Hosi Yo Biha Yi Fuma Le Gipite

A VAVANUNA lava laha vo kurumeta vanhu a ku tira. Cuwuka wanuna loyi a bako munwe wa vatiri hi xisepho! A vatiri va lumba a ngango wa Jakobe, niku vona va vitwa a ku vaIsraeli. Ni vavanuna lava va va kurumetako ku tira vaGipite. A vaIsraeli va lo maha tikhumbi ta vaGipite. Zi mahekisile kuyini lezo?

Hi malembe yo tala a ngango lowu wa hombe wa Jakobe wu hanyile hi kurula le Gipite. Josefa, loyi a nga hi wa hombe nguvu a ku hunza vontlhe le Gipite ahandle ka Faro a hosi, i wa va hlayisa. Kanilezi Josefa i lofa. Zonake Faro wa muswa, loyi a nga maha hosi le Gipite, i wa nga ranzi vaIsraeli.

Hikwalaho Faro loye wo biha i lo maha vaIsraeli vava tikhumbi. I lo yimisa vavanuna vo biha ni va timbiti hehla kabye. Vona va lo kurumeta vaIsraeli a ku tira hi kunonoha kuakeni ka madoropa ya Faro. Hambulezo a vaIsraeli va simamile ku anza hi ntsengo. Anzhako ka xikhatanyana a vaGipite va lo chava a ku a vaIsraeli va wa ta maha vo tala nguvu ni ku tlhela va tiya nguvu.

Wa zi tiva lezi a nga maha Faro? Yena i lo wulawula ni vavasati lava va nga kari va vuna vamamani va vaIsraeli loku va pswala vana, aku: ‘Dayani zontlhe zihlangi za xinuna lezi zi pswaliwako.’ Kanilezi a vavasati lavo va wa hi va nene, vona a va dayangi a zihlangi lezo.

Hizalezo Faro i lo laya lezi ka vanhu vakwe vontlhe: ‘Tekani zihlangi za xinuna za vaIsraeli mu zi daya. Ntsena tsikani zihlangi za xisati zi hanya.’ Ku wa nga hi nchumu wo chavisa lowo a kuva a wu laya? A hi woneni lezi xinwe xa zihlangi za xinuna xi nga ponisiswa zona.