Josefa A Vengiwa Hi Vanakulobye

WONA lezi mufana loyi a bayisekisako zona na a mbhelile ntamu. Hi Josefa. A vanakulobye va lo mu xavisa ka vavanuna lava va yako Gipite. Josefa i ta ya mahiwa khumbi kwaseyo. Hikuyini va nga maha kubiha loko? Va mahile lezo hakuva va na ni xiluse ka Josefa.

Raru wabye Jakobe i wa ranza nguvu Josefa. I kombile ku i wa mu ranza hi ku mu mahela a bhaji go leha go saseka. Loku tinhonzwa takwe ta 10 ti wonile lezi Jakobe a nga ranzisa zona Josefa ti lo sangula ku mu lusela ni ku mu venga. Kambe a ku hi ni xinwani xigelo xa ku mu venga kabye.

Josefa i lova ni miloro mimbiri. A ka miloro leyo a vanakulobye va lo mu khizamela. Loku Josefa a tivisile miloro leyo ka vanakulobye, a livengo labye li lo engeteleka nguvu.

Siku go kari laha a tinhonzwa ta Josefa ti nga risa tiyivu ta raru wabye, Jakobe i lo ruma Josefa a ku ya va kamba. Loku vamakabye va Josefa va mu wonile na ata, vanwani va kona va te ngalo: ‘A hi mu dayeni!’ Kanilezi Rubeni, nhonzwa yabye, i te: ‘Ahihi, mu nga mahi lezo!’ Wutshanwini ga lezo, va lo mu khoma va mu hoxa lomu hlobyeni yi nga womile. Anzhako ka lezo vona va lo tshama hasi va boha lezi va nga wa ta maha hi yena.

Hi lexo xikhati ku wa hunza vavanuna vo kari va ka Ixmaeli. Juda aku ngalo ka vanakulobye: ‘A hi mu xaviseni ka va ka Ixmaeli.’ Lezo hi zona va nga maha. Vona va lo xavisa Josefa hi 20 wa zingerengere za siliva. A hi kubiha ka zona!

A vanakulobye va wa ta ya wula yini ka raru wabye? Vona va lo daya mbuti va peta bhaji go saseka ga Josefa lomu nkhateni wa yona kambe ni kambe. Anzhako ka lezo va lo teka a bhaji lego va tlhela ka raru wabye Jakobe vaya ku ngalo: ‘Hi kumile lezi. Gi cuwuke, u wona a ku xana a hi bhaji ga Josefa ke.’

Jakobe i lo wona a ku hi gona. Yena i lo rila aku: ‘Za koteka ku Josefa a delwe hi xihari xa khwati.’ Hi zona lezo a vamakabye va Josefa va nga lava ku raru wabye a zi pimisa. Jakobe i lo bayiseka nguvu. Yena i lo rila masiku yo tala. Kanilezi Josefa a nga fangi. A hi woneni lezi zi mu humelelako lomu a yiswako kona.