12 wa zvipiyawu

A vaIzrayeli va no suka Citsungeni ca Sinayi va famba hi lomu ciwuleni ca Parani kala va ya chikela ka wutshamu gi vitaniwako ku Kadhexe. Na va hi seyo, Jehovha i no byela Mosi aku: ‘Hlawula 12 wa vavanuna, mun’we ka lixaka lin’we ni lin’wani, u va ruma va ya hlola a tiko ga Khanani, legi ndzi to nyika vaIzrayeli’. Mosi i no hlawula 12 wa vavanuna a va byela lezvi: ‘Fambani Khanani, mu ya wona lezvaku a tiko lego ga pfuna zvakuga ke. Tlhelani mu wona ku a vanhu va kona va na ni ntamu kutani ahihi niku va hanya lomu matendeni kutani lomu ka madhoropa ke’. A zvipiyawu lezvo zva 12 zvi nga patsa Joxuwa na Kalebhi, zvi noya Khanani.

Andzhako ka 40 wa masiku, a zvipiyawu lezvo zvi no tlhela ni makuwu, maromã ni mauvha, zvi ya wula lezvi: ‘I tiko ga ginene. Kanilezvi, a vanhu va kona va na ni ntamu niku a madhoropa ya kona ma na ni mimuro yo leha’. Kalebhi aku: ‘Hi ta va hlula. A hi fambeni zvezvi’! Wa zvi tiva a ku hikuyini Kalebhi a nga wula lezvo? Hi ku yena na Joxuwa va wa tsumba Jehovha. Kanilezvi a zvipiyawu lezvi zvin’wani zva 10 zvi te: ‘Ahihi! A vanhu va seniyani va lehile, va fana ni zvihotlovila lezvi zvi nga pswalilwe hi vavasati ni tingilozi! Loku hi gamakana navo hi fana ni mabhandzala’.

A vaIzrayeli va no mbhela ntamu. Va no sangula ku ngurangura va byelana lezvi: ‘A hi hlawuleni murangeli mun’wani hi tlhela Gibhite. Hi nga yeni tikweni legiya hi nga dawa’. Joxuwa na Kalebhi vaku: ‘Mu nga tsikeni ku ingisa Jehovha. Ne mu nga chavi. Jehovha i ta hi vhikela’. Kanilezvi a vaIzrayeli va wa nga zvi lavi ku ingisa. Va zile va lava ni ku daya Joxuwa na Kalebhi!

Makunu Jehovha i mahile yini? I no byela Mosi aku: ‘A vaIzrayeli ndzi va mahele zvilo zvo tala. Hambulezvo, a va ndzi ingisi. Hikwalaho, va ta tshama 40 wa malembe lomu ciwuleni va tlhela vafa kwalomu. A vana vabye na Joxuwa na Kalebhi hi vona va to ya hanya ka tiko legi ndzi va tsumbisileko’.