Lezi a ntiro wa Nungungulu wu seketeliswako zona lomu xipanzeni ni misaveni yontlhe

KOTA ndlela yo tatisa xiprofeto xa Jesu xungetano hi masiku yo gumesa, a Timboni ta Jehova ta xumayela mahungu yo saseka “kala le magemeta-musi ya misava.” (Miti. 1:8; Mat. 24:14) Kasi ku maha lezo, ti mbheta a xikhati ni ntamu wa tona na ti xumayela vanwani. Na ti tsumba lezaku Jehova i ta khatalela a zilaveko za tona, ti simama ti rangisa Mufumo wa Nungungulu wutomini ga tona. (Mat. 6:25-34; 1 Kor. 3:5-9) A mabhinzu ya kona ma komba khwatsi lezaku Jehova wa xalala niku wa ti katekisa.

LEZI A ZILAVEKO ZA MUFUMO ZI KHATALELISWAKO ZONA MISAVENI YONTLHE

² Loku a vanhu va wona a tindlela leti hi ti tirisako kasi ku xumayela ni lezaku hi nyikela maBiblia ni mabhuku ma seketelweko ka gona mahala, a vokari va ti wutisa lezi: “Zi kotekisa kuyini zontlhe lezi?” Lisine lezaku a ku gandla ni ku humesa maBiblia ni mabhuku ma seketelweko ka Biblia zaga nguvu mali. A ku aka ni ku hlayisa miti ya Beteli leyi ku tshamako lava va wonelelako michini ya ku gandla ni lava va wonelelako ntiro wa ku xumayela, zinwe ni lava va mahako mitiro yinwani yi yisako mahlweni a mahungu yo saseka, zonawu zaga mali. Tlhatakumbiri, a vawoneleli va xipanze, varumiwa, maphayona yo hlawuleka, ni vanwani va nga ntirweni wo hlawuleka wa xikhati xontlhe va nyikiwa malana yo kari kasi yi va vuna ku simama va tira. Zi te dlunya lezaku a ntiro wa ku xumayela masikwini ya hina, ku ngava xipanzeni kutani misaveni yontlhe, waga mali yo tala nguvu. Yita hi kwihi a mali yontlhe leyo?

³ A vanhu vo tala va tsakelako a ntiro wa ku gonzisa Biblia wu mahiwako hi Timboni ta Jehova, va maha minyikelo ya kuziranza ya ku seketela ntiro wa misava yontlhe. Hambulezo, a ntiro wa hina wu seketelwa nguvunguvu hi Timboni ha toce, a to kari ti rumela a minyikelo ya kuziranza hofiseni ya ravi ya lomu tikweni gabye. Ta hana a ku fana ni malanza ya kale ya Nungungulu lawa ma nga seketela hi matsenya a kuakiwa ka wutshamu go khozela Jehova. (Ekso. 35:20-29; 1 Kro. 29:9) A minyikelo yi mahiwa hi tindlela to hambanahambana, a vokari va wula na va ha hanya lezaku loku vafa a tshomba yabye yi ta lumba hlengeletano ya Jehova, kasi lezo a yinwani yita hi ka vanhu, mabandla, ni ka zipanze niku a kutala ka zikhati i malana yitsongwani. Loku yi patsiwa, a minyikelo leyi ya vuna lezaku a ntiro wa kuxumayela wuya mahlweni.

