Alakanya lava va nga ntirweni wa xikhati xontlhe
“Xontlhe xikhati hi alakanya a ntiro wa nwina wa kukholwa, ni kupinyama ka liranzo.” — 1 TES. 1:3.
1. Paule i wa ti zwisa kuyini hi lava va tirelako Jehova hi kuhiseka?
MUPOSTOLI Paule i wa alakanya lava va nga ti karata nguvu kasi ku xumayela mahungu yo saseka. Paule i lo tsala lezi: “Xontlhe xikhati hi alakanya a ntiro wa nwina wa kukholwa, ni kupinyama ka liranzo, ni kutiya ka nwina kutsumbeni ka Hosi ya hina Jesu Kristu, a mahlweni ka Nungungulu a Dadani wa hina.” (1 Tes. 1:3) Kunene, Jehova wutsumbu wa wu alakanya a ntiro wa liranzo lowu wu mahiwako hi lava va mu tirelako hi kutsumbeka, hambu loku a xiyimo xabye xa wutomi xi nga va vumeleli ku maha zotala. — Maheb. 6:10.
2. Zini hi to wulawula hi zona ka nzima leyi?
2 A kutala ka makholwa-kulori — ya kale ni ya masiku ya hina — ma tsika zo tala kasi ku tirela Jehova xontlhe xikhati. A hi woneni lezi a vokari va nga tirisa zona ka zana ga malembe go sangula. Hi ta wona kambe a tixaka to kari ta ntiro wa xikhati xontlhe masikwini ya hina hi tlhela hi wona lezi hi nga alakanyisako zona a vamakabye va hina vo ranzeka lava va ti hendleletileko ku tira hi tindlela to hlawuleka.
MAKRISTU YA ZANA GA MALEMBE GO SANGULA
3, 4. a) A maKristu ya zana ga malembe go sangula ma wa tirela Jehova hi tindlela muni? b) A zilaveko zabye za nyama zi wa tatisiswa kuyini?
3 Xikhatanyana anzhako ka kubapatizwa kakwe, Jesu i lo sangula ntiro lowu hi kufamba ka xikhati wu nga wa ta eneta misava yontlhe. (Luka 3:21-23; 4:14, 15, 43) Anzhako ka kufa kakwe, a vapostoli vakwe va lo rangela a kuanziswa ka ntiro lowu wo xumayela. (Miti. 5:42; 6:7) A maKristu yo kari, yo kota Filipu ma wa tira kota vangeli ni varumiwa le Palestina. (Miti. 8:5, 40; 21:8) Paule ni vanwani va wa enza vaya ka matshamu ya le kule. (Miti. 13:2-4; 14:26; 2 Kor. 1:19) A vanwani — vo kota Silvanusi, na Marku, na Luka — va wa tira kambe kota vatsali. (1 Ped. 5:12) A vavasati va maKristu va wa tira zinwe ni vamakabye lavo va xinuna vo tsumbeka. (Miti. 18:26; Rom. 16:1, 2) A matshango yabye yo tsakisa ma maha lezaku a Mitsalo ya wuKristu ya xiGreki yi nanziha ku lera, ma tlhela ma komba lezaku Jehova wa alakanya malanza yakwe hi kutsaka.
4 A malanza yo sangula ya xikhati xontlhe ma wa zi kumisa kuyini za kutihanyisa? Ka zikhati zo kari va wa rurelwa kutani ku nyikwa xivuno xinwani hi maKristu-kulobye, kanilezi va wa nga tshuki va lonza xivuno lexo. (1 Kor. 9:11-15) A vanhu vo kari ni mabandla va wa va nyika xivuno hi kuziranza. (Gonza Mitiro 16:14, 15; Va Le Filipi 4:15-18.) Paule ni varumiwa-kulobye vonawu va wa ti nyika xikhatanyana xa ku tira kasi ku tatisa zilaveko zabye.
