Tindlela to engetela ntiro wa wena wo xumayela

A XIKHATI lexi Jesu a nga lava ku ruma a vapizani vakwe lezaku va famba va xumayela hi Mufumo wa Nungungulu, i va byelile lezi: “A kutshovela ka hombe nguvu, kanilezi a zitiri zi tsongwani.” Kunene, ku wa hi ni ntiro wa hombe va nga fanele ku wu maha, hikwalaho i lo tlhela aku: “Kombelani a Hosi ya kutshovela, lezaku yi rumela a zitiri kutshoveleni ka yona.” (Mat. 9:37, 38) Jesu i byelile vapizani vakwe lezi va nga fanele ku xumayelisa zona. A magezu yakwe ma komba lezaku a ntiro lowu wu wa hi wa xihatla, hakuva ite: “Mu nga ta kala mu mbheta a miti ya vaIsraeli, na N’wana wa munhu a nga se ku chikela.” — Mat. 10:23.

² Nyamutlha konawu, ku na ni ntiro wa hombe wu faneleko ku mahiwa. A mahungu yo saseka ya Mufumo ma fanele ku xumayelwa na magumo ma nga se chikela, niku a xikhati xi hi saleleko xitsongwani! (Mar. 13:10) Kota lezi hi xumayelako kwalaha ka tiko legi go biha, hi yimisana ni zikarato zo fana ni lezi Jesu ni vapizani vakwe va yimiseneko nazo, kanilezi hina zi hi tshingele nguvu. Hi vatsongwani nguvu loku hi fananiswa ni vanhu va tsanza-vahlayi va hanyako inyamutlha, hambulezo ha tiyiseka lezaku Jehova i ta hi vuna. A mahungu yo saseka ya Mufumo ma ta xumayelwa misaveni yontlhe, niku hi xikhati lexi xi yimisilweko hi Jehova, a magumo ma ta chikela. Xana hi ta rangisa a Mufumo wa Nungungulu kasi hi tatisa khwatsi a ntiro wo xumayela? Hi yihi a mixuvo ya moya hi nga ti vekelako kasi hi tatisa a kungo legi?

³ Na a wulawula hi lezi Jehova a zi kombelako ka malanza yakwe ma ti hendleletileko, Jesu i te ngalo: “U ta ranza Hosi Nungungulu wa wena hi mbilu ya wena yontlhe, ni muhefemulo wa wena wontlhe, ni kupima ka wena kontlhe, ni ntamu wa wena wontlhe.” (Mar. 12:30) Nungungulu i lava lezaku hi maha a ntiro wakwe hi ntamu wa hina wontlhe. Loku hi maha lezo hi komba lezaku hakunene hi hanya hi kuyelana ni kutihendleleta ka hina. (2 Tim. 2:15) A munwe ni munwani wa hina i vululekelwe hi tindlela ta ku tirela Jehova hi ntamu wakwe wontlhe hi kuya hi ziyimo ni wutlhari gakwe. A hi wone a tindlela to kari zonake u boha leti u nga ti hlawulako kasi ku engetela a ntiro wa wena wo xumayela.

KU TIRA KOTA MUHUWELELI

⁴ Vontlhe lava va vumelako a lisine va na ni lungelo ga ku xumayela a mahungu yo saseka. Lowu hi wona a ntiro-tshinya lowu Jesu a nyikileko a valanzeli vakwe. (Mat. 24:14; 28:19, 20) A mupizani wa Jesu Kristu i sangula ku byela vanwani a mahungu yo saseka neti a mazwa. Lezo hi zona zi mahilweko hi Andreu, Filipu, Korneliu ni vanwani. (Joh. 1:40, 41, 43-45; Miti. 10:1, 2, 24; 16:14, 15, 25-34) Xana lezi zi komba lezaku a munhu a nga xumayela vanwani hambu loku a nga se bapatizwa? Ina! Neti a ringanelwa hi kuva muhuweleli a nga bapatizwangiko, wa zi kota ku sangula ku famba hi muti ni muti a xumayela a mahungu yo saseka. Niku loku a xiyimo xakwe xi mu vumelela, a nga hlengela ka tindlela tinwani to xumayela.

