Jesu aya Jerusalema ni vapswali vakwe

Makunu ci wa chikele cikhati ca ku Josefa ni ngango wakwe, ni maxaka, ni vanghana va maha lipfhumba la lembe ni lembe la kuya Jerusalema. Va waya va yaga Phasika, kota lezvi a Nayo wu nga leletela. (Dhewuteronome 16:16) A kusuka Nazareta kala Jerusalema, ku wa hi pfhuka wa cipimo ca 120 wa tikilometro. Leco ci wa hi cikhati ca kutsaka, ni ca ku khomeka hi ku longisela lipfhumba. Jesu, loyi makunu a nga hi ni 12 wa malembe, i ni manyawunyawu hi ku lava kuya ka mubuzo lowo ni thomo lego ga kuva kusuhani ni tempeli.

Ka Jesu ni ka ngango wontlhe, a Phasika gi wa nga hi cimaho ca siku gin’we basi. Loku va gile Phasika, gi waca ku sangula mubuzo wa zvibaba zvi nga hiko na comelo, wa 7 wa masiku. (Marku 14:1) A nguva leyo yontlhe yi wa woniwa kota nguva ya Phasika. A kufamba kusukela Nazareta kaya kabye, ni masiku lawa va nga tshama le Jerusalema, ni ya ku tlhela kaya va wa mbheta cipimo ca mavhiki mambiri. Kanilezvi ka khati legi, va hlwelilenyana ku hundza lezvo, hi kota ya zvokari zvi nga humelela na Jesu. Zvi yelana ni cikarato va nga ci pola a cikhati va nga kari va tlhela kaya.

A cikhati leci va nga kari va tlhela, Josefa na Mariya va wa alakanya lezvaku Jesu i lomu cikari ka maxaka ni vanghana lava va tlhelako navo. Kanilezvi, laha va nga nyima ni wusiku, a va mu kumangi. Hikwalaho, va no sangula ku mu lavetela lomu ka lava va nga famba navo. Kanilezvi, a va mu kumangi kambe! Makunu Josefa na Mariya va no tlhela Jerusalema va ya mu lavetela.

Loku va chikele, va no mu lavetela siku gontlhe va nga mu kumi. Ka siku ga wumbiri kambe a va mu kumangi. Ka siku ga wunharu, hi kona va nga mu kuma makunu! Va mu kumile lomu tempeleni na a tshamile cikari ka vagondzisi va vaJudha. I wo va ingisela, a va maha zviwutiso. Vona va wo hlamala loku vazwa wutlhari gakwe.

Mariya i no wutisa Jesu aku: ‘N’wananga, u hi mahele yini a zva kunghahi ke? Hi nga wona, a papayi wa wena na mina hi wa ku lava na hi xaniseka.’ — Luka 2:48.

Jesu i no hlamala hi lezvi va nga kala va nga zvi tivi a ku va nga mu kuma kwihi. I no va wutisa aku: ‘Mu wa ndzi lavela yini ke? Xana mu wa nga zvi tivi lezvaku ndzi fanele a kuva ndzi hi ndlwini ya Papayi ke?’ — Luka 2:49.

Laha makunu va nga kumene, Jesu i no tlhela kaya le Nazareta na Josefa na Mariya, a ya simama ku va ingisa. I no ya simama ku kula, a tlhela a engetela wutlhari. Hambu lezvi a nga ha hi n’wanana, i wa tsakelwa hi Nungungulu ni vanhu. Kunene, kusukela wun’wananeni, Jesu i nova cikombiso ci nene hi ku rangisa zvilo zva moya ni ku kombisa cichawo hi vapswali vakwe.