Papilo ga Hubye yi Fumako

Mukholwa-kulori a ranzekako:

Kota lezi u zi tivako, a Biblia gi wulawula nguvu hi vanhu. A kutala ka vanhu lavo vave vavanuna ni vavasati vo tsumbeka va yimiseneko ni zikarato zo fana ni lezi hi yimisanako nazo inyamutlha. Kunene, va wa “hi ni mahanyela yo kota hina.” (Jakobe 5:17) A vokari va rerilwe hi hlomulo ni kukarateka. A vanwani va khunguvanyisilwe nguvu hi ziro za mingango yabye kutani hi makholwa-kulobye. Niku, a vanwani kambe va lwisene ni kutizwa nanzu hi kota ya zihoxo zabye.

Xana a vanhu lavo va wa tsikile Jehova hi kumbhelela? Ahihi. A kutala ka vona va wa fana ni mutsali wa Tisimu loyi a nga khongela aku: “Nzi pengile khwatsi hi yivu yi lahlekileko, hlota nanza ga wena, hakuva a nzi rivali milayo ya wena.” (Tisimu 119:176) Xana wenawu u ti zwisa lezo?

Jehova a nga tshuki a rivala a vakhozeli vakwe lava va hambukileko ntlhambini. A kuhambana ni lezo, wa va lavetela — niku a kutala ka zikhati i maha lezo hi ku tirisa a makholwa-kulobye. Hi xikombiso, wona lezi Jehova a gi vunisileko zona a nanza gakwe Joba, legi gi nga yimisana ni makhombo yo tala ma nga patsa a ku luzekelwa hi titshomba, ku felwa hi varanzekako vakwe, ni mababyi ya hombe. Joba i tlhelile a timisela a magezu yo tlhava ya lava va nga fanele ku mu seketela. Hambulezo, a nga fularelangi a Nungungulu wakwe, Jehova, hambu lezi a nga tshuka a alakanya hi ndlela ya hava. (Joba 1:22; 2:10) Xana Jehova i mu vunisile kuyini Joba lezaku a tlhela ava ni mawonela ma faneleko?

A yinwe ya tindlela leti Jehova a ti tirisileko kasi ku vuna Joba kuve ku tirisa a mukholwa-kulobye a vitwako Elihu. Laha Joba a nga kari a phofula a kukarateka kakwe, Elihu i lo mu ingisela zonake a kuceka ku wulawulawo. Zini lezi a nga wa ta wula? Xana i wa ta solasola Joba kutani i wa ta zama ku mu kuca hi ku mu maha a tizwa nanzu ni ku mu wisa tingana ke? Xana Elihu i wa ti wona na a hi wa lisima nguvu ku hunza Joba? Ne ni kutsongwani! Hi ku susumetwa hi moya wa Nungungulu, Elihu i te: “Mina nzi fanana na wena mahlweni ka Nungungulu; minawu kambe nzi mahilwe hi wumba. U nga dzuki u nzi chava, ni canja ga mina ngha gi nga ku tikeli.” (Joba 33:6, 7) Wutshanwini ga ku engetela a kukarateka ka Joba, hi liranzo Elihu i lo mu nyika wusungukati a tlhela a mu tiyisa.

Hi wuxinji, alakanya lezaku hinawu hi longisele a broxura legi hi ndlela leyo. A kuranga, hi ingisele hi tlhela hi hlola hi wukheta a ziyimo ni magezu ya lava va hambukileko lisineni. (Mavingu 18:13) Anzhako ka lezo hi loya ka Biblia hiya hlola a mitlhatlhambutelo yi kombako lezi Jehova a ma vunisileko zona a malanza yakwe ya xikhatini xi hunzileko, a xikhati lexi ma nga yimisana ni ziyimo zo fana ni lezi za hina. Hi kugumesa, hi lo patsa a mitlhatlhambutelo leyo ya lomu ka Biblia ni zikombiso za masikwini ya hina zonake hi maha a broxura legi. Ha ku kuca hi matsenya lezaku u gi kambisisa. Tiyiseka lezaku ha ku ranza.

Hubye yi Fumako ya Timboni ta Jehova