⁵ Handle ko kanakana, anzhako ka ku bapatizwa a muhuweleli muswa i ta maha zontlhe a zi kotako kasi ku gonzisa a lisine ka vanwani. A vavanuna ni vavasati va na ni lungelo ga ku hlengela zinwe ntirweni wa ku xumayela a mahungu yo saseka. I lungelo ga hombe a ku maha xokari kuvuvumiseni ka zilaveko za Mufumo wa Nungungulu. Ni wihi a to zi kota ku engetela a ntiro wakwe wo xumayela hi ku nghenela mitiro yinwani yi yelanako ni ntiro lowu, handle ko kanakana i ta xalala nguvu.

KU TIRA LOMU KU NGA NI XILAVEKO XA HOMBE

⁶ Kuzilava a xipanze xa bandla ga nwina xa tiriwa hi kukhanzakanya niku a vanhu vo tala va kari va xumayelwa. Makunu, za koteka ku ngha u alakanyela ku engetela a ntiro wa wena hi ku rura uya lomu ku nga ni xilaveko xa hombe xa vahuweleli. (Miti. 16:9) Loku u hi dota kutani nanza ga wutireli, u nga vunetela ka bandla legi gi nga ni xilaveko. A muwoneleli wa nwina wa xipanze a nga ha ku nyika mawonela ya lezi u nga vunisako zona a bandla ga lomu xipanzeni xa nwina. Kanilezi, loku u lava ku tira ka xipanze xinwani xi nga kwalomu tikweni ga nwina, a hofisa ya ravi yi ta ku nyika a mahungu ma vunako.

⁷ Xana wa zi lava ku tira tikweni ginwani? Loku u hi ni mixuvo leyo, ti nyike xikhati xa ku ehleketa khwatsi hi lezi a kurura loko ku to ku khumbisa zona ni lezi ku to mu khumbisa zona loyi kuzilava u to rura naye. (Luka 14:28) Bhula ni madota ya bandla ga wena hi mixuvo leyi u nga nayo. Kanilezi, loku u nga lavi ku mbheta xikhati xo leha seyo, zi chukwana nguvu a ku simama u tira kwalomu tikweni ga wena.

⁸ Ka matiko yo kari, a madota lawa ma rurako ma ya vunetela, ma sina ma hi lisineni hi malembe yo tala a ku hunza a madota lawa ma rangelako ka matiko lawo. A vamakabye vo ti koramisa va ti yimisele a ku tsika a madota lawa ma chikelako lezaku ma rangela a bandla. Kanilezi, loku u hi dota gi alakanyelako ku rura giya ka ginwe ga matiko lawo, alakanya lezaku a wu yeli ku ya ma tekela mitiro, kanilezi ku ya tira zinwe nawo. Va kuce a ku ti karatela a ku ringanelwa hi wutihlamuleli lomu bandleni ni ku gi vumela loku va nyikiwa. (1 Tim. 3:1) Ngha uva ni lihlaza-mbilu loku a zilo zi nga mahiwi hi ndlela leyi zi nga wa ta mahiwa hi yona tikweni ga wena. Tirisa a wutlhari legi u nga nago kota dota kasi ku vuna a vamakabye lavo. Makunu, loku u tshuka u tlhela tikweni ga wena va ta ngha va kwayile khwatsi kasi ku khatalela a bandla.

⁹ Na hofisa ya ravi yi nga se ku nyika a xaxameto wa mabandla lawa ma nga ni xilaveko, a Kometi ya Ntiro ya Bandla ga wena yi ta tsala a papilo gi wulako lezaku wa ringanelwa hi ku tira lomu ku nga ni xilaveko. A papilo legi gi fanele ku tsaliwa na ku nga khataliseki lezaku u dota, nanza ga wutireli, phayona, kutani muhuweleli. A papilo lego ga kometi ya ntiro zinwe ni mahungu manwani u lavako ku ma tiva zi ta tekela ku rumelwa hofiseni ya ravi ya tiko legi u lavako ku ya tira kona.