⁴ A Timboni ta Jehova ti gi wona na gi hi lungelo a ku tirisa mali ni titshomba tinwani kasi ku vuvumisa a ntiro wa kuxumayela. Jesu ni vapizani vakwe va wa hi ni xikhwama xa mali lexi va nga teka ka xona a mali ya ku khatalela zilaveko zabye ni za vanwani. (Joh. 13:29) A Biblia gi wulawula hi vavasati vo kari lava va nga tirela Jesu ni vapizani vakwe. (Mar. 15:40, 41; Luka 8:3) Mupostoli Paule i lo vumela hi matsenya a xivuno xa nyama lexi a nga nyikwa hi lava va nga tsakela ku wona a ntiro wa ku xumayela na wuya mahlweni ni ku maha xokari kasi ku wu seketela. (Fil. 4:14-16; 1 Tes. 2:9) A Timboni ta Jehova ti simama ku lanzela a xikombiso lexi xa ku hiseka ni ku hana. Hi ndlela leyo, za koteka ku a vanhu va timbilu ti nene va nyikwa a “mati ya wutomi mahala” ni kwihi lomu va kumekako kona. — Kuv. 22:17.

LEZI A ZILAVEKO ZA BANDLA ZI KHATALELISWAKO ZONA

⁵ A zilaveko za bandla zonawu zi khatalelwa hi minyikelo ya kuziranza. A ku mahiwi mihlengo ge hambu ku gema mali leyi a munhu a faneleko ku humesa, niku a ku kombeliwi mali. Lomu ku mahiwako mitlhangano ka vekiwa makaxa kasi ni wihi a zi lavako a maha minyikelo “kota lezi a xuvako mbilwini yakwe.” — 2 Kor. 9:7.

⁶ A mali yi humesiwako yi tirela nguvunguvu a ku lungisa ni ku hlayisa Salawu ya Mufumo. A hubye ya madota yi nga ha maha xiboho xa ku rumela mali yo kari hofiseni ya ravi kasi ku vuvumisa a ntiro wa misava yontlhe. A xiboho lexi xi mahiwa hi bandla. Hi ndlela leyo, a mabandla yo tala ma maha minyikelo yo kukhanzakanya ya ku seketela a ntiro wa misava yontlhe. Loku ku hi lezaku vontlhe va zi tiva a zilaveko lezi a bandla gi tshukako giva nazo, a ku na xilaveko xa ku maha zitiviso zo khanzakanya xungetano hi minyikelo.

MAHLAYISELA YA MINYIKELO

⁷ Anzhako ka mitlhangano, a vamakabye vambiri va yimisilweko hi hubye ya madota va susa mali yi chelilweko makaxeni ya minyikelo va yi hlaya. (2 Tih. 12:9, 10; 2 Kor. 8:20) A hubye ya madota yi maha malulamiselo ya ku hlayisa a mali leyo kala yi rumelwa ravini kutani ku yi tirisa ka zilaveko za bandla. Zi nga ha lava lezaku ku vuliwa a konta ya banko yi lumbako bandla. Hweti ni hweti, a makabye a wonelelako mali ya bandla i longisela a mubiko wa timali kasi ku tivisa bandla, niku loku ku hunza tihweti tinharu a mutlhanganyisi wa hubye ya madota i maha malulamiselo ya lezaku ku hloliwa lezi a mali yi nga tirisiswa zona.

LEZI A MITLHANGANO YA XIPANZE YI KHATALELISWAKO ZONA

⁸ A zilaveko za mitlhangano ya xipanze zi khatalelwa hi minyikelo ya Timboni leti ti wumbako xipanze lexo. Lomu ku mahiwako mitlhangano leyo, ka vekiwa makaxa yo mahela kona minyikelo ya kuziranza ya ku seketela a xipanze. A muwoneleli wa xipanze i yimisa a makabye loyi a to khatalela a mali leyo.

