Jesu na a ha hi cifanyana

Josefa na Mariya va wa hanya Nazareta na Jesu ni van’wani vana vabye va vafana ni vanhanyana. Josefa i wa tira ku vatla kasi a kuma mali ya ku hlayisa sati ni vana vakwe, a tlhela a va gondzisa ku va tiva Jehovha ni Nayo wakwe. Josefa i wa famba ni ngango wakwe sinagogeni hi kukhandzakanya kasi va ya khozela niku lembe ni lembe, vontlhe va waya Jerusalema kasi va yaga Phasika.

A cikhati leci Jesu a nga hi ni 12 wa malembe, va no famba pfhuka wo leha vaya Jerusalema — kota lezvi va nga tolovela ku maha. A dhoropa gontlhe gi wa tele hi vanhu va nga tela ku taga Phasika. Loku a Phasika gi mbhelile, Josefa na Mariya va no sangula ku tlhela kaya — na va alakanya lezvaku Jesu va naye lomu ntlaweni lowu va nga endza nawo. Kanilezvi, a cikhati leci va nga mu lavetela lomu ka maxaka, a va mu kumangi.

Va no tlhela Jerusalema va ya lavetela n’wana wabye hi masiku manharu. Hi kugumesa, va noya tempeleni. Hi kwalomo Jesu a nga hi kona! Va no mu kuma na a tshamile cikari ka vagondzisi a va ingisela ni ku va maha zviwutiso zvazvinene. A vagondzisi va no mu hlamala nguvhu Jesu laha ka kuza va sangula ku mu maha zviwutiso. Va no hlamala hi lezvi a nga kari a va hlamula kambe. Va zvi wonile lezvaku i wa wu zwisisa a Nayo wa Jehovha.

Josefa na Mariya va wa karatekile nguvhu. Mariya i no byela Jesu, aku: ‘N’wananga, hi ku lavetele kontlhe! U wa hi kwihi’? Jesu aku: ‘Mu wa nga zvi tivi a ku ndzi fanele kuva lomu ndlwini ya Papayi wa mina ke’?

Jesu i no tlhela Nazareta ni vapswali vakwe. Josefa i no mu gondzisa a ntiro wa ku vatla. Hi mawonela ya wena, Jesu i wa hi munhu wa matshamela muni a cikhati leci a nga hi cifanyana? Laha a ngaya a kula, i nova ni wutlhari a tlhela a tsakelwa hi Nungungulu ni vanhu.