Vamakabye lava va zwananako

HI XIPIMO xa 1.500 wa malembe, Jehova i lo nyika vaIsraeli a lungelo ga ku vitaniwa hi vito gakwe. Kanilezi hi nzhako ka xikhati i lo “enzela a vamatiko, [lezaku a] ti tekela xikari ka vona a vanhu va ta nga vitanwa hi vito gakwe.” (Miti. 15:14) A vanhu lavo va wa tava timboni takwe, niku va wa tava ni kupima kunwe na zi ngayi hi lomu va hanyako kona. Va wa ta tlhanganyiswa hi ntiro wo xumayela lowu Jesu a leleteleko valanzeli vakwe. Ite: “Hikwalaho fambani, mu va maha vapizani a matiko wontlhe, mu va bapatiza hi vito ga Dadani ni ga N’wana ni ga moya wa ku basa; mu va gonzisa a ku gonga zontlhe lezi nzi mu layileko zona.” — Mat. 28:19, 20.

² Zalezi u nga ti hendleleta ka Jehova u bapatizwa, u lo maha mupizani wa Jesu Kristu. U munwe wa vamakabye va nga misaveni yontlhe va nga ni wumunwe ga wuKristu, lava va nga tsikiko tiko, lixaka kutani xiyimo xa timali xi onha kuzwanana kabye. (Tis. 133:1) Kota wuyelo ga lezo, wa va ranza a vamakabye va bandla ga wena u tlhela u va komba xichawo. Kuzilava a vokari xikari kabye u wa va venga hi kota ya kuva mu hambene hlonge, va hi va tiko ginwani kutani hi kota ya gonziselelo yabye. Zalezi u ka xiboho xa liranzo la hombe la wumakabye, li hunzako kuzwanana kontlhe ku nga kona, ku ngava ka vanhu, ka wukhongeli kutani ka wuxaka. — Mar. 10:29, 30; Kol. 3:14; 1 Ped. 1:22.

CICA KUPIMA KA WENA KA KALE

³ Lava zi va karatelako ku hlula xihlawulela xa hlonge, kutani xi vangiwako hi politika hambu xihlawulela xinwani xi zimileko mitsu, va fanele ku ehleketa hi maKristu yo sangula ya vaJuda. A wukhongeli ga vaJuda gi wa venga vanhu va matiko manwani, kanilezi a maKristu ya vaJuda ma zi kotile ku tsika livengo lelo. A xikhati lexi Pedro a nga rumiwa kuya ka Korneliu, a nga hi nduna ya zana ya muRoma, Jehova i lo ranga hi ku mu longisela ka xiavelo lexo.— Mitiro, xipimo. 10.

⁴ Hi muwoniso, Pedro i lo byeliwa ku daya aga zihari zi nga hlazekangiko hi kuya hi nayo wa vaJuda. Laha Pedro a nga lava ku ala, i lozwa gezu le tilweni giku: “Lexi Nungungulu a xi basisileko, u nga wuli wena uku xa yila.” (Miti. 10:15) Zi lavile ku Nungungulu a zi nghenela kasi ku Pedro a vumela lezi a nga lava ku runwa, ku nga kuya kaya ka munhu wa matiko. Na a ingisa lezi a byelilweko hi Jehova, Pedro i te ngalo ka lava va nga tsombene: “Nwina ma zi tiva lezaku a muJuda a nga faneli a ku tlhangana ni wamatiko, hambu ku enghena ndlwini yakwe; kanilezi Nungungulu i nzi wonisile lezaku nzi nga vitani munhu nziku wa nyalidede kutani a nga hlazekangi. Hikwalaho laha na nzi vitanilwe nzi lota na nzi nga kanakani.” (Miti. 10:28, 29) Anzhako ka lezo, Pedro i lo wona xikombiso xa lezaku Jehova i wa xalala hi Korneliu ni maxaka yakwe.

⁵ Saule wa le Tarsusi, a muFarisi a nga gonzile nguvu, zi lavile ku a ti koramisa a tirisana ni ku vumela zileletelo za lava kale a nga va venga. (Miti. 4:13; Gal. 1:13-20; Fil. 3:4-11) Hi nga ha alakanyela a kucica ku vileko kona kupimeni ka vanhu vo kota Sergiu Paulusi, Dionisi, Damari, Filemoni, Onesimusi, ni vanwani va vumeleko mahungu yo saseka va maha vapizani va Jesu Kristu. — Miti. 13:6-12; 17:22, 33, 34; Filem. 8-20.