KU XUMAYELA HI LIRIMI LINWANI

¹⁰ Kasi ku engetela a ntiro wa wena wa ku xumayela, hikuyini u nga alakanyeliko a ku gonza a lirimi linwani zinwe ni lirimi la mawoko ke? Loku u xuva ku gonza ku xumayela hi lirimi limbe, wulawula ni madota ya bandla ga wena kutani muwoneleli wa xipanze. Vona va nga ha ku tiyisa va tlhela va ku nyika a mawonela ma vunako. Na zi kongomisiwa hi hofisa ya ravi, a zipanze zo kari zi wumbile a titurma to gonzisa lirimi leli a vahuweleli ni maphayona va nga xumayelako hi lona.

NTIRO WA WUPHAYONA

¹¹ Vontlhe a vahuweleli va fanele ku zi tiva khwatsi lezi zi lavekako kasi ku ringanelwa hi kuva phayona go vunetela, phayona ga xikhati xontlhe, phayona go hlawuleka kutani ku ringanelwa hi yinwani mitiro ya xikhati xontlhe. A phayona gi fanele kuva muKristu a bapatizilweko a nga xikombiso xi nene na a hi ka xiyimo xi mu vumelelako ku mbheta a tihora leti ti lavekako hweti ni hweti ntirweni wa ku xumayela. A Kometi ya Ntiro ya Bandla hi yona yi vumelelako a vamakabye lezaku va tira kota maphayona yo vunetela kutani ya xikhati xontlhe, kanilezi a maphayona yo hlawuleka ma yimisiwa hi ravi.

¹² Hi kuya hi xiyimo xakwe, a muhuweleli a nga tira kota phayona go vunetela hi hweti yinwe hi wutsongwani ga kona, kutani hi tihweti to tala to lanzelana hambu ku tira hi xikhati xi nga gemiwangiko. A vahuweleli vo tala va hlawula ku tira kota maphayona yo vunetela ka zikhati zo hlawuleka, zo kota nguva ya Xialakanyiso, kutani ka hweti leyi a muwoneleli wa xipanze a enzelako a bandla. A vanwani va tira kota maphayona hi tihweti ta maferiya. A zigonzani za xikola lezi zi bapatizilweko, zi nga ha hlawula a xikhati xa maferiya kasi ku tira kota maphayona yo vunetela. Ka tihweti ta Março ni Abril zinwe ni ka hweti leyi va enzelwako hi muwoneleli wa xipanze a vahuweleli va nga hlawula ku teka a wuphayona go vunetela ga tihora titsongwani wutshanwini ga leti ti tiriwako ka tihweti tinwani. Na ku nga khataliseki a xiyimo xa wena, loku u zi kota ku tlhanganyisa tihora leti ti lavekako u tlhela u tiyiseka lezaku u ta zi kota ku tira hweti yinwe kutani to hlaya kota phayona ga kuvunetela ni loku u hi ni mahanyela ya wuKristu, a madota ma ta kambisisa a xikombelo xa wena xa kuva phayona go vunetela.

¹³ Kasi kuva phayona ga xikhati xontlhe, a xiyimo xa wena xi fanele ku ku vumelela ku bika a tihora leti ti lavekako hi lembe. Tlhatakumbiri, u fanele ku ngha u hi muhuweleli a nga xikombiso xinene, u tlhela u hi ni 6 wa tihweti na u bapatizilwe hi wutsongwani ga kona. Kota phayona ga xikhati xontlhe, handle ko kanakana u ta tira hi kuhiseka ni bandla legi u nga ka gona. A maphayona yo hiseka xikatekiso ka bandla hakuva ma gi maha gi hiseka ntirweni wa ku xumayela ma tlhela ma kuca vanwani lezaku va nghenela a ntiro lowu.

¹⁴ A maphayona yo kari ya xikhati xontlhe lawa ma bhinzulako ntirweni wa ku xumayela ma tala ku yimisiwa kota maphayona yo hlawuleka. A maphayona yo hlawuleka ma fanele ku ti yimisela ku tira ni kwihi laha a ravi gi ma kombako kona. A kutala ka zikhati ma avelwa ku ya xumayela ka matshamu ya le kule ni doropa ni ku vulula a mabandla maswa. A maphayona lawa ma tshuka ma avelwa ku ya vunetela a mabandla lawa zi ma karatelako ku eneta a zipanze za wona. A maphayona yo kari ya xinuna ma nga madota ma avelwa ku ya vunetela a mabandla lawa ma nga ni xilaveko xa madota hambu loku ku nga hi na xilaveko xa hombe xa vahuweleli va Mufumo wutshanwini lego. A maphayona yo hlawuleka ma nyikiwa a malana yo ti hlayisa hi yona. A yo kari ma yimisiwa lezaku ma tira hi xikhatanyana ntsena.

