Citiri ci ingisileko Nungungulu

Josefa i n’wana wa Jakobe loyi a mu pswalileko na a kumbile. Hikwalaho, a papayi wakwe Jakobe i wa mu randza nguvhu a ku hundza tinhondzo ta kona. U alakanya ku a tinhondzo ta kona ti wa ti zwisa kuyini? Va wa mu zonda va tlhela va mu vekela civiti. A cikhati leci Josefa a ngava ni miloro yo kari yo kala ku toloveleka, i no hlawutela vamakabye vakwe. Va no wona lezvaku a miloro leyo yi komba ku va wa ta tshuka va ya kombela zomola ka Josefa. Makunu va no engetela ku mu nyenya!

Ka siku go kari, a vamakabye va Josefa va wa gisa tiyivhu kusuhani ni dhoropa ga Xekemi. Jakobe i no ruma Josefa kasi a ya tiva ku va vhukisa kuyini. Va no wona Josefa na a hata hi kule, va se maha makungo vaku: ‘Hi gaya nyamilorwani wata. A hi mu dayeni’! Va no mu khoma va mu hoxa lomu kheleni. Kanilezvi Judha, a mun’we wa vamakabye vakwe, aku: ‘Hi nga mu dayi, i chukwana hi mu xavisa a ya maha citiri’. Hikwalaho, va no mu xavisa hi 20 wa zvingerengere zva silivha ka vaMidhiyani va ku xavisa zvilo, lava va nga kari vaya Gibhite.

A vamakabye va Josefa va no gumesa va teka bhaji gakwe va gi totela nkhata wa mbuti, va ya nyika papayi wabye, vaku: ‘A hi bhaji ga n’wana wa wena legi ke’? Jakobe i no pimisa lezvaku Josefa i delwe hi cihari ca khwati. I no bayiseka nguvhu. I hava a nga zvi kota ku mu chavelela.

Le Gibhite, Josefa i noya xaviswa kota citiri ka hosi ya hombe yi nga vitaniwa ku hi Potifare. Kanilezvi Jehovha i wa hi na Josefa. Potifare i no wona lezvaku Josefa i wa tira khwatsi niku i wa tsumbeka. I no tekela ku mu nyika ntiro wa ku rangela zvontlhe lezvi a nga hi nazvo.

A sati wa Potifare i no wona lezvaku Josefa i sasekile niku i wa hi ni ntamu. Siku ni siku, a sati wa Potifare i wa kombela Josefa lezvaku a etlela naye. Zvini lezvi Josefa a nga maha? I no ala aku: ‘A ndzi zvi lavi! Lezvo a hi zvi nene. A hosi ya mina ya ndzi tsumba, niku wena u sati wa kona. Loku ndzi etlela na wena, ndzi wonhela Nungungulu’!

Ka siku go kari, a sati wa Potifare i no kurumeta Josefa lezvaku a etlela naye. I no mu khoma hi tinguwo. Kanilezvi Josefa i no chukula a tsutsuma. A cikhati leci Potifare a nga wuya kaya, a sati wakwe i no mu byela lezvaku Josefa i mu pfinyile. I wo mu hembela. Potifare i no kwata nguvhu, a khoma Josefa a ya mu vhalela paxweni. Kanilezvi Jehovha a nga mu rivalangi Josefa.