Jesu a khatalela tempeli ya Nungungulu

Loku wu mbhelile a muchadho le Kana, Jesu i noya le Kapernawume. I no famba ni mamani wakwe, ni vamakabye vakwe — Jakobe, na Josefa, na Simoni, na Judha.

A dhoropa ga Kapernawume gi wa hi ga hombe niku zvi wa olova ku chikela a ku hundza le ga Nazareta kutani Kana. Makunu Jesu i wa yela yini? A kutala ka vapizani vakwe lava a nga ha hi ku tivana navo, va wa hanya ka dhoropa legi kutani kusuhani nago. Makunu Jesu i wa fela ku va gondzisa kutsongwani na va hi kusuhani ni kaya kabye.

Ndzeni ka cikhati leci Jesu a nga hi kwale Kapernawume, i mahile zvihlamaliso kambe. Hikwalaho, a vanhu vo tala va lomu dhoropeni ni va lomu kusuhani va no zvizwa lezvi a nga kari a maha. Kanilezvi, Jesu ni lava a nga hi navo, va nga hi vanhu va nga hanya hi ciJudha khwatsi, va wa fanele ku hatla vaya Jerusalema kasi va yaga Phasika ga lembe ga 30 Nguveni ya Hina.

Loku va chikele laha tempeleni le Jerusalema, a vapizani va Jesu va no mu wona na a maha nchumu wo hlamalisa, wa ku va wa nga se tshuka va wu wona wutomini gabye.

A Nayo wa Nungungulu wu wa laya lezvaku laha tempeleni ku mahiwa miphahlo hi zvifuyo, niku lava va ka kari vaya le tempeleni va wa fanele ku kuma ca kuga ndzeni ka masiku lawa va nga hi seyo. Hikwalaho, a Nayo wu wa vhumela ku lava va tako hi kule vata ni mali kasi va ta xava hi yona ‘zvifuyo zva hombe ni zva zvitsongwani’ kutani ni cihi va nga wa ta ci lava. (Dhewuteronome 14:24-26) Hi kota ya lezvo, ku wa hi ni vanhu va nga xavisa zvifuyo kutani zvinyanyani na va tshama hi kwalomo tempeleni. Niku a van’wani va kona va wo kalavela vanhu hi ku va cicela hi mali ya lahasi ni ku va dhurisela.

Jesu i no hlamala a tlhela a swireka nguvhu zvonake a halata zvingerengere zvabye, a nikinya timeza tabye tiwa ti hangalakela a tlhela a va hlongola lomu tempeleni, aku: ‘Susani lezvi zvilo laha; a yindlu ya Papayi mu nga yi mahi a yindlu ya mabhindzu.’ — Johani 2:16.

A cikhati leci a vapizani vakwe va nga zvi wona, va no alakanya a ciphrofeto ci wulawulako hi N’wana wa Nungungulu, caku: “A ku pangamela a yindlu ya wena ku ta ndzi n’walata.” Hambulezvo, a vaJudha va no wutisa vaku: ‘Ciwoniso muni leci u hi kombisako ha cona, lezvaku u na ni ntamu wa ku maha zvilo lezvi?’ Jesu i no va hlamula aku: “Hahlulani tempeli leyi, mina ndzi ta yi vhuxa hi masiku manharu.” — Johani 2:17-19; Lisimu 69:9.

A vaJudha va no alakanya lezvaku i wa wula tempeli leyi va nga kari va yi wona kwale Jerusalema. Hikwalaho, va no mu wutisa vaku: A tempeli leyi yi akilwe hi 46 wa malembe, “wena u ta yi vhuxa hi masiku manharu ke?” (Johani 2:20) Kanilezvi, Jesu i wa wula a miri wakwe lezvaku i tempeli. Loku ku hundzile malembe manharu, a vapizani vakwe va no alakanya a magezu lawa a cikhati leci a nga vhuxiwa hi ka vafileko andzhako ka masiku manharu.