NTIRO WA WURUMIWA

¹⁵ A Kometi ya Ntiro ya Hubye yi Fumako yi yimisa a varumiwa lawa va faneleko ku ya xumayela zonake a Hofisa ya Ravi ya tiko legi va yako ka gona yi va avela ku tira ka zipanze zi nga ni vanhu vo tala. A vamakabye lava va vunetela nguvu kutiyiseni ka ntiro wo xumayela ni ka maxaxametela ya mitiro ya bandla. A kutala ka zikhati, a varumiwa va nyikiwa a gonziselelo Xikoleni xa Vavangeli va Mufumo kutani Xikoleni xa Biblia xa Gileade. A vamakabye lava va lavelwa ko tshama va tlhela va nyikiwa a malana yo ti hanyisa hi yona.

KU TIRA KOTA MUWONELELI WA XIPANZE

¹⁶ Lava va yimisiwako hi Hubye yi Fumako lezaku va tira kota vawoneleli va zipanze va sangula hi ku tira kota vavaleti va vawoneleli kasi va kuma a gonziselelo. A vavanuna lava va wu ranza nguvu a ntiro wa simu niku va va ranza nguvu a vamakabye vabye. A vamakabye lava maphayona yo hiseka tlhelo vagonzi vo ti karata va Biblia. Tlhatakumbiri, va tiviwa kota vakaneli ni vagonzisi va nene. Hi kudlunyatekileko, va kombisa a matshamela ya mbhanzu wa moya wa ku basa, kuringanisela, kuolova ni kupimisisa. Loku a chadile, a sati wakwe i fanele kuva ni mahanyela ma nene a tlhela a tirisana khwatsi ni vanwani ni kuva muxumayeli mu nene wa mahungu yo saseka. Niku i sati wo ti koramisa a nga ti tlakusiko ka nuna wakwe kutani ku fumela mabhulo. A vawoneleli va zipanze ni vasati vabye va tshama na va khomekile, hikwalaho lava va navelako ku nghenela a ntiro lowu va fanele kuva vanhu va lihanyo li nene. A maphayona a ma ti tsalelisi ha woce ntirweni lowu. Lexi ma mahako ku byela a muwoneleli wabye wa xipanze lezaku va navela kuva ntirweni lowu, zonake a muwoneleli wa xipanze i ta va byela lezi va faneleko ku maha.

ZIKOLA ZA HLENGELETANO YA NUNGUNGULU

¹⁷ Xikola xa Vavangeli va Mufumo: Ku na ni xilaveko xa hombe xa vavangeli va Mufumo lezaku va ya xumayela ka zipanze lezi zi nga tiriwiko hi kukhanzakanya ni ku tiyisa mabandla. Hikwalaho, a vamakabye va xinuna ni va xisati va magwenza zinwe ni vamakabye va chadileko va rambiwa Xikoleni xa Vavangeli va Mufumo lezaku va ya kuma a gonziselelo yo kongoma. Lava va pasako xikoleni lexi va yimisiwa kota maphayona ya xikhati xontlhe kasi va xumayela kwalomu tikweni gabye ka zipanze lezi zi nga ni xilaveko xa hombe xa vahuweleli. Kanilezi, a vanwani lava va longileko ku ya tira ni kwihi laha ku nga ni xilaveko, va nga ha nyikiwa ziavelo zinwani kwalomu tikweni gabye kutani tikweni ginwani. Niku a vokari va nga ha yimisiwa kambe kota maphayona yo hlawuleka ya xikhatanyana kutani hi xikhati xa ku leha. A mutlhangano lowu wu mahiwako migotsovanyanweni ka lava va navelako kuya xikoleni xa vavangeli, wu tlhamusela lezi a maphayona ya xikhati xontlhe ma faneleko ku maha kasi ma rambiwa.

