Vaza va pswala n’wana!

Ja ku wa hundza malembe yo tala Abrahama na Sara na va chadhile. Va wa siyile muti wabye wa wu nene le Ure va ya hanya lomu ka tenda. Kanilezvi Sara i wa nga soli hi ku i wa tsumba Jehovha.

Sara i wa mu lava nguvhu n’wana laha ka kuza a byela Abrahama, aku: ‘Loku a nandza ga mina Hagari a pswala n’wana na wena, zvi ta fana ni loku a hi wa mina’. Hi ku famba ka cikhati, Hagari i no pswala n’wana. A vito gakwe ku wa hi Ixmayeli.

Loku ku hundzile malembe yo tala, Abrahama na a hi ni 99 wa malembe Sara na a hi ni 89, va no endzelwa hi vapfhumba vanharu. Abrahama i no va ramba lezvaku va ya humula laha ndzhutini wa sinya a tlhela a va nyika zvakuga. Wa zvi tiva ku a vapfhumba lavo ku wa hi vamani? Ku wa hi tingilozi! Ti no byela Abrahama, tiku: ‘A lembe gi tako hi cikhati caleci, wena ni sati wa wena mu tava ni n’wana’. Sara i wa kari a ingisela na a hi lomu tendeni. Hikwalaho, i no hleka hi le mbilwini a gumesa a pimisa lezvi: ‘Hakunene ndzi ngava ni n’wana lezvi makunu ndzi kumbileko’?

Ka lembe gi nga landzela, Sara i no pswala n’wana wa mufana, kota lezvi a ngilozi ya Jehovha yi nga va tsumbisile. Abrahama i no mu chula ku hi Isaka, lezvi zvi wulako ku “Mahleko”.

Laha Isaka a nga hi ni cipimo ca 5 wa malembe, Sara i no wona Ixmayeli na a xanisa Isaka. Sara i wa lava ku vhikela n’wana wakwe. Hikwalaho, i noya ka Abrahama a ya mu kombela ku a hlongola Hagari na Ixmayeli. Kusanguleni, Abrahama i wa nga zvi lavi ku va hlongola. Kanilezvi Jehovha i no byela Abrahama, aku: ‘Maha lezvi Sara a ku byelako. Ndzi ta mu hlayisa Ixmayeli. Kanilezvi, ndzi ta tirisa Isaka kasi ku tatisa zvitsumbiso zva mina’.