Alakanyani a sati wa Loti

Loti i wa tshama ni tiyo wakwe Abrahama le tikweni ga Khanani. Hi kufamba ka cikhati, Abrahama na Loti va nova ni zvifuyo zvo tala nguvhu laha ka kuza a wutshamu ga ku zvi gisa kona gi nga ha va eneli vontlhe va vambiri. Abrahama i no byela Loti, aku: ‘A zva ha koteki a ku hi hanya ka wutshamu gin’we. I chukwana u hlawula wutshamu legi u lavako kuya ka gona, mina ndzi taya ka legi gin’wani’. Lezvo zvi komba ku Abrahama i wa hi munene, a hi zvona?

Loti i no wona wutshamu go saseka kusuhani ni dhoropa gi vitaniwako ku i Sodhoma. Ku wa hi ni mati yo tala ni byanyi go nyuka khwatsi. Hikwalaho, i no hlawula wutshamu lego, a se rura ni ngango wakwe va ya tshama kona. I no gumesa a rura a ya tshama hi lomu ndzeni ka dhoropa ga Sodhoma.

A vanhu va le Sodhoma ni va dhoropa gi nga gamekene nago, gi nga vitaniwa ku i Gomora, va wa hi ni mahanyela yo biha nguvhu. Hi lisine, va wa hi ni mahanyela yo biha nguvhu laha ka kuza Jehovha a zvi wona zvi hi chukwana ku lovisa madhoropa lawo. Kanilezvi Jehovha i wa lava ku ponisa Loti ni ngango wakwe. Hikwalaho, i no rumela tingilozi timbiri ti ya va tlharihisa, tiku: ‘Hatlisani! Humani lomu ka dhoropa legi! Jehovha i lava ku gi lovisa’.

Loti a nga tekelangi ku huma. I no maha mihoni. A tingilozi leto ti no gumesa ti khoma Loti, ni sati wakwe, ni vanhanyana vakwe va vambiri ti va humesa handle ka dhoropa hi ku hatlisa, tiku: ‘Tsutsumani, kasi mu ngafi! Mu nga cuwuki ndzhako. Loku mu cuwuka ndzhako, mu tafa’!

A cikhati leci va nga chikela ka dhoropa gi nga vitaniwa ku Zoware, Jehovha i no nisa ndzilo ni solufa hehla ka Sodhoma ni Gomora. A madhoropa lawo ya mambiri ma no lovisiwa maku bhi. A cikhati leci a sati wa Loti a nga tsika ku ingisa Jehovha a cuwuka ndzhako, i no cica a maha ruka ga munyu! Kanilezvi Loti ni vanhanyana vakwe va ponile hi ku va ingisile Jehovha. Kuzvilava va bayisekile nguvhu hi lezvi a sati wa Loti a nga kala ku ingisa. Kanilezvi va tsakile hi kuva va ingisile a zvileletelo zva Jehovha.