MALANZA YA XIKHATI XONTLHE MASIKWINI YA HINA
5. Zini lezi a patswa wo kari wu zi wulileko xungetano hi wutomi gabye ntirweni wa xikhati xontlhe?
5 Inyamutlha kambe, ku na ni votala va tirako ka tixaka to hambanahambana ka ntiro wa xikhati xontlhe. (Wona kwadru “Tixaka xa ntiro wa xikhati xontlhe.”) Va ti zwisa kuyini hi ntiro lowu va wu hlawulileko? U nga va wutisa ha wece; kuzilava u ta tsaka nguvu hi kuva u mahile lezo. Wona xikombiso xinwe: A makabye wo kari a tirileko kota phayona ga xikhati xontlhe, phayona go hlawuleka, murumiwa, ni xiro xa ngango wa Beteli matiko wundle i ngalo: “A ku nghenela ntiro wa xikhati xontlhe nzi zi wona kota xinwe xa ziboho za zi nene nguvu nzi zi mahileko wutomini. A xikhati nzi nga hi ni 18 wa malembe, nzi walwa ni ku hlawula xikari ka universidade, ntiro wa ku ti hanyisa, ni wuphayona. A kuhanya ku nzi kombile lezaku Jehova a nga rivali a kutikarata loku hi ku mahako kasi kuva malanza yakwe ya xikhati xontlhe. Nzi zi kotile ku tirisa ni gihi wutlhari kutani ntamu nzi nyikilweko hi Jehova hi tindlela taku na nzi nga tshukangi nzi zi kotile loku nzi wa no hlawula ntiro wa ku ti hanyisa.” A sati wakwe i ngalo: “Ni xihi xiavelo xi nzi vunile ku kula. Hi wonile kuvikela ni wurangeli ga Jehova hi kuphindaphinda hi tindlela taku na hi nga zangi hi ti wonile loku hi wa no ti tshamela kaya. Nzi bonga Jehova siku ni siku hi wutomi ga hina ntirweni wa xikhati xontlhe.” Wa zi tsakela kuva ni litsako lelo wutomini ga wena ke?
6. Kutsumba muni loku vontlhe va faneleko kuva nako hi Jehova?
6 Kunene, a vokari va ka ziyimo lezi zi nga va vumeleliko ku tira kota vatiri va xikhati xontlhe. Hi nga tiyiseka lezaku Jehova wa nyika lisima a kutikarata kabye hi muhefemulo vabye wontlhe. Ehleketa hi lava Paule a va kumbukileko hi mavito ka Filemoni 1-3, a ku patsa ni vontlhe lava va nga lumba bandla ga le Kolosi. (Gonza.) Paule i wa va tsakela, niku Jehova yenawu. A Dadani wa hina wa le tilweni wa tsaka hi ntiro wa wenawu. Hambulezo, u nga va vunisa kuyini lava va nga ntirweni wa xikhati xontlhe zalezi?
TINDLELA TO VUNETELA MAPHAYONA
7, 8. A ntiro wa wuphayona wu patsa yini, niku a vanwani lomu bandleni va nga ma vunisa kuyini?
7 A ku fana ni vavangeli va zana ga malembe go sangula, a maphayona yo hiseka ma tiyisa nguvu mabandla inyamutlha. A yo tala ma ti karatela ku mbheta 70 wa tihora hweti ni hweti wutirelini. U nga ma vunisa kuyini?
8 A phayona go kari ga xisati gi vitwako Shari gi ngalo: “A maphayona ma wonekisa ku khwatsi ma tiyile; maya sinwini siku ni siku. Hambulezo, ma zi lava ku tiyisiwa.” (Rom. 1:11, 12) A makabye munwani wa xisati a zi kotileko ku tira kota phayona hi malembe yo kari i wulile lezi xungetano hi maphayona ya bandla gakwe: “Ma tira yi nga chayi. Loku a vanwani va ma nyika bholeya kasi kuya sinwini, va ma ramba va taga nawo, va ma nyika malana ya ku xava mafura ya mova kutani xivuno xinwani xa timali, ma bonga nguvu. Lezo zi komba lezaku wa khatala hi vona.”
