Vaswa — Xana mu ta maha yini hi wutomi ga nwina?

“N ZI lava za chukwana wutomini ga mina.” Lawa magezu ya nhanyana a nga tangeni yo nghena ndlwini. Handle ko kanakana, wenawu u lava zezo. Kanilezi, xana u nga zi kumisa kuyini a “za chukwana” wutomini? A zihaxa-mahungu ni vanghana va wena, kuzilava hambu vagonzisi va wena, va nga ha wula lezaku u zi kuma hi ku kuma mali yo tala ni ku kuma ntiro wa nduma — lezaku u woniwa kota manyani!

Kanilezi, a Biblia gi tlharihisa vaswa lezaku a ku hlongolisela titshomba zi fana ni “ku lanza mheho ntsena.” (Mutshawuteli 4:4) A xinwe xa zigelo za lisine lelo hi lezaku mbatsongwani a vaswa lava hakunene va kumako titshomba ni nduma. Lava va zi kumako va tala ku pola lezaku va ti karatile nguvu mahala. “Zi fana ni bhokisa ga phanga,” ku wula muswa wa le Inglaterra loyi a susileko kurso yi navelwako hi votala le universidade. “Loku u gi hlomela, a gi na nchumu.” Lisine lezaku a ntiro wa kutihanyisa wa tshuka wu ku nyika titshomba ni nduma. Kanilezi a wu zi koti ku tatisa a zilaveko za wena za moya. (Mateu 5:3, Tradução do Novo Mundo, NM) Ahandle ka lezo, 1 Johani 2:17 i tlharihisa lezaku “a tiko ga hunza.” Hambu loku u humelela tikweni legi, u ta ti buza hi xikhati xo koma nguvu.

Hikwalaho, Mutshawuteli 12:1 i va khongotelisa lezi a vaswa: “Alakanya Muvangi wa wena masikwini ya wuswa ga wena.” Hakunene, a ndlela ya chukwana ya ku lonzowota ha yona a wutomi ga wena ku tirela Jehova Nungungulu. Kanilezi u fanele ku ranga hi ku ringanelwa ku tirela Nungungulu. U nga zi mahisa kuyini? Niku xana zi patsa yini a ku tirela Nungungulu?

Lezi zi lavekako kasi ku ringanelwa kuva Mboni ya Jehova

A kusangula, u fanele ku hlakulela a mixuvo ya ku tirela Nungungulu — niku a mixuvo leyo a yiti halahala, hambu loku a vapswali va wena va hi maKristu. U fanele ku hlakulela a kuzwanana ka wena wutsumbu na Jehova. “A ku khongela ku ku vuna a kuva ni kuzwanana ka wena wutsumbu na Jehova,” ku wula a nhanyana a nga tangeni yo nghena ndlwini. — Tisimu 62:8; Jakobe 4:8.

Va Le Roma 12:2 i komba a ginwani zambo legi u faneleko ku giba. I ngalo: ‘Hlola u tiva lezi zi nga kuranza ka Nungungulu, loku ko saseka, ku amukelekako, ni ku mbheleleko.’ Xana wa tshuka u kanakanela zokari ka lezi u gonzisilweko? Loku u tshukile, lanzela a wusungukati ga Biblia ga ku ‘hlola u tiva’ lezaku hakunene a zilo lezo lisine ke! Zi kambisise ha wece. Gonza a Biblia ni mabhuku ma seketelwako ka gona. Kanilezi, a ku gonza xungetano hi Nungungulu a hi ku tirisa hloko ntsena kasi ku hlola zilo. Ti nyike xikhati xa ku ehleketa hi lezi u zi gonzako lezaku ziza zi khumba a mbilu ya wena yo fananisa. A ku maha lezo zi ta engetela a liranzo la wena ha Nungungulu. — Tisimu 1:2, 3.

Hi kulanzela, pima ku bhulela vanwani lezi u zi gonzako, kuzilava ku ngava vanghana va wena va xikola. A xigava xi lanzelako ku xumayela hi muti ni muti. A xikhati lexi u xumayelako u nga ha kumana ni munghana wa xikola, niku lezo zi nga ha ku karata kusanguleni. Kanilezi a Biblia gi hi kuca a ku ngavi na “tingana hi ivangeli.” (Va Le Roma 1:16) A xigelo hi lezaku wo xumayela a mahungu ya wutomi! Makunu, u ta wela yini tingana?

Kanilezi, loku a vapswali va wena va hi maKristu, kuzilava u sina u va pangalata ntirweni wa kuxumayela. Hambulezo, xana wa zi kota ku maha zinwani zo hunza ku ya yima laha nyangweni ya muti u cuwukela a munghana wa wena na a xumayela kutani ku nyikela marevista ni ziphephana ntsena? Xana wa zi kota ku wulawula laha nyangweni ya muti, u tirisa a Biblia kasi ku gonzisa a nwinyi wa muti? Loku u nga se zi kota, kombela xivuno ka vapswali va wena kutani ka munwani makabye wo buva wa laha bandleni. Ti vekele mixuvo ya lezaku u kala u maha muhuweleli a nga bapatizwangiko wa mahungu yo saseka!