⁹ A zilaveko za mutlhangano wunwe ni wunwani zi fanele ku khatalelwa hi mali yi humesiwako ka mutlhangano lowo niku loku yi sala yi fanele ku cheliwa konteni ya xipanze. Loku ku tshuka kuva ni zilaveko zo hunza a mali leyi yi humesilweko, hambulezo na zi koteka ku zi khatalela hi mali ya xipanze, a ku na xilaveko xa ku tivisa mabandla lezaku a mali leyi yi humesilweko a yi enelangi. Kanilezi loku ku nga hi na mali yo enela konteni ya xipanze kasi ku hakhelela a zilaveko za mutlhangano lowu wu mahilweko, kutani ku sangula a malulamiselo ya mutlhangano wu lanzelako, yo kota ku lugara wutshamu legi wu to mahelwa kona, a muwoneleli wa xipanze a nga nyika mawonela ya lezaku ku tivisiwa mabandla hi xilaveko xa ku maha minyikelo. A hubye yinwe ni yinwani ya madota yi ta bhula hi mhaka leyo zonake yi boha a mali leyi a bandla gi nga nyikelako kasi ku seketela mutlhangano. Hi ku lanzela, yi ta tivisa a bandla hi xiboho lexi yi xi mahileko.

¹⁰ Loku a madota ma tlhangana kasi ku bhulisana hi mutlhangano lowu wu to mahiwa, ma boha lezi ma to maha hi mali ya xipanze. Ka mahiwa ziboho zi yelanako ni zilaveko za mutlhangano, zilaveko za muwoneleli wa xipanze kutani za muyimeli wa ravi. Ku nga ha bohiwa kambe a ku rumela mali ravini kasi ku seketela a ntiro wa misava yontlhe, kuakiwa ka tiSalawu ta Mufumo, ni kuakiwa ka Salawu ya Mitlhangano ya Hombe ya lomu xipanzeni, kutani zilo zinwani za lisima.

¹¹ Ahandle ka mali leyi yi tirisiwako ka zilaveko zo toloveleka za mutlhangano, a mali yinwani leyi yi nga ha lavekako kasi ku khatalela a zilaveko zo kari za xipanze yi fanele ku bohiwa hi madota. A ziboho lezo zi fanele kuva ni mitsengo yo kongoma yo tsaliwa zi tlhela zi vumelelwa khati ni khati ku tirisiwako a mali ya xipanze. A mali ya xipanze yi nga ha rumelwa ravini kasi yi ya hlayisiwa kala a xipanze xi yi lava. Anzhako ka mutlhangano a muwoneleli wa xipanze i ta maha malulamiselo ya lezaku ku hloliwa lezi a mali yi nga tirisiswa zona.

LEZI A ZISIWANA ZI KHATALELISWAKO ZONA

¹² A mali leyi yi nga hi xikhwameni lexi Jesu ni vapizani vakwe va nga hi naxo yi wa vuna zisiwana kambe. (Mar. 14:3-5; Joh. 13:29) A wutihlamuleli legi ga maKristu ga ha simama hakuva Jesu i te: A “zisiwana zi na nwina xontlhe xikhati.” (Mar. 14:7) Xana a Timboni ta Jehova ti gi khatalelisa kuyini a wutihlamuleli legi inyamutlha?

¹³ Ka zikhati zo kari, a vamakabye vo tsumbeka va bandla va nga ha lava xivuno hi tlhelo ga nyama hi kota ya tanga, mababyi kutani ziyimo zinwani zi nga hiko ntanwini wabye. A ziro za ngango, maxaka ni vanwani lava va tivako a ziyimo zabye, va nga ha kuceka ku maha xo kari kasi ku va vuna. Lezo zi yelana ni magezu ya mupostoli Johani, yaku: “Kani hi wihi a nga ni zilo za tiko legi, a wona makabye na a vumala, a nga mu hawukeli, a liranzo la Nungungulu li nga tshamisa kuyini ka yena? Vana vanga, ngha hi nga ranzi hi kuwulawula, kutani hi lirimi, kanilezi a hi ranzeni hi kumaha ni zinene.” A wukhozeli ga lisine gi patsa ku vuna vanhu vo tsumbeka lava va lavako xivuno xa nyama. — Jak. 1:27; 2:14-17.