¹⁸ Xikola xa Biblia xa Gileade: A zigonzani za xikola lexi, vamakabye va xinuna ni va xisati va magwenza zinwe ni vamakabye va chadileko lava va wulawulako xiNgiza na va hi maphayona yo hlawuleka, varumiwa, vawoneleli va zipanze, kutani vatiri va Beteli. A vamakabye lava va na ni wutlhari ga ku vuna a vamakabye lezaku va xumayela khwatsi kutani ku vuna a hofisa ya ravi lezaku yi maha khwatsi mitiro ya yona. Vanhu va sinako va kombisa lezaku va tsakela ku tirela vanwani niku va nga zi kota ku vuna vanwani hi ndlela yi nene lezaku va gonza va tlhela va lanzela a wurangeli ga Biblia. A Kometi ya Ravi yi kombela a vamakabye lava va ringanelwako lezaku va maha xikombelo xa kuya xikoleni lexi. Loku a xikola xi gumesa, lava va pasileko va rumelwa sinwini kutani Beteli ya lomu tikweni gabye, kutani ku ya xumayela matikweni manwani hambu ku ya Beteli ya tiko ginwani.

NTIRO WA BETELI

¹⁹ A ku tira Beteli i lungelo go hlawuleka nguvu. A vito Beteli gi wula ku “Yindlu ya Nungungulu,” niku handle ko kanakana a vito legi ga ma fanela khwatsi a matshamu lawa ku mahiwako a ntiro wa Nungungulu. A vamakabye va xinuna ni va xisati lava va tirako Beteli va maha a ntiro wa lisima wu yelanako ni ku tsala, ku hunzulusela, ni ku avela mabhuku ma seketelwako ka Biblia. A Hubye yi Fumako, leyi yi wonelelako ni ku rangela a mabandla misaveni yontlhe, ya wu nyika nguvu lisima a ntiro lowu wu mahiwako hi vatiri va Beteli. A kutala ka vatiri va Beteli lava va nga vahunzuluseli, va tira ka matshamu lawa ku wulawuliwako a lirimi leli va hunzuluselako. A mahela legi gi nyika a vahunzuluseli a lungelo ga kuzwa lezi a vanhu va wulawulisako zona mabhulweni ya siku ni siku, ni ku tekela ku wona lezaku xana lezi va tsalako za zwisisiwa ke.

²⁰ A mitiro yo tala yi mahiwako Beteli ya binza. Hikwalaho, ku vitaniwa majaha ma bapatizilweko, ma nga ni lihanyo li nene tlhelo vanhu va zigingi. Loku a hofisa ya ravi leyi yi wonelelako a tiko ga wena yi lava vanhu vo ya tira Beteli na u zi lava ku ya tira kona, yana ka mutlhangano lowu wu mahiwako migotsovanyanweni ka lava va tsakelako kuya Beteli kasi u tiva lezi zi lavekako. U nga bhula kambe ni muwoneleli wa nwina wa xipanze xungetano hi ntiro wa Beteli.

NTIRO WA KUAKA

²¹ A ntiro wa ku aka a tiyindlu ti tiriselwako zilo za moya i ntiro wo basa wo fana ni lowu wu mahilweko kuakiweni ka tempeli ya Solomoni. (1 Tih. 8:13-18) A vamakabye vo tala va xinuna ni va xisati va ti nyikela hi kuhiseka ntirweni lowu kutani ku wu seketela hi titshomba tabye.

²² Xana wenawu u ka xiyimo xi ku vumelelako a ku patseka ntirweni lowu? Loku u hi muhuweleli a bapatizilweko a tsakelako ku nghenela ntiro lowu, a vamakabye lava va wonelelako a ntiro wa kuaka wa lomu xipanzeni xa nwina va ta ku amukela hi matsenya va tlhela va ku gonzisa a mamahela ya ntiro loku u nga wu tivi. Tivisa madota lezaku u ti yimisele ku vunetela mitirweni leyi. A vahuweleli vo kari va bapatizilweko va zile va kuma a lungelo ga ku ya matikweni manwani va ya aka tiyindlu ti tiriselwako zilo za moya.