HI FANELE KUVA NI WUMUNWE MISAVENI YONTLHE

⁶ A zi kanakanisi lezaku a liranzo leli u kombisilweko hi vamakabye bandleni li ku tshinetile ka Jehova ni hlengeletano yakwe. U lo wona a liranzo la hombe leli li tivekisako a vapizani va lisine va Jesu Kristu. Lezo zi zwanana ni magezu yakwe yaku: “Nza mu nyika a nayo muswa, wa kuva mu ranzana; khwatsi hilezi mina nzi mu ranzileko, na nwina ranzanani. Loku mu ranzana, a vanhu vontlhe va ta zi tiva lezaku mu vapizani va mina.” (Joh. 13:34, 35) Niku laha u nga wona ku a liranzo li nga bandleni xikombiso xitsongwani ntsena xa liranzo li kombisiwako hi vamakabye va nga misaveni yontlhe, u lo engetela ku bonga Jehova ni hlengeletano yakwe. Wa wona kutatiseka ka xiprofeto xa Biblia xungetano hi kutlhanganyiswa ka vanhu lava va nga wa ta khozela Jehova hi kurula ni kuzwanana masikwini lawa yo gumesa. — Mika 4:1-5.

⁷ Inyamutlha a zilo zi hambanyisako vanhu zi tele, makunu himani a nga wa ta alakanya ku zi nga koteka ku tlhanganyisa vanhu va “matiko wontlhe, ni tixaka, ni mifumo, ni tirimi”? (Kuv. 7:9) Ehleketa hi kuhambana ku nga kona xikari ka vanhu va nghenileko hi hloko ka tekinolojiya ya nyamutlha, ni vanhu va ha womelelako ka mikhuwo ya kale ya cixaka. Cuwuka livengo li nga xikari ka vanhu va hlonge linwe ni tiko ginwe. Inyamutlha a vanhu vaya va ti dzunza nguvu hi tiko legi va pswalilweko ka gona, kota wuyelo ga kona vaya va hambanyiswa nguvu hi politika. A vanhu vanwani va ni mali yo tala kanilezi a vanwani va vumala ni mili. A zilo zi hambanyisako vanhu a wu hlayi. Maku loku uku tse u wona vanhu va matiko wontlhe, tirimi, mitlawa ni vanhu vo hambana na va tlhanganyisilwe hi liranzo ni kurula, u tekela ku zi wona lezaku lezo zilo zi nga mahiwako hi Nungungulu wa Ntamu-wontlhe ntsena. — Zak. 4:6.

⁸ Laha u nga ti hendleleta, u tlhela u bapatizwa kota Mboni ya Jehova, u lova munwe wa vanhu lavo va zwananako. Laha u vunekako hi kuzwanana loko, tlhela u ku hlayisa. U nga maha lezo hi ku ingisa a magezu ya Paule ma nga ka Va Le Galatia 6:10, ma nge: “Kota lezi hi nga ni xikhati, a hi tireni lezi [zi nga] zi nene ka vanhu vontlhe, nguvunguvu ka va le ngangweni wa kukholwa.” Hi tlhela hi ingisa a wusungukati legi: “Mu nga mahi nchumu hi mubango ni kutikukumukisa, kanilezi ngha munwe ni munwani a ti koramisa a wula munwani aku i chukwana ku hunza yena. Ngha munwe ni munwani a nga khataleli a zakwe ntsena, kanilezi a khatalela ni za vanwani.” (Fil. 2:3, 4) Laha hi ti tolovetako ku wona vamakabye va hina kota lezi Jehova a va wonisako zona na zi ngayi hi matshamela yabye ya lahandle, hi ta simama ku ti buza hi kurula ni wunghana gi nene navo. — Efe. 4:23, 24.

HA ZWELANA WUSIWANA

⁹ Kota lezi mupostoli Paule a nga zi kombisa hi mufananiso, a bandla gi na ni wumunwe niku a ziro za gona za khatalelana. (1 Kor. 12:14-26) Lezi zi khumbako a ziro zo kari za hlengeletano zi khumba malanza wontlhe ya Jehova. Lisine lezaku hi hanya ka matshamu yo hambana, kanilezi ha khatala nguvu hi kuhlayiseka ka vamakabye va hina va nga misaveni yontlhe. Loku a vamakabye vo kari va xanisiwa hi kota ya kukholwa kabye, hontlheni ha karateka nguvu. Loku a vokari va hi ni ndlala, va welwa hi timhango kutani ku xaniswa hi tiyimpi, hontlheni hi hlota tindlela to va vuna hi tlhelo ga moya ni ga nyama. — 2 Kor. 1:8-11.

¹⁰ Hontlheni hi fanele ku khongelela vamakabye va hina siku ni siku. A vokari va lomu ka ku ringwa ku maha zo biha. A vamakabye vo kari va xaniseka hi zilo lezi kuzilava zi tiviwako hi votala, kanilezi ku na ni lava va xanisekako hi zilo zi nga tshukako zi hunza na hi nga zi tivangi — zo fana ni ku kanetiwa hi vatiri-kulobye kutani ziro zinwani za ngango zi nga hiko Timboni. (Mat. 10:35, 36; 1 Tes. 2:14) Zontlhe lezo za hi karata hakuva vonawu va wumba xipanze xa ngango walowu wa wunwe wa vamakabye va nga misaveni yontlhe. (1 Ped. 5:9) A vokari xikari ka hina va tirela Jehova hi kutikarata, va wonelela mabandla ni ku rangela ntiro wo xumayela. Niku ku na ni lava va rangelako ntiro wu mahiwako misaveni yontlhe. Vontlhe va lava ku khongelelwa. Laha hi mahako lezo hi kombisa liranzo ni kukhatala ka hina hi vona, hambu loku hi nga hi na nchumu wo woneka hi nga va vunako hi wona. — Efe. 1:16; 1 Tes. 1:2, 3; 5:25.