9, 10. Zini a vokari va zi mahako kasi ku vuna maphayona laha bandleni gabye?
9 Wa zi tsakela ku vuna maphayona wutirelini ke? A phayona go kari gi vitwako Bobbi gi wula lezi: “Ha xi lava nguvu xivuno nzeni ka viki.” A phayona-kulobye gi nga ka bandla ginwe naye gi lo engetela lezi: “A ku kuma vanhu va ku famba navo ni gambo xikarato xa hombe nguvu.” A makabye wo kari wa xisati, loyi zalezi a tirako Beteli ya Brooklyn, i alakanya a xivuno lexi a nyikilweko na a ha hi phayona aku: “A makabye wo kari a nga hi ni mova i lo wula lezi: ‘Ni gihi siku legi u vumalako munhu wo famba naye sinwini, nzi byele, hi ta famba zinwe.’ Handle ko kanakana i lo ponisa ntiro wa mina wa wuphayona.” Shari i wula lezi: “Anzhako ka simu, a maphayona ya magwenza ma tolovela ku tshama woce. U ngata na u ma ramba ka wukhozeli ga ngango. A ku ma patsa ka mitiro yinwani zi nga ma vuna ku simama ma tiyile.”
10 Na a alakanya ntiro wakwe wa wuphayona ni phayona ginwani ga xisati ga gwenza, a makabye wo kari loyi a nga ni xipimo xa 50 wa malembe na a hi ntirweni wa xikhati xontlhe i wula lezi: “A madota ma wa tshama hi ku enzela maphayona nzeni ka tihweti ti tsongwani. Va wa hi wutisa ku ha ha vukile ke, a ntiro wa hina wa ku ti hanyisa wu fambisa kuyini niku hi na ni xikarato xo kari ke. Va wa nga maheli ku hunzisa ntungu. Va wa hi enzela kasi ku tiva lezaku ha lava xivuno xo kari ke.” Lezo kuzilava zi nga ku alakanyisa a magezu ya Paule ya ku bonga mitiro leyi a mahelweko hi wanuna wo kari a nga hi ni ngango le Efesusi. — 2 Tim. 1:18.
11. A ku tira kota phayona go hlawuleka zi patsa yini?
11 A mabandla yo kari ma na ni thomo ga kuva ni maphayona yo hlawuleka. A kutala ka vamakabye lavo va mbheta 130 wa tihora hweti ni hweti ntirweni wa kuxumayela. Hi kota ya xikhati lexi va xi mbhetako wutirelini ni ku vunetela hi tindlela tinwani, va na ni xikhati xitsongwani kutani ku ngavi ni xikhati xa ku ti mahela ntiro wa ku ti hanyisa. A hofisa ya ravi yi va nyika malana yi tsongwani hweti ni hweti kasi va simama wutirelini.
12. A madota ni vanwani va nga ma vunisa kuyini a maphayona yo hlawuleka?
12 Hi nga ma vunisa kuyini a maphayona yo hlawuleka? A dota go kari ga ravi legi gi tirisanako ni maphayona yo tala yo hlawuleka gi wula lezi: “A madota ma fanele ku wulawula nawo, ma tiva ziyimo zabye, ma tlhela ma boha lezi ma nga va vunisako zona. A Timboni to kari ti alakanya lezaku a maphayona yo hlawuleka ma khatalelwa khwatsi hi lezi va nyikwako malana yi tsongwani hweti ni hweti, kanilezi a vamakabye xipanzeni va nga ma vuna hi tindlela to tsalangana.” A ku fana ni maphayona ya xikhati xontlhe, a maphayona yo hlawuleka ma va lava vanhu vo famba navo sinwini. U nga va vuna hi ndlela leyo ke?
LEZI HI NGA VUNISAKO ZONA A VAWONELELI VA FAMBAFAMBAKO
13, 14. a) Zini hi faneleko ku zi alakanya hi vawoneleli va xipanze? b) U alakanya ku u nga maha yini kasi ku vunetela lava va nga ntirweni wa kufambafamba?
