A kukholwa ka Abrahama ku ringiwa

Abrahama i no gondzisa n’wana wakwe, Isaka, a ku randza Jehovha ni ku tsumba a zvitsumbiso zvontlhe zva Jehovha. Kanilezvi, a cikhati leci Isaka a nga hi ni cipimo ca 25 wa malembe, Jehovha i no kombela Abrahama lezvaku a maha nchumu wo karata nguvhu. I nchumu muni?

Nungungulu i no byela Abrahama, aku: ‘Ndzi kombela ku u teka a n’wana wa wena wa mun’we u ya ndzi mahela muphahlo hi yena le citsungeni ca Moriya’. Abrahama i wa nga zvi tivi a ku hikuyini Jehovha a mu kombelako ku maha lezvo. Hambulezvo i no ingisa.

Ka siku gi nga landzela, Abrahama i no vindzuka ni mixo a teka Isaka ni malandza mambiri vaya citsungeni ca Moriya. Loku va fambile masiku manharu, va no sangula ku wona citsunga hi le kulenyana. Abrahama i no byela malandza yakwe lezvaku ma sala kwalaho ma mu nyimela kasi yena na Isaka va ya maha muphahlo. Abrahama i no mu rwexa tihunyi Isaka, yena a welela mukwana. Isaka i no wutisa papayi wakwe, aku: ‘Papayi, ci kwihi a cihari ca ku maha hi cona muphahlo’? Abrahama i no mu hlamula, aku: ‘N’wananga, Jehovha i ta hi nyika’.

Laha hi magumo va nga chikela citsungeni, va no aka alati. Hi kulandzela, Abrahama i no boha mawoko ni minenge ya Isaka, a mu lata laha alatini.

Abrahama i no guma a khoma mukwana. Ka cikhati caleco, a ngilozi ya Jehovha yi no mu vitana na yi hi le tilweni, yiku: ‘Abrahama! U nga bayisi mufana! Makunu ndza zvi tiva lezvaku wa kholwa ka Nungungulu hakuva u wa ti yimisele ku maha muphahlo hi n’wana wa wena’. Zvalezvo, Abrahama i no wona a yivhu na yi khwekele laha ka sinya hi timhondzo. I no hatlisa a tlhatlha Isaka, a maha muphahlo hi yivhu.

Kusukela siku lego, Abrahama i no maha munghana wa Jehovha. Wa zvi tiva a ku hikuyini? Hi ku Abrahama i wa maha zvontlhe lezvi Jehovha a nga zvi lava hambu loku a nga zvi zwisisi a ku hikuyini Jehovha a mu kombelako ku maha lezvo.

Jehovha i tlhelile a phinda citsumbiso cakwe ka Abrahama, caku: ‘Ndzi ta ku katekisa, ndzi andzisa pswalo wa wena’. Lezvo zvi wula lezvaku Jehovha i wa ta katekisa a vanhu vontlhe va vanene hi ku tirisa lixaka la Abrahama.