mhaka na a nga se ku yizwa, i kombisa wupumbu gakwe.” (Mavingu 18:13) U nga hatliseli ku zangara. — Mavingu 19:11.

LEZI U NGA MAHAKO:

• Maha xiboho xa ku nga tshuki u tsemarisa nwanana loku a kari a wulawula ge hambu ku phuxuka hi zanga, na ku nga khataliseki lexi a wulako

• Zama ku alakanya lezi u nga kari u ti zwisa zona a xikhati u nga hi tangeni yabye ni lezi zi nga hi za lisima ka wena

3 WULANI NCHUMU WUNWE

LEZI A BIBLIA GI WULAKO: “Nwananga, zwana gonziselelo ya dadani wa wena, u nga tsiki a nayo wa nyine wa wena.” (Mavingu 1:8) Jehova i yimisile a raru ni mamani lezaku va wonelela a vana. Mu fanele ku gonzisa vana a ku mu kombisa xichawo ni ku mu ingisa. (Va Le Efesusi 6:1-3) A vanana va zi tiva loku a vapswali va nga hi na ku “zwanana hi kualakanya ni kupima.” (1 Va Le Korinte 1:10) Loku mu hambana kupima, ti karateleni ku nga zi kombisi ka vanana hakuva lezo zi nga daya a xichawo lexi va nga naxo ha nwina kota vapswali.

LEZI U NGA MAHAKO:

• Bhulani mu tlhela mu zwanana hi lezi mu to tsayisisa zona a vana va nwina

• Loku wena ni munghana wa wena wa wukati muva ni mawonela yo hambana mhakeni ya ku gonzisa a vana, zamani ku wona za zi nene ka mawonela ya munwe ni munwani wa nwina

4 ALAKANYELANI A MAGONZISELA NA KA HA HI MAHLWENI

LEZI A BIBLIA GI WULAKO: “Gonzisa nwanana lomu ndleleni leyi a ta nga famba ha yona.” (Mavingu 22:6) A kuhumelela kugonziseni ka vanana va nwina a ku nge koteki halahala. Mu fanele ku alakanyela a magonzisela na ka ha hi mahlweni, a ku patsa ni matsayisela ya kona. (Tisimu 127:4; Mavingu 29:17) A ku tsayisa a hi zona zoce zi vunako vanana a ku zwisisa, zi lava ku mu va vuna a ku tiva a zigelo za milayo mu va vekelako. (Mavingu 28:7) A xinwani, mu fanele ku va gonzisa a ku ranza a Mhaka ya Jehova ni ku zwisisa a matshinya ya yona ya milayo. (Tisimu 1:2) Lezo zi ta va vuna a ku hlakulela a livalo li nene. — Maheberu 5:14.

LEZI U NGA MAHAKO:

• Ti karatele ku maha a vana va wena va wona Nungungulu kota Munhu wa lisine loyi va zi kotako ku mu tsumba

• Va vune a ku tiva va tlhela va potsa a timhango ta mahanyela yo biha, to kota leti ti kumekako lomu ka Internet. Va gonzise ku potsa a vaxakeli va vanana hi tlhelo ga masango