Jehovha a mu nyika ntamu Samsoni

A vaIzrayeli vo tala va no vhuxetela kambe ku khozela zvifananiso. Hikwalaho, Jehovha i no tsika vaFilistiya va fumela tiko gabye. Kanilezvi, ku wa hi ni vaIzrayeli vo kari va nga randza Jehovha. A mun’we wa kona ku wa hi Manowa. Yena ni sati wakwe va wa nga hi na vana. Ka siku go kari, Jehovha i no rumela ngilozi ka sati wakwe, yi yaku: ‘U ta pswala n’wana wa mufana. A n’wana loye i ta tlhatlhisa Izrayeli ka vaFilistiya. I tava muNazira’. Wa zvi tiva ku a vaNazira va wa hi vamani? Va wa hi malandza yo hlawuleka ya Jehovha. A vaNazira va wa nga vhumelelwi ku tsemeta misisi.

Hi ku famba ka cikhati, a n’wana wa Manowa i no pswaliwa a mu chula ku hi Samsoni. A cikhati leci Samsoni a nga kula, Jehovha i no mu nyika ntamu wa hombe nguvhu. I wa zvi kota ku daya nghala hi mandla. Ka khati go kari, Samsoni i no daya 30 wa vaFilistiya yece. A vaFilistiya va no mu zonda va simama ku lavetela tindlela ta ku mu daya. Ka wusiku go kari, Samsoni na a etlele le Gaza, a vaFilistiya va noya laha nyangweni ya dhoropa va ya rindzela kasi va mu daya ni mixo ya kona. Kanilezvi, laha cikari ka wusiku, Samsoni i no vhuka aya laha nyangweni ya dhoropa, a ya kunula livati leyi ya hombe. I no pinga livati hi makatla a famba nayo kala le hehla ka citsunga ci nga hi kusuhani ni Hebroni!

Hi ndzhako ka cikhati, a vaFilistiya va noya ka Dhelila, a cigango ca Samsoni, va yaku: ‘Loku u hi byela a ku hikuyini Samsoni a nga ni ntamu wa hombe nguvhu, hi ta ku nyika 1000 wa zvingerengere zva prata. Hi lava ku mu khoma hi mu vhalela paxweni’. Dhelila i no vhumela, hakuva i wa lava mali. Kusanguleni, Samsoni i no ala ku mu byela a ku hikuyini a nga hi ni ntamu wa hombe. Kanilezvi Dhelila i no mu kurumetela kala aza a vhumela ku mu byela leci ci nga mu maha ava ni ntamu wa hombe. I no byela Dhelila, aku: ‘A ndzi se tshuka ndzi tsemeta misisi hakuva ndzi muNazira. Loku a misisi ya mina yi tsemiwa, ndzi ta mbhela ntamu’. Samsoni i mahile cihoxo ca hombe hi ku mu byela lezvo, a hi zvona?

Dhelila i no tekela ku byela vaFilistiya, aku: ‘Mina ndza ci tiva cihundla cakwe!’ Dhelila i no etlelisa Samsoni laha madzolweni yakwe a vitanisa munhu a ta mu tsema misisi. Dhelila i no gumesa a banguleka, aku: ‘Samsoni, a vaFilistiya hi lava’! Samsoni i no vhuka na a nga ha hi na ntamu. A vaFilistiya va no mu khoma, va mu bhoxa matihlo va ya mu vhalela paxweni.

Ka siku go kari, a vaFilistiya vo tala nguvhu va no tlhangana lomu tempeleni ya nungungulu wabye Dhagoni va banguleka, vaku: ‘A nungungulu wa hina i hi nyikile Samsoni! Humesani Samsoni hi ta hlakana hi yena’. Va no mu yimisa cikari ka mapilari mambiri ya tempeli va sangula ku mu poyilela. Samsoni i no vitana Jehovha hi gezu go tlakuka, aku: ‘O Jehovha, ndzi kombela u tlhela u ndzi nyika ntamu khati gin’we basi’. Ka cikhati leco, a misisi ya Samsoni yi wa kulile kambe. I no nikinya mapilari ya tempeli hi ntamu wakwe wontlhe. A tempeli yontlhe yi no khungumuka yiwa, yi daya vanhu vontlhe va nga hi lomo, a ku patsa na Samsoni.