Jehovha a hlawula Joxuwa

A cikhati leci Mosi a nga hi kusuhani ni kufa, andzhako ko rangela vaIzrayeli hi malembe yo tala, Jehovha i no mu byela lezvi: ‘A hi wena u to nghenisa vanhu Tikweni ga Citsumbiso. Kanilezvi ndzi ta ku tsika u gi wona’. Mosi i no kombela Jehovha lezvaku a hlawula munhu mun’wani kasi a rangela vanhu. Jehovha aku: ‘Famba ka Joxuwa, u ya mu byela ku hi yena a to rangela vanhu’.

Mosi i no gumesa a byela vanhu lezvaku i wa tafa na ku nga hi kale niku Jehovha i hlawulile Joxuwa lezvaku a va rangela kasi va nghena Tikweni ga Citsumbiso. Mosi i no guma a byela Joxuwa, aku: ‘U nga chavi. Jehovha i ta ku vhuna’. Loku ku hundzile cikhatanyana, Mosi i no kandziha a ya hehla ka Citsunga ca Nebho, niku Jehovha i no mu komba tiko legi a nga tsumbisile Abrahama, Isaka na Jakobe. Mosi i wa hi ni 120 wa malembe a cikhati leci a ngafa.

Jehovha i no byela Joxuwa, aku: ‘Tsemakanya Congo wa Jordhani, uya Khanani. Wenawu ndzi ta ku vhuna a ku fana ni lezvi ndzi nga vhuna Mosi. Lera a Nayo wa mina siku ni siku. U nga chavi. Tiya hlanha. Famba u ya maha lezvi ndzi nga ku ruma’.

Joxuwa i no ruma zvipiyawu zvimbiri zviya dhoropeni ga Jeriko. Ka matimu ma landzelako, hi ta gondza zvin’wani zvi nga humelela seyo. Loku va wuyile, va no ta wula lezvaku ci wa hi cikhati ci nene ca kuya Khanani. Ka siku gi nga landzela, Joxuwa i no byela vanhu lezvaku va petseletela matenda yabye. Hi kulandzela, i no byela vapristi lava va nga rwala Arke ga civhumelwano lezvaku va gi teka va ranga nago vaya Congweni wa Jordhani. A congo wu wa tele nguvhu hi mati wu tlhela wu hlata. Kanilezvi neti a mikondzo ya vapristi yi nga khumba mati, a mati ya congo ma no nyima ku famba mapswha! A vapristi va noya va ya nyima laha cikari ka congo kala a vaIzrayeli vontlhe va tsemakanya. Hi mawonela ya wena, a cihlamaliso leci ci va alakanyisile lezvi Jehovha a nga va mahele le Bimbini go Pswhuka ke?

Hi kugumesa, a vaIzrayeli va no chikela Tikweni ga Citsumbiso, andzhako ka malembe yo tala na va rindzela. Makunu zvi wa koteka ku va aka tiyindlu ni madhoropa. Va rima masimu, va byala tisinya ta mauvha ni ta mihandzu yin’wani. Le Tikweni ga Citsumbiso ku wa hi ni zvilo zvo tala zva zvi nene kasi kuga ni kunwa. Hi cigelo leco, ku wa vitaniwa ku i tiko ga masi ni wulombe.