CIGONDZO 20

6 wa makhombo lawa ma nga landzela

Mosi na Aroni va no ya byela Faro lezvi Nungungulu a nga wula. Vaku Nungungulu i te: ‘Loku u nga tsiki vanhu va mina va famba, ndzi ta rumela mabhowani lomu tikweni ga wena’. A mabhowani ma no pomela tiyindlu tontlhe ta vaGibhite — ta lava vo ganya ni ta zvisiwana. A mabhowani ma no tata a tiko gontlhe. Kanilezvi le tikweni ga Goxeni, lomu a vaIzrayeli va nga tshama kona, ku wa nga hi na mabhowani. Kusukela ka khombo legi ga wu 4, ni lawa man’wani ma nga landzela ma xanisile vaGibhite basi. Faro i no kombela, aku: ‘Khongotelani Jehovha a susa mabhowani lawa. Ndzi ta tsika a vanhu va n’wina va famba’. Kanilezvi, a cikhati leci Jehovha a nga susa mabhowani, Faro i no cica, a nga ha vhumeli ku va tsika va famba. Xana Faro i wa ta tshuka a gondza cokari?

Jehovha i no wula lezvi: ‘Loku Faro a nga tsiki vanhu va mina va famba, a zvihari zva vaGibhite zvi ta babya zvi tlhela zvifa’. Hi mandziko wa kona, a zvihari zva vaGibhite zvi no sangula kufa. Kanilezvi, a zvihari zva vaIzrayeli a zvi fangi. Hambulezvo, Faro i no simama ku sihalala, niku a nga va tsikangi va famba.

Hi ku landzela, Jehovha i no byela Mosi lezvaku a tlhela ka Faro a ya xwanya khuma le hehla. A khuma gi no maha lithuri kutani pukutsa, li tata kontlhe li tlhela li namarela vaGibhite vontlhe. A lithuri, li no vanga zvidlayi lomu mirini wa vaGibhite vontlhe ni ka zvihari zvabye. Hambu ni zvalezvo, Faro a nga vhumelangi ku tsika vaIzrayeli va famba.

Makhombo ya le Gibhite, kusukela ka ga wu 4 kala ka ga wu 6: mabhowani, ntungu lomu tisinyeni, zvidlayi

Jehovha i no ruma Mosi lezvaku a tlhela ka Faro a ya mu wutisa lezvi: ‘Wa ha ala ku tsika vanhu va mina va famba ke? A mandziko ndzi ta nisa vhula ya maralala tikweni ga wena’. Hi mandziko wa kona, Jehovha i no rumela maralala, ni kudzindza, ni kuhatima. Ku wa hi ni moya wa hombe nguvhu wa ku cima wu wa nga se woniwa le Gibhite. A timbewu tontlhe ti no wonheka ni tisinya tontlhe ti no hahluliwa. Kanilezvi, le tikweni ga Goxeni a ku wonhekangi ne ku hahluliwa nchumu. Faro aku: ‘Khongotelani Jehovha a nyimisa a vhula leyi ya maralala, ndzi ta mu tsika mu famba’. Kanilezvi, zvalezvi a maralala ni vhula zvi nga nyima, Faro i no cica kambe, a ala ku va tsika va famba.

Mosi a gumesa aku: ‘Tontlhe a tisinya ti nga siyiwa hi vhula ya maralala, ti ta giwa hi mabhandzala’. Ku nota mabhandzala ya talela ga cima ma taga zvontlhe zvi nga sele lomu masin’wini ni lomu tisinyeni. Faro a kombela, aku: ‘Khongotelani Jehovha lezvaku a susa a mabhandzala lawa’. Kanilezvi, hambu a cikhati leci Jehovha a nga susa mabhandzala, Faro i no simama a sihalala.

Jehovha i no byela Mosi, aku: ‘Tlakusa canja ga wena le tilweni’. Zvalezvi a nga tlakusa, ku no tekela ku phuma ku ku dema. A vaGibhite va no tshama lomu munyameni hi masiku manharu, va nga woni nchumu ne va nga wonani. A vaIzrayeli hi vona voce va nga hi kuwonekeleni lomu mitini yabye.

Makhombo ya le Gibhite, kusukela ka ga wu 7 kala ka ga wu 9: maralala, mabhandzala, munyama

Faro i no byela Mosi, aku: ‘Wena ni vanhu va n’wina mu nga famba. Kanilezvi siyani a zvihari zva n’wina’. Mosi aku: ‘Hi fanele ku famba ni zvihari zva hina kasi hi ya maha hi zvona munyikelo ka Nungungulu wa hina’. Faro i no zangara nguvhu. A bhonga, aku: ‘Suka laha ka mina! Loku wo tsangila laha ka mina, ndzi ta ku daya’.

“Mu ta tlhela mu wona kuhambana cikari ka munhu wa kululama ni munhu wa kubiha, ni cikari ka loyi a tirelako Nungungulu ni loyi a nga mu tireliko.” — Malaki 3:18