Hi kufamba ka xikhati, u ta kuceka ku ti hendleleta — ku nga ku tsumbisa Nungungulu lezaku u ta mu tirela kusukela kwalaho kala kupinzuka. (Va Le Roma 12:1) Kanilezi a kutihendleleta a ku faneli ku mbhelela xihundleni. Nungungulu i lava lezaku vontlhe va kombisa “kubaseni” a kutihendleleta kabye. (Va Le Roma 10:10, NM) A xikhati lexi u lavako ku bapatizwa, u sangula hi ku wula hi nomu lezaku wa kholwa. Hi kona u bapatizwako lomu matini. (Mateu 28:19, 20) A kubapatizwa a hi mhaka yo hlakana. Kanilezi u nga tsiki ku bapatizwa hi ku chava lezaku u nga tshuka uwa. Loku u tsumba lezaku Nungungulu i ta ku seketela, yena hakunene i ta ku nyika “a ntamu lowu wa hombe” lezaku u zi kota ku tiya. — 2 Va Le Korinte 4:7; 1 Pedro 5:10.

A xikhati lexi u bapatizwako wo maha Mboni ya Jehova. (Isaya 43:10) Lezo zi fanele ku khumba nguvu lezi u to gi tirisisa zona a wutomi ga wena kusukela kwalaho. A ku ti hendleleta zi patsa ‘a ku ti tsika.’ (Mateu 16:24) U nga ha tsika a mixuvo yo kari ni kunwani kunavela loku u nga hi nako lezaku u ‘lava mufumo wa Nungungulu kuranga.’ (Mateu 6:33) Hi ndlela leyo, a kutihendleleta ni kubapatizwa zi ku vululela malungelo yo tala ya ku maha lezo. A hi wulawuleni hi yo kari ya kona.

Malungelo ya ku tirela Nungungulu xikhati xontlhe

● A wuphayona ginwe ga malungelo lawo. A muhuweleli a nga phayona muKristu a bapatizilweko a nga xikombiso xi nene, loyi a ti maheleko malulamiselo ya ku tira a 70 wa tihora hi wutsongwani ga kona hweti ni hweti kuxumayeleni ka mahungu yo saseka. A ku mbheta xikhati xo lehanyana ntirweni wa simu zi ta ku vuna a ku chukwatisa a wutlhari ga wena ga ku xumayela ni ku gonzisa. A maphayona yo tala ma kuma litsako la ku vuna a zigonzani za wona za Biblia a ku maha Timboni ti bapatizilweko. I ntiro muni wa kutihanyisa lowu wu zi kotako ku tsakisa nguvu a ku hunza ku maha lezo ke?

Kasi ku kuma mali ya ku ti hanyisa, a maphayona yo tala ma maha mitiro ya kutihanyisa hi xipanze xa siku kutani xa viki. A kutala ka wona ma maha malulamiselo na ka ha hi mahlweni hi ku gonza a wumeseri go kari xikoleni kutani ka vapswali vabye. Loku wena ni vapswali va wena mu alakanya lezaku i chukwana u susa a kurso yo kari anzhako ka ku pasa a xikola sekundaria, zi maheni na mu xuva ku seketela a wutireli ga wena kutani ntiro wa wena wa wuphayona, na ku nga hi ku mbilukela ku kuma mali yo tala.

Kanilezi a phayona gi khatalela nguvu a wutireli ga gona ku hunza a ntiro wa kutihanyisa — gi khomeka nguvu hi ku vuna vanhu a ku kuma wutomi! Hikuyini u nga ti vekeliko mixuvo ya kuva phayona? A wuphayona gi tala ku vulula manwani malungelo. Hi xikombiso, a maphayona yo kari ma rura ma ya tira lomu ku nga ni xilaveko xa hombe xa vahuweleli va Mufumo. A manwani ma gonza a lirimi la matiko-wundle kasi ku vuna a bandla gi khatalelako vanhu va matiko-wundle kutani ku rura va ya xumayela handle ka matiko. Handle ko kanakana, a wuphayona i hanyela go tsakisa nguvu!