13 A vawoneleli va xipanze ni vasati vabye a kutala ka zikhati va woniwa kota vanhu vo tiya hi tlhelo ga moya. Lezo lisine, hambulezo, vonawu va zi lava ku tiyisiwa, ku pangalatiwa wutirelini, ni ku patsiwa ka zihungato. Ahati loku va babya ziza zi lava lezaku va baxara, kuzilava na va lava ku mahiwa wuhanzuli kutani ku tolovetwa ziro (lezi hi xiPutukezi va nge i fisioterapia) ke? Va ta zi tsakela nguvu loku a vamakabye va lomu xipanzeni va va vuna ni ku khatalela zilaveko zabye. Hi nga ha ehleketa hi kukhatala loku “a n’anga yi ranzekako” Luka, a mutsali wa bhuku ga Mitiro, a ku kombisileko ka Paule ni vafambafambi vanwani. — Kol. 4:14; Miti. 20:5–21:18.
14 A vawoneleli va fambafambako ni vasati vabye va zi lava kuva ni vanghana va laha kusuhani. A muwoneleli wo kari wa xipanze i te ngalo: “Zi wonekisa ku khwatsi a vanghana va mina va zi tiva ku hi rini nzi lavako ku tiyiswa. Va maha ziwutiso za wutlhari lezi zi nzi vunako ku wula lezi zi nzi karatako. Hi ku demba khwatsi ndleve, va nzi nyika xivuno xa hombe nguvu.” A vawoneleli va xipanze ni vasati vabye va bonga nguvu a ku khatala loku a vamakabye va ku kombisako.
KU VUNETELA ZIRO ZA NGANGO WA BETELI
15, 16. Mitiro muni yi mahiwako hi lava va nga ngangweni wa Beteli ni lava va nga ka tiSalawu ta mitlhangano ya hombe, niku hi nga va vunisa kuyini?
15 Misaveni yontlhe, lava va tirako Beteli ni lava va tirako ka tiSalawu ta mitlhangano ya hombe va nyika xivuno xa lisima ka ntiro wa Mufumo ka matiko lawa ma wonelelwako hi hofisa ya ravi ya tiko gabye. Loku laha bandleni kutani xipanzeni xa wena ku hi ni vatiri va Beteli, u nga zi kombisisa kuyini lezaku wa va alakanya ke?
16 Loku va ha chikela Beteli, va nga ha tshamela ku alakanya za le kaya, hakuva va siyile ngango ni vanghana vabye vo ranzeka. A vo ku tsaka loku a vanwani laha Beteli ni lomu bandleni gabye ga giswa va maha wunghana navo! (Mar. 10:29, 30) A ntiro wabye wa siku ni siku laha Beteli wa va siyela xikhati xa kuya mitlhanganweni ni kuxumayeleni ka mahungu yo saseka viki ni viki. Hambulezo, a vatiri va Beteli va nga tshuka va kuma mitiro yinwani yo engeteleka. Loku a mabandla ma zwisisa lezi ma tlhela ma komba lezaku ma bonga a vatiri va Beteli ni ntiro lowu va wu mahako, hontlheni ha vuneka. — Gonza 1 Va Le Tesalonika 2:9.
TINDLELA TA KU VUNA VATIRI VA XIKHATI XONTLHE MATIKO-WUNDLE
17, 18. Tixaka muni ta ntiro ti patsako ziavelo za matiko-wundle?
17 Lava va amukelako xiavelo xa ku ya tira ka tiko ginwani va nga ha kuma zakuga, tirimi, mikhuwo, ni ziyimo za wutomi zo hambana nguvu ni lezi va zi toloveleko. Hikuyini va hlawulileko ku yimisana ni zikarato lezo?
