I wa hi mani Joba?

Le tikweni ga Uzi, ku wa hi ni wanuna a nga khozela Jehovha. A vito gakwe ku wa hi Joba. I wa hi wanuna wo ganya nguvhu a nga hi ni ngango wa hombe. I wa hi mu nene niku i wa vhuna zvisiwana, ni vavasati vo felwa hi vanuna, ni vana vo kala va nga hi na vapswali. Kanilezvi, xana lezvi a nga kari a maha zvazvinene, zvi wa wula ku a nga ta tshuka a kumana ni zvikarato?

Joba i wa nga zvi tivi kanilezvi Sathani i wa tshama hi ku mu cuwukisela. Jehovha i no byela Sathani, aku: ‘U gi wonile a nandza ga mina Joba? A ku na mun’wani wo fana naye laha misaveni. Wa ndzi ingisa a tlhela a maha zvazvinene’. Sathani i no hlamula Jehovha, aku: ‘Lisine, Joba wa ku ingisa. Hakuva wa mu vhikela u tlhela u mu katekisa. U mu nyikile tshomba lomu tikweni ni zvihari. Mu tekele zvontlhe a nga nazvo. U ta zvi wona, i ta tsika ku ku khozela’. Jehovha aku: ‘U nga mu ringa. Kanilezvi, u nga mu dayi’. Hikuyini Jehovha a nga tsika Sathani a ringa Joba? I wa zvi tiva khwatsi ku Joba a nga ta tsika ku mu ingisa.

Sathani i no sangula ku ringa Joba hi makhombo yo tala. A ku sangula, i no rumela vanhu va vitaniwako ku va ka Xebha va ya yiva tihomu ni timbongola ta Joba. Hi kulandzela, a tiyivhu takwe tontlhe ti no hisiwa hi ndzilo, ku tlhela kuta a ntlawa wun’wani wa vanhu va vitaniwako ku maKaldheya wu ta yiva makameli yakwe. A malandza yakwe lawa ma nga hlayisa zvifuyo lezvo, wonawu ma no dawa. Ku no gumesa ku landzela khombo ga hombe nguvhu. Vontlhe a vana va Joba va no welwa hi yindlu vafa, na va kari va maha festa. Joba i no bayiseka nguvhu. Kanilezvi, a nga tsikangi ku khozela Jehovha.

Sathani i wa ha lava ku Joba a xaniseka nguvhu. Hikwalaho, i no maha lezvaku a miri wontlhe wa Joba wu tala hi zvilondza. Joba i wazwa kubayisa ka hombe nguvhu. I wa nga zvi tivi a ku hikuyini zvontlhe lezvo zvi nga mu humelela. Hambulezvo, Joba i no simama a khozela Jehovha, niku Jehovha i zvi wonile zvontlhe lezvo, a tlhela a tsaka nguvhu hi Joba.

Hi kulandzela, Sathani i no rumela vavanuna vanharu kasi va ya ringa Joba. Va no mu byela lezvi: ‘Ku na ni ciwonho u nga maha u zamako ku ci fihla. Nungungulu o ku tsayisa’. Joba a hlamula, aku: ‘A ndzi wonhangi nchumu’. Kanilezvi, i no gumesa a sangula ku alakanya lezvaku Jehovha hi yena a nga kari a mu vangela zvikarato lezvo, a tlhela a sola Jehovha a ku lezvi a nga kari a mu mahela zvi wa nga hi zvinene.

Ku wa hi ni mufana wa ku hi Elihu a nga kari a ingisela khwatsi a bhulo lego. I no gumesa a sangula ku wulawula, aku: ‘Zvontlhe lezvi mu nga zvi wula a hi lisine. Jehovha wa hombe a ku hundza lezvi hi nga zvi zwisisako. I wa nga ta tshuka a maha zvakubiha. Wa zvi wona zvontlhe zvi mahekako niku wa vhuna vanhu ka zvikarato zvabye’.

Andzhako ka lezvo, Jehovha i no wulawula na Joba, aku: ‘U wa hi kwihi a cikhati leci ndzi nga maha tilo ni misava? Hikuyini u nge a ndzi lulamangi? Wo wulawula basi, kanilezvi a wu zvi tivi ku hikuyini a zvilo lezvi zvi humelelako’. Joba i no vhumela nandzu wakwe, aku: ‘Ndzi phazamile. Ndzi wozwa ku u kona, kanilezvi zvezvi ndza ku tiva khwatsi. A ku na nchumu u ci tsandzekako. Ndzi tsetselele lezvi ndzi nga wula’.

A cikhati leci a zviringo zvi nga mbhela, Jehovha i no hanyisa Joba a tlhela a mu nyika zvilo zvo tala ku hundza lezvi a nga hi nazvo kusanguleni. Joba i no hanya malembe yo tala na a tsakile. Jehovha i katekisile Joba hi lezvi a nga mu ingisa hambu ka cikhati leci zvi nga karata. Wena ke, u ta fana na Joba u simama ku khozela Jehovha, hambu loku zvi karata?