¹⁴ Ka papilo go ranga legi a tsaleleko Timote, Paule i lo tlhamusela lezi va nga vuniswako zona lava va ringanelwako hi ku vuniwa. U nga lera a wusungukati gakwe ka 1 Timote 5:3-21. A muKristu munwe ni munwani i na ni wutihlamuleli ga ku khatalela a va laha ngangweni wakwe. A vakhosaheleko ni vababyako va nga vuniwa hi vana vabye, vazukulu, kutani maxaka manwani. Ka zikhati zo kari, a maxaka kutani vanwani va nga ha va vuna ku tiva ni ku kuma a xivuno xo kari xi nyikiwako hi mufumo kutani tikoponi tinwani. Ku nga hava ni xiyimo lexi xi to lava ku a ziro za bandla zi vuna a vamakabye vo kari va vumalako, lava va nga ni xikhati xo leha na va tirela Jehova hi ku tsumbeka. Loku ku hi hava ziro za ngango kutani maxaka manwani kasi ku va vuna ni loku a mufumo wu nga nyikeli xivuno, a hubye ya madota yi nga ha nyika mawonela ya lezi va nga vuniswako zona. A maKristu ma zi wona na zi hi lungelo a ku hlengela titshomba tabye ni lava va nga ni xilaveko.

¹⁵ A vamakabye vo tala va nga ha lava xivuno hi kota ya kuxanisiwa, tiyimpi, kutsekatseka ka misava, tindambi, tindlala, kutani timhango tinwani ti humelelako masikwini lawa yo gumesa. (Mat. 24:7-9) Za koteka ku a mabandla ya lomu xipanzeni ma nga hi na xa ku va vuna hi xona ka zikhati lezo, hikwalaho a Hubye yi Fumako yi maha malulamiselo ya lezaku a vamakabye va matshamu manwani va nyika xivuno lexi xi lavekako. Lezi za fana ni lezi zi mahilweko hi maKristu ya le Asia wa Mutsongwani a xikhati lexi a vamakabye va le Judia va nga kari va sokola hi ndlala. (1 Kor. 16:1-4; 2 Kor. 9:1-5) Na hi lanzela xikombiso xabye, hi kombisa a liranzo leli hi nga nalo hi vamakabye va hina ni lezaku hi vapizani va lisine va Jesu Kristu.— Joh. 13:35.

LEZI A MABHUKU MA AVELISWAKO ZONA

¹⁶ A maBiblia ni mabhuku ma seketelweko ka gona ma maha ntiro wa lisima nguvu kuhangalaseni ka mahungu ya Mufumo. A kutala ka zikhati, a hubye ya madota yi yimisa a nanza ga wutireli lezaku gi wonelela a mabhuku ya bandla, ni ginwani gi wonelelako a marevista. A vamakabye lava va chela nguvu kota hi wutihlamuleli legi va nga nago. Va tshama hi ku tsalatsala a mitsengo ya mabhuku lawa ma rumelwako hi ravi ni lawa ma tekiwako kasi a bandla gi nga tshuki giva ni wuna ga mabhuku.

¹⁷ Kota maKristu ma ti hendleletileko, ha zi zwisisa lezaku a xikhati xa hina, ni wuzikoti legi hi nga nago, wutlhari ni titshomba, hambu ni wutomi ga hina, zinyikiwo zi tako hi ka Nungungulu niku hi fanele ku zi tirisa ntirweni wakwe. (Luka 17:10; 1 Kor. 4:7) Loku hi tirisa khwatsi a titshomba ta hina, hi komba lezi hi mu ranzisako zona Jehova. Zi le ka hina a ku dzunza Jehova hi zilo za hina za lisima, na hi tiva lezaku i xalaliswa hi xinyikiwo xo huma mbilwini. (Mav. 3:9; Mar. 14:3-9; Luka 21:1-4; Kol. 3:23, 24) Jesu i te ngalo: “Mu amukele mahala, nyikani mahala.” (Mat. 10:8) Loku hi ti nyikela ntirweni wa Jehova hi tlhela hi tirisa titshomba ta hina ntirweni wakwe, hi ta kuma litsako la hombe. — Miti. 20:35.