18 A vokari varumiwa, lava va mbhetako xikhati xo leha wutirelini, lomu a vanhu vo tala va vunekako nguvu hi gonziselelo yabye yo hlawuleka. A hofisa ya ravi yi va lavela wutshanwana ga ku hanya kona ni malana ya ku khatalela zilaveko zabye. A vanwani va tirako matiko-wundle va avelwa ku tira hofiseni ya ravi kutani ku vunetela kuakeni ka tiyindlu ta ravi, tihofisa ta wuhunzuluseli, tiSalawu ta mitlhangano ya hombe, kutani tiSalawu ta Mufumo. Va nyikwa zakuga, wutshanwana go hanya kona, ni zilo zinwani. A ku fana ni ziro za ngango wa Beteli, vaya mitlhanganweni ya bandla hi kukhanzakanya va tlhela vaya wutirelini ka wutshamu galego, hikwalaho va vuna hi tindlela to tala.
19. Zini u faneleko ku zi alakanya xungetano hi lava va tirako matiko-wundle?
19 U nga ma alakanyisa kuyini malanza lawo? Alakanya lezaku a zakuga za tshuka zi nga va yeli — nguvunguvu kusanguleni. U nga ha alakanya lezo a xikhati lexi u va rambako lezaku mu taga zinwe; u nga ha ranga hi ku va wutisa ku xini va gako na va tlhatlhekile kutani va tsakelako ku xi ringa. Vana ni lihlaza-mbilu a xikhati va gonzako lirimi ni mikhuwo ya wutshamu lego. Zi nga ha teka xikhati lezaku va zwisisa zontlhe u wulako, kanilezi u nga va nyika xivuno ka mawulela ya zilo. Va zi lava ku gonza!
20. I ndlela muni ya yi nene leyi hi nga alakanyako hi yona lava va nga ntirweni wa xikhati xontlhe ni vapswali vabye ke?
20 A malanza ya xikhati xontlhe ma khosahala; a vapswali va konawo. Loku a vapswali vabye va hi Timboni, kuzilava va lava lezaku a vana vabye va simama ziavelweni zabye. (3 Joh. 4) Lisine lezaku loku a vapswali vabye va lava ku khatalelwa, a malanza ya xikhati xontlhe ma ta maha zontlhe ma zi kotako kasi ku va enzela hi kukhanzakanya hi laha zi kotekako hi kona. Hambulezo, lava va seleko le kaya va nga vunetela lava va nga ntirweni wa xikhati xontlhe hi ku ti nyiketela ku khatalela vapswali va khosaheleko loku va hi ni xilaveko. Alakanya lezaku a malanza ya xikhati xontlhe ma na ni wutihlamuleli ga hombe ntirweni wa lisima ka yontlhe yi tshukileko yiva kona. (Mat. 28:19, 20) Xana wena kutani bandla ga wena mu nga vunetela vapswali va khosaheleko va malanza ya xikhati xontlhe?
21. Lava va nga ntirweni wa xikhati xontlhe va ti zwisa kuyini hi xivuno ni magezu yo tiyisa hlana ya vanwani ke?
21 Lava va nghenelako a ntiro wa xikhati xontlhe, a va mahi lezo hi ku lava mali, kanilezi va lava ku nyika Jehova ni vanwani. Va tsaka hi xivuno xihi ni xihi lexi u nga va nyikako. A makabye wo kari wa xisati a tirako matiko-wundle i hlawutela lezi a votala va ti zwisako zona hi magezu lawa: “Hambu xipapilwana xa ku kombisa kubonga xa komba lezi a vanwani va ku wonisako zona ni lezaku va tsaka hi lezi u mahako.”
22. U wu wonisa kuyini a ntiro wa xikhati xontlhe?
22 A ku tirela Jehova xikhati xontlhe hi gona wutomi go tsakisa nguvu gi nga kona. Gi na ni zikarato, ga gonzisa, niku ga tangalisa. I ndlela yi nene kambe yo ti longisela kasi ku maha ntiro wa hombe wo tsakisa lowu wu to mahiwa hi wontlhe malanza yo tsumbeka ya Jehova Mufunweni wa Nungungulu. Ngha hina hontlhe hi simama ku ‘alakanya a ntiro wa kukholwa, ni kupinyama ka liranzo’ ka lava va nga ntirweni wa xikhati xontlhe. — 1 Tes. 1:3.