²³ Ku na ni tindlela to tala u nga hlengelako hi tona ntirweni wa kuaka. A vahuweleli va bapatizilweko va nga ni mahanyela ma nene na va wu tivanyana a ntiro wa kuaka, va nga ka xiyimo xi va vumelelako ku seketela a miako leyi yi akiwako kusuhani ni lomu va tshamako kona va nga tira kota Vatiri va kuziranza va ku tsala miako ya lomu tikweni gabye. A vanwani va seketela a miako ya le kule hi xikhati xo kari niku va yimisiwa hi ravi lezaku va tira maviki mambiri kuya ka tihweti tinharu kota vatiri va kuziranza va kuaka. Lava va hlawuliwako lezaku va tira hi xikhati xo leha va vitaniwa ku, malanza ya kuaka. A malanza ya kuaka lawa ma tirako matikweni manwani ma vitaniwa ku, malanza ya kuaka ma tako hi matiko-wundle. A Ntlawa wa Kuaka lowu wu wumbiwako hi malanza ni vatiri va kuziranza va kuaka hi wona wu rangelako ka muako wunwe ni wunwani niku wu seketelwa hi Vatiri va kuziranza va ku tsala miako ya lomu xipanzeni ni vamakabye va mabandla lawa ma akelwako. A Mitlawa ya Kuaka yi tirela kwalomu xipanzeni xa ravi ga yona.

HI YIHI MIXUVO YA WENA YA MOYA?

²⁴ Kota munhu a ti hendleletiko ka Jehova, handle ko kanakana u navela ku mu tirela kala kupinzuka. Kanilezi hi yihi yinwani mixuvo ya moya u navelako ku yi tatisa? A kuva ni mixuvo ya moya zi ta ku vuna a ku tirisa a ntamu ni titshomba ta wena hi wutlhari. (1 Kor. 9:26) Tlhatakumbiri, a ku ti vekela mixuvo ya moya zi ta ku vuna a ku kula hi tlhelo ga moya ni ku rangisa lezi zi nga za lisima nguvu. — Fil. 1:10; 1 Tim. 4:15, 16.

²⁵ Mupostoli Paule i hi vekele a xikombiso hi faneleko ku xi lanzela a xikhati lexi hi tirelako Nungungulu. (1 Kor. 11:1) Paule i ti tsitsiritile ntirweni wa Jehova. I wa zi tiva lezaku a ntiro wa Jehova wu mu vululele malungelo yo tala. Paule i tsalele vamakabye va le Korinte aku: “Nzi vululelwe a nyangwa ya hombe ya ntiro.” Niku hinawu hi na ni malungelo yo tala yo tirela Jehova. Kunene, ku na ni mitiro yo tala hi nga yi mahako bandleni nguvunguvu kuxumayeleni ka mahungu yo saseka. Kanilezi a ku fana na Paule, a ku famba hi “nyangwa [leyo] ya hombe” zi nga ha lava lezaku hi yimisana ni “valala vanyingi.” (1 Kor. 16:9) Paule i wa ti yimisele ku ti luleka. Wona lezi a wulileko: “Nzi tsayisa a miri wa mina nzi wu hlula.” (1 Kor. 9:24-27) Xana hinawu hi ti yimisele ku maha zalezo?

²⁶ A munwe ni munwani wa hina i kuciwa a ku ti vekela mixuvo ya moya ni ku ti karatela ku yi tatisa hi kuya hi xiyimo xakwe. A vokari va ntirweni wa xikhati xontlhe nyamutlha hakuva na va ha hi vanana va ti vekele mixuvo leyo. Kusukela wunwananeni, a vapswali vabye ni vanwani va va kucile a ku ti vekela a mixuvo ya moya. Makunu zalezi va kari va ti buza hi ku tirela Jehova — niku a va ti layi hi xiboho lexo. (Mav. 10:22) Ku na ni yinwani mixuvo ya yi nene u nga ti vekelako, yo kota kuva kona wontlhe maviki ntirweni wo xumayela, ku sangula zigonzo ziswa ni ku zi fambisa, ni ku engetela a xikhati lexi u mbhetako na u longisela mitlhangano. Hambulezo, a xa lisima ka zontlhe ku simama hi tiyile hi tlhela hi xumayela hi kuhiseka hakuva loku hi maha lezo, hi ta zi kota a ku tatisa a mixuvo ya hina ya hombe nguvu— ya ku tirela Jehova kala kupinzuka. — Luka 13:24; 1 Tim. 4:7b, 8.