Mosi i hlawulile ku tirela Jehovha

Le Gibhite, a ngango wa Jakobe wu wa vitaniwa ku vaIzrayeli. Andzhako ka ku Jakobe na Josefa va file, ku no sangula ku fuma mun’wani Faro le Gibhite. Faro loye i wa chava ku a vaIzrayeli vava ni ntamu a ku hundza vaGibhite. Hikwalaho, Faro i no va maha tikhumbi. I no va kurumeta ku va maha zvitini a tlhela a va tirisa nguvhu lomu masin’wini. Kanilezvi, laha a vaGibhite va ngaya va va tirisa nguvhu, a vaIzrayeli va wo engetela a ku tala. Kota lezvi zvi nga kala zvi nga mu tsakisi Faro, i no laya lezvaku zvontlhe a zvivanana zva vafana zva vaIzrayeli zvi dawa na zva ha hi ku pswaliwa. Hi nga alakanyela lezvi a vaIzrayeli va nga chavisa zvona.

A wasati wo kari wa muIzrayeli wa ku hi Jokebhedhe i no pswala cifanyana co saseka nguvhu. Kasi ku ci vhikela, i no ci chela lomu ka ndzhava a gumesa a ya wu fihla lomu hlangeni, Congweni wa Nilo. Miriyamu, a makabye wa cifanyana leci, i no tshama kusuhani ni ndzhava lowo kasi a wona lezvi zvi to humelela.

A cikhati leci a nhanyana wa Faro a ngata congweni kasi a ta hlamba, i no wona ndzhava lowo. Lomu ka ndzhava, i no kuma cin’wanana na ci rila, a ci zwela wusiwana. Miriyamu i no wutisa, aku: ‘Ndzi ya ku vitanela wasati kasi a ta ku an’wisela a cin’wanana leci’? A cikhati leci a nhanyana wa Faro a ngaku ina, Miriyamu i noya vitana Jokebhedhe, a mamani wa cifanyana leco. A nhanyana wa Faro i no ta byela wasati loye, aku: ‘Teka n’wanana loyi, u ya ndzi an’wisela, ndzi ta ku hakhela’.

A cikhati leci a n’wanana a nga kula, Jokebhedhe i no mu heleketa ka nhanyana wa Faro. A nhanyana wa Faro, i no mu chula ku hi Mosi a tlhela a mu hlayisisa ku khwatsi i n’wana wakwe. Mosi i no wundliswa ku khwatsi i n’wana wa hosi niku i wa kuma zvontlhe a nga zvi lava. Kanilezvi Mosi a nga tshukangi a rivala Jehovha. I wa zvi tiva khwatsi ku muIzrayeli — i wa nga hi muGibhite — a tlhela a hlawula ku tirela Jehovha.

A cikhati leci a nga hi ni 40 wa malembe, i no boha ku vhuna vanhu vakwe. Laha a nga wona muGibhite na aba muIzrayeli, Mosi i no muba nguvhu a muGibhite loye laha ka kuza afa. A gumesa a fihla cirumbi ca kona lomu ka civhunyi. A cikhati leci Faro a nga zvi tiva, i no zama ku daya Mosi. Kanilezvi Mosi i no tsutsuma a ya tikweni ga Midhiyani. Jehovha i no mu hlayisa ni kwaseyo a ngaya kona.