Jehovha a nga tshukangi a rivala Josefa

A cikhati leci Josefa a nga hi lomu paxweni, Faro a hosi ya Gibhite, i no lora zvilo zva ku i hava a nga zvi kota ku mu tlhamusela. A gin’we ga malandza ya Faro gi no mu byela lezvaku Josefa a nga zvi kota ku mu tlhamusela lezvi a nga lora. Faro i no tekela ku vitanisa Josefa.

Faro i no wutisa Josefa, aku: ‘U nga ndzi tlhamusela lezvi ndzi nga lora?’ Josefa i no byela Faro, aku: ‘Ku tava ni 7 wa malembe ku to pfuniwa nguvhu lomu Gibhite, ku gumesa ku landzela 7 wa malembe ya ndlala. Hlawula munhu wa ku tlhariha lezvaku a hlengeletela zvakuga kasi a vanhu va wena va ngafi hi ndlala’. Faro aku: ‘Ndzi hlawula wena! U tava wa wumbiri hi wuhosi lomu Gibhite’! Josefa i wu tivisile kuyini a tlhamuselo wa lezvi Faro a nga lora? Hi Jehovha a nga mu vhuna.

Ka 7 wa malembe ma nga landzela, Josefa i no hlengeletela zvakuga. Andzhako ka lezvo, ku no sangula ndlala lomu tikweni gontlhe, kota lezvi Josefa a nga wulile. Ku wata vanhu hi ka matshamu wontlhe va ta xava zvakuga ka Josefa. A papayi wakwe, Jakobe, i nozwa lezvaku ku wa hi ni zvakuga le Gibhite. Hikwalaho, i no ruma vana vakwe va 10 lezvaku va ya xava zvakuga.

A vana va Jakobe va noya ka Josefa. Zvalezvi a nga va wona, i no tekela ku va tiva. Kanilezvi, vona a va mu tivangi. Va no mu khizamela kota lezvi a nga lorile na a ha hi n’wanana. Josefa i wa lava ku tiva ku a vamakabye vakwe va wa ha bihile ke. Hikwalaho, i no va byela lezvi: ‘N’wina mu zvipiyawu. Mu lava ku tiva ka ku gi dhumela hi kona a tiko ga hina’. Vona va no hlamula, vaku: ‘Ahihi! Hita hi le Khanani. Hi pswalilwe na hi hi 12 wa vamakabye. A mun’we wa kona i file; loyi wa ndzisana i sele na papayi’. Josefa aku: ‘Fambani mu ya teka ndzisana ya n’wina muta nayo, hi kona ndzi to kholwa’. Hikwalaho, va no tlhela kaya ka papayi wabye.

A cikhati leci va nga mbheta zvakuga, Jakobe i no ruma vana vakwe lezvaku va tlhela Gibhite. Ka khati lego, va no teka Bhenjamini, a ndzisana yabye, va famba naye. Kasi ku ringa vamakabye vakwe, Josefa i no fihla kopo yakwe ya prata lomu ka sakwa ya zvakuga ya Bhenjamini, a gumesa a va lumbeta ku va no yiva. A cikhati leci a malandza ya Josefa ma nga kuma kopo lomu sakweni ya Bhenjamini, a vamakabye vakwe va no dzuka. Va no khongotela Josefa lezvaku a tsayisa vona, a tsika Bhenjamini.

Makunu Josefa i no zvi pola lezvaku a vamakabye vakwe va wa cicile. Josefa a nga ha zvi kotangi ku ti khoma. I no rila, a gumesa aku: ‘Hi mina Josefa, a makabye wa n’wina. A papayi wa mina wa ha hanya’? A vamakabye vakwe va no hlamala nguvhu. I no va byela lezvi: ‘Mu nga tizwi nandzu hi kota ya lezvi mu nga ndzi maha. Hi Nungungulu a nga ndzi rumela seno kasi ku ta ponisa wutomi ga n’wina. Hatlisani mu ya teka papayi mu wuya naye’.

Va no tlhela kaya va ya byela papayi wabye a mahungu lawo ya manene va tlhela va mu teka va famba naye Gibhite. Andzhako ka malembe yo tala, Josefa ni papayi wakwe va no tlhela vava zvin’we.