¹¹ Kota lezi ku nga ni gujeguje yo tala masikwini lawa yo gumesa, a malanza ya Jehova ma fanele ku tshama na ma longile ku vunana. Loku ku humelela timhango ta ntumbuluko, to kota zitsekatseka za misava ni tindambi, ku wumbiwa mitlawa ya vamakabye va to vuna vanhu va welweko hi timhango leto ni zilo zo tala zo va vuna hi zona. A maKristu ya zana go sangula ga malembe ma hi vekele xikombiso mhakeni leyi. Laha ku ngava ni ndlala le Judia, a vapizani va matiko manwani va lo alakanya wusungukati ga Jesu, va rumela zakuga kasi ku vuna vamakabye vabye va nga hi le Judia. (Miti. 11:27-30; 20:35) Mupostoli Paule i lo nyika zileletelo xungetano hi lezi va nga fanele ku nyikisa zona xivuno kasi zontlhe zi famba khwatsi. (2 Kor. 9:1-15) Nyamutlha konawu, loku a vamakabye va hina va tshuka va lava ku vuniwa, a hlengeletano ni maKristu hi munwe munwe ma tekela ku hlota tindlela to va vuna.

HI HLAWULILWE KASI HI MAHA KURANZA KA JEHOVA

¹² Kota vamakabye va nga ni wumunwe misaveni yontlhe, hi xaxametilwe kasi hi maha kuranza ka Jehova. Lezi Jehova a zi lavako zezi ku a mahungu yo saseka ya Mufumo ma xumayelwa misaveni yontlhe kasi mava wukustumunyu ka vanhu vontlhe. (Mat. 24:14) Laha hi mahako lezo, Jehova i lava lezaku hi hanya hi matshinya yakwe ya milayo. (1 Ped. 1:14-16) Hi fanele ku ti koramisa ka munwe ni munwani wa hina na hi hi ni kungo go yisa mahlweni a ntiro wo xumayela. (Efe. 5:21) A ku hunza zikhati zontlhe, lexi xikhati xa kuva hi rangisa Mufumo wa Nungungulu wutomini ga hina, na ku nga hi ku veka kupima ka zilo za hina. (Mat. 6:33) Loku hi nga rivali lezo laha hi tirako zinwe kasi ku vuvumisa mahungu yo saseka hi ta tsaka nguvu zezi niku zi ta hi yisa ka makatekwa ya pinzukelwa.

¹³ Kota Timboni ta Jehova, hi hambene ni vanwani hakuva hi vanhu va hlazekileko, va tirelako Nungungulu hi kuhiseka. (Tit. 2:14) Lezi hi mu khozelisako zona Jehova zonawu za hi hambanyisa ni vanhu vanwani. Ahandle ka kuva hi tira zinwe hi kuzwanana, hi wulawula lirimi linwe la lisine hi tlhela hi hanya hi lisine lelo. Lezo zi profetilwe a xikhati lexi Jehova a nga pimisela muprofeti Zefania lezaku a tsala lezi: “Nzi ta nyika a matiko milomu yiswa leyi yi basileko, kasi wontlhe ma fela ku vitana a vito ga Jehova, ma mu tirela hi mbilu yinwe.” — Zef. 3:9.

¹⁴ Anzhako ka lezo Jehova i lo pimisela Zefania lezaku a tlhamusela a kuzwanana loku hi nga nako nyamutlha kota vamakabye va nga misaveni yontlhe. Ite: “A misalela ya ka Israeli yi nga ta ha goha, yi nga ta hemba mawunwa, ge hambu lirimi la ku khohlisa li nga ta kuva kona milonwini yabye. Hakuva va taga, va etlela hi kurula, a nga hi kona a va [dzukisako].” (Zef. 3:13) Ha zi kota ku tira hi kuzwanana hi lezi hi zwisisileko a lisine la Mhaka ya Nungungulu ni lezi hi cicileko kupima ka hina hiva ni mahanyela ma zwananako ni matshinya ya milayo ya Jehova. Hi maha zilo lezi hi mawonela ya munhu zi wonekisako ku khwatsi a zi nge koteki. Hakunene, hi hambene ni vanwani, hi vanhu va Nungungulu hi mu nyikako wudzunzo misaveni yontlhe. — Mika 2:12.