● A Xikola xa Vavangeli va Mufumo i ginwani lungelo. A xikola lexi xi gonziwako hi tihweti timbiri xi yimiselwe ku gonzisa maphayona yo buva lawa ma ti yimiseleko ku rura ma ya tira ni kwihi lomu ku nga ni xilaveko. Hi lisine, vona ve ngalo, ‘Hi mina loyi, ruma mina’ na va pimanyisa Jesu Kristu, a Muvangeli wa hombe ka vontlhe lava va tirileko misaveni. (Isaya 6:8; Johani 7:29) A ku rura va ya tshama kule ni kaya zi nga ha va kurumeta ku hanya hi kutitsona. A mahanyela ya vanhu, matshamela ya wutshamu, ni zakuga za lomu va yako kona zi nga ha hambana nguvu ni lezi va zi toloveleko. Kuzilava zi nga ha lava lezaku va gonza lirimi liswa. A xikola lexi xi vuna vamakabye va xinuna ni va xisati va magwenza zinwe ni mipatswa ya vatekani, va tanga ya 23 kuya ka 65 wa malembe, lezaku va hlakulela matshamela ya moya ni wutlhari zi to laveka xiavelweni xabye lezaku va tirisiwa nguvu hi Jehova ni hlengeletano yakwe.

● A ntiro wa Beteli wu wula ku ya tira hi kutinyiketela ka yinwe ya tihofisa ta ravi ta Timboni ta Jehova. A ziro zo kari za ngango wa Beteli zi tira hi kukongoma kumaheni ka mabhuku ma seketelwako ka Biblia. A zinwani zi nyikwa mitiro ya xiseketelo yo kota ku hlayisa a muako wa Beteli ni michini ya kona kutani ku hlayisa a ngango wa Beteli. A ziavelo zontlhe lezo i ntiro wo basa wu mahelwako Jehova. Ahandle ka lezo, a vatiri va Beteli va tsaka hi ku tiva lezaku ni xihi lexi va mahako xi vuna vamakabye vabye vo tala nguvu misaveni yontlhe.

A xinwani xikhati ka vitaniwa vamakabye va tivako wumeseri go kari lezaku va ya tira Beteli. Kanilezi, a kutala ka vameseri va nga Beteli va gonza a wumeseri lego kwaseyo. Lava va tirako Beteli a va tireli bhinzu go kari kanilezi va eneliswa hi malulamiselo lawa va mahelwako yo kota zakuga, ko etlela kona, ni mali yitsongwani leyi va nyikwako. A muswa wo kari a nga xiro xa ngango wa Beteli i tlhamusela a ntiro wakwe hi ndlela leyi: “Wa tsakisa nguvu! A matirela a ma olovi, kanilezi nzi katekisilwe nguvu hi ku tira laha.”

● A ntiro wa kuaka wu nyika munhu a lungelo ga ku hlengela kuakeni ka tihofisa ta maravi ni tiSalawu ta Mufumo. A malanza ya kuaka ma vunetela ntirweni lowo wa kuaka. Lowu wonawu i ntiro wo basa, a ku fana ni ntiro wu mahilweko hi lava va nga aka a tempeli ya Solomoni. (1 Tihosi 8:13-18) A malulamiselo ya ku hlayisa a malanza ya kuaka ma fana ni ya ngango wa Beteli. Handle ko kanakana, a vamakabye lava va xinuna ni va xisati va na ni lungelo ga hombe ga ku dumisa Jehova hi ntiro wabye!

Tirela Jehova hi mbilu yontlhe

A ku tirela Jehova hi yona a ndlela ya chukwana ya ku tirisa a wutomi ga wena. Hikuyini u nga ti vekeliko mixuvo ya ku tirela Nungungulu xikhati xontlhe? Wulawula hi mhaka leyo ni vapswali va wena, madota ya bandla ga nwina, ni muwoneleli wa nwina wa xipanze. Loku u navela ku ya tira Beteli, ku gonza a Xikola xa Vavangeli va Mufumo, yana mitlhanganweni ya lava va lavako ku nghenela a malungelo lawo migotsovanyanweni ya muganga.

Lisine lezaku a hi vontlhe va ringanelwako kutani va zi kotako ku tirela Nungungulu ntirweni wa xikhati xontlhe. A vokari va tsanzekiswa hi mababyi, mangava, ni wutihlamuleli ga ngango. Hambulezo, a maKristu wontlhe ma ti hendleletileko ma fanele ku lanzela a nayo lowu wa Biblia: “U ta ranza Hosi Nungungulu wa wena hi mbilu ya wena yontlhe, ni muhefemulo wa wena wontlhe, ni kupima ka wena kontlhe.” (Mateu 22:37) Jehova i lava lezaku u mu tirela hi kuya hi laha u zi kotako hi kona. Hikwalaho, na ku nga khataliseki a xiyimo xa wena, rangisa a ntiro wa Jehova wutomini ga wena. Ti vekele mixuvo u to zi kota ku yi tatisa ntirweni wa Nungungulu. Ina, “Alakanya Muvangi wa wena masikwini ya wuswa ga wena” — hakuva u ta katekiswa kala kupinzuka loku u maha lezo!