Jesu a maha cihlamaliso co sangula

Andzhako ka masiku manharu Nataneli na a hi mupizani wa Jesu, Jesu ni vapizani vokari va noya muchadhweni le Kana. A wutshamu legi gi wa hi lomu dhistrito ga Galileya, le n’walungu wa zvitsunga zva Nazareta, lomu Jesu a nga kulela kona. Nataneli i pswalelwe kwalomu Kana niku ku wa hi kusuhani ni kaya ka vapizani van’wani va Jesu.

Mariya mamani wa Jesu yenawu i wa yile muchadhweni lowo. Kota munghana wa lava va nga kari va chadha, Mariya i wa hi lomu ka nyima-nyima ya ku khatalela lava va nga rambilwe. Hikwalaho, i no hatla a wona ku zvi kona zvi nga kiyela, a se ya byela Jesu aku: “A va na vhinyo.” — Johani 2:3, NM.

Hi lisine, Mariya i wo kombela Jesu lezvaku a lulamisa cikarato leco. Kanilezvi Jesu i no mu hlamula aku: “Wasati, mina na wena hi nghena kwihi ka mhaka leyi?” (Johani 2:4, NM) Kota Hosi yi yimisilweko hi Nungungulu, Jesu i wa fanele ku maha lezvi a rumiwako hi Papayi wakwe wa le tilweni, na ku nga hi lezvi a byeliwako hi maxaka kutani vanghana. Mariya i no kombisa wutlhari, a zvi tsikela n’wana wakwe, zvonake a byela lava va nga kari va tira aku: “Ni zvihi lezvi a ta nga mu byela, zvi maheni.” — Johani 2:5.

Ku wa hi ni 6 wa tifuko ta hombe nguvhu, a yin’we ni yin’we yi wa ringana 40 wa tilitro. Jesu i no byela lava va nga kari va tira aku: “Tatani tifuko hi mati.” Loku va chelile mati ti tala, Jesu i no gumesa aku: “Khanani makunu, mu yisa ka mukhomi wa mubuzo.” — Johani 2:7, 8.

Loyi a nga rangela festa ya muchadho i no gi tsakela nguvhu a vhinyo lego, a cikhati leci a nga gi ringa azwa ku gi nene nguvhu. Kanilezvi, i wa nga zvi tivi a ku gi mahilwe hi cihlamaliso. I no vitana wanuna loyi a nga chada a taku: ‘A munhu mun’we ni mun’wani i ranga hi ku humesa a vhinyo go nandziha; zvonake loku vanhu va nwile, ku nehiwa legi go biha; kasike wena u vekile a vhinyo go nandziha kala makunu.’ — Johani 2:10.

Leco cive cihlamaliso co sangula ca Jesu. A cikhati leci a vapizani vakwe va nga wona cihlamaliso leco, a kholwa kabye ku no tiya. Andzhako ka lezvo, Jesu ni mamani wakwe ni vamakabye vakwe va noya Kapernawume. A dhoropa legi gi wa hi le n’walungu wa Bimbi ga Galileya.